រាជធានីភ្នំពេញ ៖ លោកឧត្តមសេនីយ៍ទោ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីបានឱ្យដឹងថា ដោយមានការដឹកនាំបញ្ជាពីលោកនាយឧត្តមសេនីយ៍ សៅ សុខា
រាជធានីភ្នំពេញ ៖ លោកឧត្តមសេនីយ៍ទោ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីបានឱ្យដឹងថា ដោយមានការដឹកនាំបញ្ជាពីលោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស កងរាជអាវុធហត្ថរាជធានីភ្នំពេញ ដោយមានកម្លាំងមូលដ្ឋានអាវុធហត្ថខណ្ឌឬស្សីកែវ កម្លាំងជំនាញមន្ទីរយុត្តិធម៌ និងកម្លាំងជំនាញការិយាល័យស្រាវជ្រាវប្រឆាំងគ្រឿងញៀន បានសហការគ្នាធ្វើការស៊ើបអង្កេតស្រាវជ្រាវអស់រយៈពេលជាច្រើនខែ ទើបកំណត់មុខសញ្ញាបាន ឈានដល់ការបង្ក្រាបជាក់ស្តែងនូវមុខសញ្ញាជួញដូរគ្រឿងញៀនដ៏ធំមួយ ។
ប្រតិបត្តិការបង្ក្រាបខាងលើនេះធ្វើឡើងកាលពីវេលាម៉ោង១០និង១៥នាទីយប់ថ្ងៃទី២៨ កុម្ភៈ នៅចំណុចចំណតរថយន្តក្រុមហ៊ុនអង្គរអ៊ិចប្រេស្ដ ក្បែរគល់ស្ពានជ្រោយចង្វា ដោយចាប់បានគ្រឿងញៀនប្រភេទម៉ាទឹកកក ឬហៅថា មេតំហ្វេតាមីនអាយស៍ ជាង៣គីឡូក្រាម និង ថ្នាំគ្រាប់WY ឬហៅថា មេតំហ្វេតាមីនគ្រាប់ ចំនួន១៧សុង ព្រមទាំងឃាត់ខ្លួនជនល្មើសម្នាក់ឈ្មោះ ឌី ធូរ៉ា ហៅត្រា ភេទប្រុស អាយុ៣២ឆ្នាំ ខណៈពេលដែលបុរសរូបនោះកំពុងធ្វើសកម្មភាពជួញដូរគ្រឿងញៀនជាក់ស្តែង ។
តាមរយៈចម្លើយសារភាពរបស់ជនល្មើស ដែលឃាត់ខ្លួនបានខាងលើ កម្លាំងជំនាញកងរាជអាវុធហត្ថរាជធានីភ្នំពេញ បានរកឃើញអ្នកជាប់ពាក់ព័ន្ធបាន៥នាក់ផ្សេងទៀត ដែលជាទណ្ឌិតកំពុងអនុវត្តទោសក្នុងពន្ធនាគារ ក្នុងនោះមានជនជាតិខ្មែរ២នាក់ ជនជាតិវៀតណាមម្នាក់ និងជនជាតិស្បែកខ្មៅ២នាក់ ។
លោកឧត្តមសេនីយ៍ទោ រ័ត្ន ស្រ៊ាង បានបញ្ជាក់បន្ថែមថា ជនល្មើសដែលត្រូវឃាត់ខ្លួន ឈ្មោះ ឌី ធូរ៉ា បានធ្វើសកម្មភាពជួញដូរគ្រឿងញៀននេះ គឺក្រោមការចាត់ចែងបញ្ជាផ្ទាល់ចេញពីក្នុងពន្ធនាគារដែលមានជនជាតិវៀតណាមម្នាក់ និងជនជាតិស្បែកខ្មៅ២នាក់ ជាមេខ្លោងធំ ។ រីឯជនជាតិខ្មែរពីរនាក់ទៀតដែលនៅក្នុងគុកដែរនោះ ជាអ្នកទំនាក់ទំនងជាមួយមេខ្លោងធំ បញ្ជាបន្តមកខាងក្រៅ ។
លោកបញ្ជាក់ថា ឈ្មោះ ឌី ធូរ៉ា ដែលនៅខាងក្រៅ គឺចាំទទួលបញ្ជា ពីមេខ្លោងនៅក្នុងគុកឱ្យចាំទទួលថ្នាំញៀនពីមនុស្សផ្សេងទៀត ដែលវាមិនស្គាល់ ក្នុងនោះមានជនជាតិខ្មែរ និងជនជាតិស្បែកខ្មៅ ដែលធ្លាប់បានប្រគល់ថ្នាំញៀនឱ្យទៅអ្នកយកទៅបែងចែកបន្ត នៅពេលមានបញ្ជាពីអ្នកនៅក្នុងគុកតាមរយៈទូរស័ព្ទ ថាត្រូវយកទៅឱ្យអ្នកណា នៅកន្លែងណា ចំនួនប៉ុន្មាន ? ហើយអ្នកដែលមកទទួលយកមិនស្គាល់គ្នាទេ ។
នៅព្រឹកថ្ងៃទី២ មីនា ឆ្នាំ២០១៦កងរាជអាវុធហត្ថរាជធានីភ្នំពេញបានបង្កើតគណៈកម្មការដែលមានការចូលរួមត្រួតពិនិត្យពីព្រះរាជអាជ្ញាលោក ហ៊ឹង ប៊ុនថន និងលោក ឡេង ណាង ជាក្រឡាបញ្ជីដើម្បីធ្វើការរាប់ចំនួន ថ្លឹងនិងធ្វើតេស្តជាលទ្ធផលបង្ហាញឱ្យឃើញថា មានថ្នាំគ្រាប់WYឬមេតំហ្វេតាមីនគ្រាប់ មានចំនួនដប់ម៉ឺន បីពាន់ ប្រាំមួយរយគ្រាប់ និងម៉ាទឹកកក ឬហៅថា មេតំហ្វេតាមីនអាយស៍ ចំនួន៣គីឡូក្រាម១ខាំ ។ តាមរយៈការធ្វើតេស្ត៍ឃើញថា ថ្នាំញៀនទាំងអស់នោះ មានគុណភាពសុទ្ធ១០០ភាគរយ ។ តាមការប៉ាន់ប្រមាណមានតម្លៃជាង១លានដុល្លារនៅកម្ពុជា ។ ប៉ុន្តែបើនៅប្រទេសក្រៅមានតម្លៃគុណនិង៥ដង ។
ជនសង្ស័យនិងវត្ថុតាងដែលបានចាប់នេះ កងរាជអាវុធហត្ថរាជធានីភ្នំពេញ កំពុងកសាងសំណុំរឿងបញ្ជូនទៅតុលាការតាមនីតិវិធី ។ រីឯបក្សពួកជនល្មើសដែលនៅសេសសល់ផ្សេងៗទៀត សមត្ថកិច្ចកំពុងតាមប្រមាញ់ ៕
ចែករំលែកព័តមាននេះ