រាជធានីភ្នំពេញ ៖ នៅព្រឹកថ្ងៃអាទិត្យ ទី៦ ខែមីនា ការប្រកួតប្រដាល់អន្តរជាតិប្រចាំសប្ដាហ៍របស់ទូរទស្សន៍អាស៊ីអាគ្នេយ៍ នឹងចាប់ផ្ដើមទៀតហើយដោយអមជាមួយនឹងការប្រកួតរបស់កីឡាករក្នុងស្រុកជាច្រើនគូផ្សេងទៀត ។ កីឡាករ សេក ចាន់រាជ្យ និងជើងខ្លាំង ទេស សំខាន់ នឹងត្រូវគេឱ្យប៉ះប្រកួតជាមួយកីឡាករថៃព្រមគ្នា ដោយការប្រកួតរបស់ពួកគេក៏មានការចាប់អារម្មណ៍មិនតិចនោះដែរ ។
កីឡាករសេក ចាន់រាជ្យ ដែលអ្នកណាក៏ស្គាល់ថា ជាជើងខ្លាំងទើបនឹងឡើងកូដវ័យក្មេងមកពីក្លិបអង្គរមានជ័យខេត្តសៀមរាបនោះ នឹងត្រូវស្វាគមន៍ជាមួយកីឡាករថៃឈ្មោះមឿង ម៉ៃ ក្នុងប្រភេទទម្ងន់៥៧គីឡូក្រាមក្នុងនាមជាគូអន្តរជាតិបើកឆាក ។ កីឡាករទាំងពីរនឹងឡើងប៉ះគ្នានៅក្នុងព្រឹត្តិការណ៍ប្រដាល់ពេលព្រឹករបស់ស្រាបៀរ Ganzburg ដែលព្រឹត្តិការណ៍នេះ មានការប្រដាល់អន្តរជាតិ២គូរៀងរាល់ព្រឹកថ្ងៃអាទិត្យ ចាប់ពីម៉ោង៨ដល់ម៉ោង១០និង៣០នាទីតទៅ ។ ការប្រកួតរបស់គូនេះ ត្រូវគេកត់សម្គាល់ពីស្នាដៃរបស់ពួកគេរួចទៅហើយ ដោយសារតែកីឡាករសេក ចាន់រាជ្យ បើទោះជាមានប្រវត្តិឡើងរេញមិនទាន់ច្រើនណាស់ណា ប៉ុន្តែថ្វីដៃរបស់គេលោតខ្លាំងមិនខុសពីកីឡាករលំដាប់ជួរមុខផ្សេងទៀតនោះឡើយ ។
ភាគីខាងកម្ពុជា គឺជាកីឡាករដែលមានឈ្មោះបោះសំឡេងនៅលើសង្វៀន ប៉ុន្តែកីឡាករ មឿង ម៉ៃ ក៏ត្រូវគេអះអាងថា មិនណយនោះដែរ ដោយសារតែការប្រកួតនៅលើសង្វៀនទូរទស្សន៍អាស៊ីអាគ្នេយ៍កន្លងមក កម្រិតនៃការវាយលុក និងវាយផ្ដួលគូប្រកួតរបស់គេក៏ធ្វើឱ្យអ្នកស្នេហាកីឡាប្រដាល់នៅកម្ពុជាជាប់ចិត្តទៅហើយ ។
លោកថៃ អ៊ូ អ្នកដឹកនាំកីឡាករថៃឱ្យមកប្រកួតបានបង្ហាញពីភាពជឿជាក់ក្នុងពេលដែលការអះអាងរបស់លោកបានទាញអ្នកគាំទ្រឱ្យទុកចិត្តកីឡាករ មឿង ម៉ៃ ច្រើនដូចគ្នាបើធៀបនឹងសន្ទុះអ្នកទុកចិត្តលើសេក ចាន់រាជ្យ។ ភាពទុកចិត្តលើការអះអាងរបស់លោកថៃ អ៊ូ កើតឡើងក្នុងមួយរយៈចុងក្រោយ ក្នុងពេលដែលកីឡាករថៃមកប្រកួតលើកណាក៏សឹងប្រមូលយកជ័យជម្នះគ្រប់គូគ្រប់កីឡាករពីសង្វៀនទូរទស្សន៍អាស៊ីអាគ្នេយ៍ ។ ផ្អែកតាមលទ្ធផលគឺកីឡាករកម្ពុជាមិនថាអ្នកស្ថិតក្នុងជួរទី១ ឬជួរទី២ទេ ភាគច្រើនតែងត្រូវកីឡាករថៃវាយបំបាក់ឱ្យអ្នកគាំទ្រខកចិត្តនោះផង ទើបធ្វើឱ្យការព្យាកររបស់អ្នកដឹកនាំកីឡាករថៃឱ្យមកប្រកួតរូបនេះមានឥទ្ធិពល ។ មានការយល់ឃើញថា កីឡាករថៃមឿងម៉ៃ អាចនឹងធ្វើឱ្យកីឡាករកម្ពុជាពិបាកបំបាក់ ដោយសារតែកីឡាករកម្ពុជាសេក ចាន់រាជ្យ ក៏មិនទាន់ឈានដល់ចំណុចដែលធ្វើឱ្យអ្នកគាំទ្រទុកចិត្តនៅគ្រប់ការប្រកួតរបស់គេនៅឡើយ ។
លោកថៃ អ៊ូ បានអះអាងថា កីឡាករ មឿង ម៉ៃ នឹងឈ្នះសម្រាប់ការប្រកួតនេះ បើទោះជាភាគីខាងកម្ពុជាគឺមិនមែនធម្មតាក្ដី ។ ប៉ុន្តែលោកក៏បានបង្ហាញការព្យាករចំពោះកីឡាករកម្ពុជាថា នឹងមានសំណាងផងដែរបើគេអាចចាប់ជាប់ចំណុចខ្សោយរបស់កីឡាករថៃ ហើយវាយបកបានល្អមកវិញ ។ លោកថា កីឡាកររបស់ខ្លួនធ្លាប់ប្រកួតទើបតែ៦៨ដង ឈ្នះ៥៥ដង ចាញ់៨ដង និងស្មើ៥ដងប៉ុណ្ណោះ ប៉ុន្តែការប្រកួតប៉ុន្មានលើកចុងក្រោយរបស់គេគឺធ្វើឱ្យលោកជឿជាក់សម្រាប់ការប៉ះកណ្ដាប់ដៃជាមួយសេក ចាន់រាជ្យ ។
យ៉ាងណាក៏ដោយអ្នកព្យាករចំពោះកីឡាករកម្ពុជា ក៏មានការរំពឹង និងមិនជឿតាមការប្រកាសកម្លារបស់លោកថៃ អ៊ូនោះដែរ ដោយសារសំអាងថា កីឡាករកម្ពុជារូបនេះ ក៏កំពុងឡើងកូដគួរឱ្យសរសើរផងដែរ ។ សេក ចាន់រាជ្យ ឆ្លងកាត់ការប្រកួតបានតិចជាងកីឡាករថៃក៏ពិតមែន ប៉ុន្តែសមត្ថភាពប្រើកែង និងទាត់ឆ្វេងស្ដាំរបស់គេអាចប្រើការបាន។ យោងតាមទិន្នន័យកីឡាកររូបនេះទើបតែប្រកួតបាន៤៥លើក ឈ្នះ៣៧លើក ចាញ់៥លើក និងស្មើ៣លើក។
នៅលើសង្វៀននេះដែរ កីឡាករទេស សំខាន់ មកពីក្លិបកងពលតូចលេខ៧០ ក៏នឹងត្រូវប៉ះប្រកួតជាមួយកីឡាករថៃឈ្មោះរិទ្ធី ឆៃ ក្នុងនាមជាគូអន្តរជាតិទី២និងជាគូឯកនៅលើសង្វៀនផងដែរ ។ កីឡាករថៃរូបនេះ ធ្លាប់មានប្រវត្តិឡើងប្រកួតជាមួយកីឡាកកម្ពុជា និងបរទេសផ្សេងទៀតច្រើនលើកមកហើយ ដោយលទ្ធផលដែលបានស្ដែងឡើងក៏បង្ហាញថា គេជាជើងខ្លាំងមួយរូបផងដែរ ។ សមត្ថភាពរបស់គេ ត្រូវគេមើលឃើញថាពិបាកឲ្យកីឡាករកម្ពុជាទេស សំខាន់ មោទនភាព ប៉ុន្តែបើកម្ពុជាអាចដណ្ដើមបានជ័យជម្នះវិញ ក៏នឹងធ្វើឱ្យកេរ្តិ៍ឈ្មោះរបស់កីឡាករកម្ពុជារូបនេះស្ទុះឡើងកូដផងដែរ ។
អ្នកទស្សនាភាគច្រើនបានយល់ឃើញថា កីឡាករថៃ រិទ្ធី ឆៃ ខ្លាំង ប៉ុន្តែកីឡាករទេស សំខាន់ ក៏ខ្លាំងមិនធម្មតាដែរដែលអ្នកទាំងពីរគឺទោះជាអ្នកណាបានឈ្នះក៏នឹងមានលទ្ធផលទ្រមខ្លួន ។ កីឡាករថៃ ធ្លាប់ប្រកួតបាន៧០លើក ឈ្នះ៥៨លើក ចាញ់១១លើក និងស្មើ១លើក ក្នុងពេលដែលកីឡាករទេស សំខាន់ ធ្លាប់ប្រកួតបាន៧៥លើក ឈ្នះ៦២លើក ចាញ់១០លើក និងស្មើ៣លើកនៅលើសង្វៀនដែលមានន័យថាអ្នកទាំងពីរគឺមានប្រវត្តិឡើងរេញមិនស៊ីមិនសងគ្នា ។ លោកញាណ សុធី អ្នករៀបចំការប្រកួតបានអះអាងថា ការប្រកួតគូនេះនឹងអាចធ្វើឲ្យកក្រើកព្រឹត្តិការណ៍ ប៉ុន្តែសម្រាប់ការទាយជាមុនថាអ្នកណានឹងឈ្នះការប្រកួតនោះ ក៏លោកមិនហ៊ានថា ដោយសារពួកគេមើលទៅមានកម្លាំង និងបច្ចេកទេសប៉ុនគ្នា ។
នៅសង្វៀនទូរទស្សន៍អាស៊ីអាគ្នេយ៍ និងប៉ុស្ដិ៍លេខ៥ នៅថ្ងៃសៅរ៍ស្អែកវិញ ក៏មានការប្រកួតរវាងកីឡាករជាតិ និងកីឡាករជាតិល្អកំដរភ្នែកអ្នកស្នេហាការប្រដាល់ផងដែរ ដោយព្រឹត្តិការណ៍ប្រដាល់របស់ទូរទស្សន៍អាស៊ីអាគ្នេយ៍នឹងចាប់ផ្ដើមបើកឆាកការប្រកួតវិលជុំសន្សំពិន្ទុរបស់ព្រឹត្តិការណ៍ K-Cement ចាប់ពីម៉ោង២រសៀលតទៅ និងនៅប៉ុស្ដិ៍លេខ៥ ក៏មានការប្រកួតមិត្តភាពរវាងគូល្អនៅសង្វៀនជ្រោយចង្វាចាប់ពីម៉ោង៥ល្ងាចតទៅដូចគ្នា៕
ចែករំលែកព័តមាននេះ