ខេត្តព្រៃវែង ៖ រង្វង់មូលផ្លូវឡើងស្ពានអ្នកលឿង ស្ថិតក្នុងភូមិ១ ឃុំព្រែកខ្សាយ(ខ) ស្រុកពាមរក៍ ដែលកាលពីមុនគេសង្កេតឃើញថា មានអាជីវករជាច្រើនបាននាំគ្នា មកលក់ដូរនៅលើចិញ្ចើម ថ្នល់ បណ្តាលឲ្យមានភាពរញ៉េរញ៉ៃ និងឧស្សាហ៍មានការកកស្ទះចរាចរជាញឹកញាប់ ជាពិសេសនៅពេលដែលមានរថយន្តតាក់ស៊ីបើកមកឈប់ទិញនំចំណី ឬឈប់សាងម៉ូយឲ្យគ្នានោះ។ ដើម្បីថែរក្សាសណ្តាប់ធ្នាប់ និងទប់ស្កាត់កុំឲ្យមានការកកស្ទះចរាចរតទៅទៀតនោះ កាលពីវេលាម៉ោង៨ព្រឹក ថ្ងៃទី៣ ខែមិនា លោក ភុន សម្ផស្ស អភិបាលស្រុកស្តីទី បានដឹកនាំកំលាំងសមត្ថកិច្ច ចុះទៅធ្វើការរៀបចំក្រុមអាជីវករ ដែលលក់នៅតាមចិញ្ចើមថ្នល់ទាំងនោះ ឲ្យពួកគាត់នាំគ្នារើតូបនិងឥវ៉ាន់របស់ខ្លួន រំកិលខិតទៅក្រោយវិញប្រវែង ជាង២ម៉ែត្រ និងធ្វើការកំណត់ខ្សែបន្ទាត់អោយពួកគាត់មិនឲ្យមានការលូតទៅមុខតទៅទៀតឡើយ។
លោក ភុន សម្ផស្ស បានឲកយដឹងថា មុនពេលចុះទៅរៀបចំ១ថ្ងៃ លោកបានអោយខាងអាជ្ញាធរឃុំ ចុះទៅជូនដំណឹងដល់ក្រុមអាជីវករទាំងនោះជាមុនរួចទៅហើយ ពួកគាត់ក៏សុខចិត្តរើទៅក្រោយវិញ ដោយគ្មានការជំទាស់អ្វីទេ គឺគ្រាន់តែសំណូមពរមកស្រុកវិញថា បើអោយខិតទៅក្រោយ គឺអោយខិតទាំងអស់គ្នា មិនត្រូវខិតមួយអត់មួយនោះទេវាមិនយុត្តិធម៌ ព្រោះអ្នកនៅខាងក្រោយលក់មិនដាច់ដូចអ្នកខាងមុខទេ។ដោយឡែកប្រជាពលរដ្ឋនៅក្នុងតំបន់ទីប្រជុំជនអ្នកលឿងវិញ បានលើកឡើងថា ការរៀបចំសណ្តាប់ធ្នាប់នេះមិនមែនទើបតែជាលើកទី១នោះទេ គឺវាច្រើនលើកច្រើនសារណាស់ទៅ ហើយ ប៉ុន្តែមិនដែលឃើញបានប្រសើរអ្វីនោះទេ ព្រោះក្រុមអាជីវករទាំងនោះប្រៀបដូចចក អញ្ចឹង ពីព្រឹកកៀរទៅខាង ល្ងាចឡើងមកដល់វិញដដែល។
ហើយការរៀបចំលើកនេះ គេសំណូមពរសុំឲ្យអជ្ញាធរ ទប់ស្កាត់ធ្វើយ៉ាងណាកុំឲ្យអាជីវករទាំងនោះរុលចូលមកលើចិញ្ចើមថ្នល់វិញ ព្រោះរញ៉េរញ៉ៃខ្លាំងណាស់។ ឆ្លើយតបចំពោះការលើកឡើងខាងលើនេះ លោក ភុន សម្ផស្ស បានបញ្ជាក់ថាលោកបាន ធ្វើការអប់រំណែនាំដល់ក្រុមអាជីវករទាំងនោះហើយ និងតម្រូវឲ្យធ្វើកិច្ចសន្យាថែមទៀតផង បើក្នុងករណីមានអាជីវករណាលួចរំកិលចូលមកខាងមុខ ហួសគំនូសដែលអនុញ្ញាត កម្លាំងសមត្ថកិច្ច និងចាប់ប្រមូលយអីវ៉ាន់របស់ពួកគាត់ទៅទុក និងធ្វើការផាកពិន័យតែម្តង ហើយដើម្បីឲ្យការងារនេះមានប្រសិទ្ធិភាព លោកបានចាត់កម្លាំងសមត្ថកិច្ចចាំពិនិត្យមើលហើយ៕
ចែករំលែកព័តមាននេះ