ខេត្តកណ្តាល៖ បុរសម្នាក់ផឹកស្រវឹងរពិសដៃលូកទៅទាញខ្សែភ្លើងកង្ហារកំពុងដោតភ្លើងកាន់ចំមុខតំណបណ្តាលឲ្យឆក់ស្លាប់ភ្លាមៗ ។ ហេតុការណ៍ឆក់មនុស្សស្លាប់បុរសរូបនេះ កើតឡើងកាលពីថ្ងៃទី០៣ ខែមីនា វេលាម៉ោង២០និង៤០នាទីយប់ នៅក្រោមផ្ទះឈ្មោះ ដាង ស៊ាម ស្ថិតក្នុងភូមិពាមរាំងក្រោម ឃុំពាមរាំង ស្រុកលើកដែក ។
ជនរងគ្រោះឈ្មោះ ប្រុង នាង ភេទប្រុសអាយុ៣៩ឆ្នាំ ជាកម្មករ មានទីលំនៅភូមិ ឃុំកើតហេតុខាងលើ ។ ប្រភពព័ត៌មានឱ្យដឹងថា មុនពេលកើតហេតុជនរងគ្រោះបានអង្គុយផឹកស្រានៅមុខផ្ទះឈ្មោះ ដាង ស៊ាម ត្រូវជាបងថ្លៃជនរងគ្រោះ មានគ្នាចំនួន៤នាក់ ។ ប្រភពបន្តថា លុះដល់ម៉ោងកើតហេតុជនរងគ្រោះក៏បាននាំគ្នាយកគ្រែចូលក្រោមផ្ទះ ពេលនោះស្រាប់តែជនរងគ្រោះបានលូកដៃទាញខ្សែភ្លើងកង្ហារដែលកំពុងដោតភ្លើង កាន់ចំមុខតំណក៏បណ្តាលឲ្យឆក់ស្លាប់តែម្តង ។
ក្រោយកើតហេតុ នគរបាលជំនាញសហការជាមួយនគរបាលប៉ុស្តិ៍ អាជ្ញាធរភូមិ ឃុំ គ្រូពេទ្យចុះពិនិត្យសព ។ បន្ទាប់ពិនិត្យរួចបានបញ្ជាក់ថា ជនរងគ្រោះពិតជាស្លាប់ក្នុងករណីឆក់ខ្សែភ្លើងប្រាកដមែន ក៏ប្រគល់សពជូនក្រុមគ្រួសាររៀបចំធ្វើបុណ្យតាមប្រពៃណី ៕
ចែករំលែកព័តមាននេះ