រាជធានីភ្នំពេញ ៖ ក្រុមក្មេងទំនើងមួយក្រុមដែលមានគ្នា១០នាក់ បានជិះម៉ូតូ៥គ្រឿង ហើយក៏ត្រូវក្រុមក្មេងទំនើងមួយក្រុមទៀតប្រដាប់ដោយដាវកាំបិតគ្រប់ដៃ ជិះដេញតាមកា.ប់ក្រុមក្មេងទំនើងដែលជិះ៥ម៉ូតូនោះ ធ្វើឲ្យភ័យស្លន់ស្លោរត់ចោលម៉ូតូអស់ បង្កឱ្យមានការភ្ញាក់ផ្អើលកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី០១ ខែតុលា ឆ្នាំ២០២១ នៅចំណុចសួនច្បារវត្តបទុមវតី ផ្លូវសុធារស ស្ថិតក្នុងសង្កាត់ចតុមុខ ខណ្ឌដូនពេញ។
ប្រភពពីប្រជាពលរដ្ឋនៅកន្លែងកើតហេតុបានប្រាប់អោយដឹងថា បច្ចុប្បន្នប្រទេសកម្ពុជា កំពុងជួបនូវវិបត្តិធ្ងន់ធ្ងរ គឺជំងឺកូវីដ១៩ កំពុងរីករាលដាលខ្លាំង មិនថាតែក្នុងភូមិសាស្ត្ររាជធានីភ្នំពេញ ក៏ដូចជាតាមបណ្តាខេត្តនានា ។ ជាមួយគ្នានោះ រដ្ឋបាលរាជធានីភ្នំពេញ ក៏បានដាក់ចេញនូវបំរាមជាច្រើន ក៏ដូចជាហាមឃាត់មិនឲ្យមានប្រជាពលរដ្ឋប្រមូលផ្ដុំគ្នាច្រើនលើសពី១៥នាក់ ដើម្បីទប់ស្កាត់ និងបង្ការការឆ្លងរាលដាលនៃជំងឺកូវីដ១៩ នោះ ។
ប្រជាពលរដ្ឋបន្តថា ប៉ុន្តែងាកមកមើលនៅតាមសួនច្បារវត្តបទុមវតីវិញ ក្រុមក្មេងទំនើងទាំងប្រុសទាំងស្រីបានប្រមូលផ្ដុំគ្នានៅតាមរទេះលក់ទឹកពពាក់ពពូនគ្នាយ៉ាងច្រើនកុះករ ដោយមិនខ្លាចរអាលពីជំងឺកូវីដ១៩នោះទេ និងតែងបង្កហិ.ង្សាវាយតប់គ្នាសឹងតែរាល់យប់ទៀតផង បង្កឱ្យភាពអនាធិបតេយ្យ និង អសន្តិសុខមែនទែន នៅក្នុងសង្កាត់ជ័យជំនះ ខណ្ឌដូនពេញនេះ ។
ប្រជាពលរដ្ឋបន្តទៀតថា ជាក់ស្ដែងនៅយប់កើតហេតុនេះដែរ មានក្រុមក្មេងទំនើងមួយក្រុមជិះម៉ូតូ៥គ្រឿង មានគ្នាជាង១០នាក់ជិះប្រសាចពេញផ្លូវ ហើយក៏មកឈប់ពពាក់ពពូនគ្នានៅសួនច្បារវត្តបទុមវតី សូម្បីតែម៉ាសក៏មិនពាក់ដែរ។
ប្រភពដដែលបានបន្តទៀតថា ខណៈពេលដែលក្រុមក្មេងទំនើងទាំង៥ម៉ូតូនោះ កំពុងឈប់ជជែកគ្នាលេង ក៏លេចចេញក្រុមក្មេងទំនើងមួយក្រុមទៀតមិនស្គាល់អត្តសញ្ញាណ ជិះម៉ូតូច្រើនគ្រឿងមានគ្នាជាច្រើនម្នាក់ ប្រដាប់ដោយដាវ និងកាំបិតប៉័ងតោគ្រប់ដៃ បានមកដេញវាយ និងកា.ប់លើក្រុមយុវជននោះ បណ្តាលឲ្យភ័យស្លន់ស្លោរត់ចោលម៉ូតូអស់តែម្តង ហើយក៏ត្រូវក្រុមជនបង្កបាននាំគ្នាព្រួតវាយ និងកា.ប់ម៉ូតូរបស់ជនរងគ្រោះ បណ្តាលឲ្យបែកកុងទ័រ និងក្បាំងម៉ូតូរងការខូចខាត ចំណែកម្ចាស់ម៉ូតូ និងបក្សពួកមិនមានរងរបួសទេ ។ បន្ទាប់ពីបង្កហេតុរួច ក្រុមជនបង្កបានស្រែកហ៊ោកញ្ជ្រៀវ ដោយយកការវាយតប់គ្នាធ្វើជារឿងសប្បាយ និងបានបន្ថែមល្បឿនម៉ូតូបើករត់គេចខ្លួនបាត់ស្រមោលអស់ ។
ក្រោយពេលកើតហេតុ ក្រុមក្មេងទំនើងរងគ្រោះ មិនបានទៅដាក់ពាក្យបណ្ដឹងនោះទេ និងបានគ្នាជិះចេញទៅបាត់ស្រមោលអស់ដូចគ្នាតែម្តង ៕
ចែករំលែកព័តមាននេះ