រាជធានីភ្នំពេញ ៖ ឡុង សំណាង មកពីក្លិបសាលវ័ន្តកីឡា ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះ ហ្វារុងរឿង ស.ដានឆ័យ ក្នុងប្រភេទទម្ងន់៦០គីឡូក្រាមនៅលើសង្វៀនស៊ីធីអិនថ្ងៃអាទិត្យទី៦ មីនា ខានស្អែកនេះ
រាជធានីភ្នំពេញ ៖ ឡុង សំណាង មកពីក្លិបសាលវ័ន្តកីឡា ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះ ហ្វារុងរឿង ស.ដានឆ័យ ក្នុងប្រភេទទម្ងន់៦០គីឡូក្រាមនៅលើសង្វៀនស៊ីធីអិនថ្ងៃអាទិត្យទី៦ មីនា ខានស្អែកនេះ ចំណែកព្រំ វី មកពីក្លិបខ្លារខិនមានរិទ្ធ ជួបប្រកួតជាមួយកីឡាករថៃឈ្មោះ រុងរឿងឡេក ស.ដានឆ័យ ក្នុងប្រភេទទម្ងន់៥៧គីឡូក្រាម ។
ឡុង សំណាង ប្រកួតបាន១៥ដង ឈ្នះ១០ដង ចាញ់៥ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន២ដង ។ រីឯហ្វារុងរឿង ស.ដានឆ័យ ធ្លាប់ប្រកួតបាន៦០ដង ឈ្នះ៤០ដង ចាញ់១៧ដង និងស្មើ៣ដង ។ ដូច្នេះសម្រាប់ការប្រកួតលើកនេះ ឡុង សំណាង ប្រហែលជាគ្មានសំណាងដូចឈ្មោះឡើយពេលជួបកីឡាករថៃដែលជាជើងខ្លាំងមានបទពិសោធន៍ប្រកួតនៅលើសង្វៀនច្រើនជាងដាច់ឆ្ងាយបែបនេះ ។ ទោះបីយ៉ាងណា ឡុង សំណាង បានត្រៀមខ្លួនរួចជាស្រេចដើម្បីទប់ទល់តាមរយៈការប្រឹងហ្វឹកហាត់ទាំងបច្ចេកទេសវាយ និងបង្កើនថាមពលកម្លាំងតាមរយៈការរត់មិនហ៊ានធ្វេសប្រហែសឡើយ។ ដូច្នេះកីឡាករថៃបើចង់យកឈ្នះលើគេ គឺមិនមែនជារឿងងាយស្រួលប៉ុន្មានទេ ។
ចំណែកព្រំ វី ដែលមានប្រវត្តិធ្លាប់ប្រកួតបាន៦១ដង ឈ្នះ៤០ដង ចាញ់១៨ដង និងស្មើ៣ដង មកជួបកីឡាករថៃដែលធ្លាប់ប្រកួតបាន៨១ដង ឈ្នះ៦០ដង ចាញ់១៨ដង និងស្មើ៣ដងនោះមិនទាន់ដឹងថាយ៉ាងណានោះទេ ដោយសារកីឡាករថៃរូបនេះ មិនធ្លាប់មកប្រកួតនៅលើសង្វៀនស្រុកខ្មែរ ទើបគេពិបាកប៉ាន់ស្មានពីលទ្ធផលចុងក្រោយ។ ទោះបីយ៉ាងណា អ្នកនិយមតាមដានការប្រកួតប្រដាល់ភាគច្រើនមិនសូវទុកចិត្តសមត្ថភាពកីឡាករកម្ពុជាប៉ុន្មានទេ ដោយសារ ព្រំ វិ មួយរយៈចុងក្រោយនេះមិនសូវឃើញលេចមុខនៅលើសង្វៀន ម្យ៉ាងកីឡាករថៃភាគច្រើនដែលគេបញ្ជូនមកប្រកួតនៅលើសង្វៀនស្រុកខ្មែរសុទ្ធតែជាជើងខ្លាំងកម្រស្ពាយបរាជ័យត្រឡប់ទៅវិញណាស់ ។
នៅលើសង្វៀនដដែល ក្រៅពីគូអន្តរជាតិក៏មានគូមិត្តភាពដែលជាសមាសភាពកីឡាករខ្លាំងនៅក្នុងស្រុកផងដែរដូចជា កីឡាករ សារឿន ទិត្យ មកពីក្លិបតាព្រហ្មមានជ័យ ប្រកួតជាមួយកីឡាករ ស៊ិន រាជ មកពីក្លិបឃ្លាំងមឿងកីឡា ។ កីឡាករ អ៊ុល បេង មកពីក្លិបអប់រំកាយនិងកីឡាស្រុកអន្លង់វែង ប្រកួតជាមួយកីឡាករ ធន់ ចាន់នី មកពីសមាគមកីឡាប្រដាល់ក្រសួងការពារជាតិ ។ កីឡាករ អេ លីតភក្តី មកពីក្លិបកងអង្គរក្ស ប្រកួតជាមួយកីឡាករ សៅ សេងហុង មកពីក្លិបឃ្លាំងមឿងកីឡា និងកីឡាករ ម៉ាន់ ជុ មកពីក្លិបខ្លារខិនមានរិទ្ធ ប្រកួតជាមួយកីឡាករ សាន ឡាក់ហាយ មកពីក្លិបសុភានូមានជ័យ ៕
ចែករំលែកព័តមាននេះ