រាជធានីភ្នំពេញ ៖ បើទោះបីជាប្រមុខរាជរដ្ឋាភិបាលបានខិតខំចាក់ស្រោចវ៉ាក់សាំងបង្ការកូវីដ-១៩ យ៉ាងជោគជាំយ៉ាងណាក្តី តែដោយសារតែការធ្វេសប្រហែសរបស់បុគ្គលមួយចំនួនមិនបានអនុវត្តនូវវិធានការ ៣កុំ ៣ការពារ ឱ្យបានត្រឹមត្រូវនោះ បានធ្វើឱ្យការឆ្លងកូវីដ-១៩ ប្រចាំថ្ងៃនៅកម្ពុជាបានហក់ឡើងខ្ពស់ ក្នុងរយៈពេល ៧ ថ្ងៃចុងក្រោយនេះ ដែលអត្រាឆ្លងមានកម្រិតពី ៨០០ ទៅ ៩០០ នាក់ក្នុងមួយថ្ងៃ ។
ជាក់ស្តែងនៅថ្ងៃនេះ ក្រសួងសុខាភិបាលបានប្រកាសឱ្យដឹងអំពីការរកឃើញករណីឆ្លងកូវីដ-១៩ កាលពីថ្ងៃម្សិលមិញ មានចំនួនហក់ឡើងដល់ទៅ ៩៧៨ នាក់ ដែលជាអត្រាឆ្លងខ្ពស់បំផុតក្នុងថ្ងៃ (ក្នុងនោះភាគច្រើនលើសលប់ជាករណីឆ្លងក្នុងសហគមន៍ ខណៈករណីនាំចូលកម្ពុជាមានត្រឹមតែ ៨១នាក់) ករណីជាសះស្បើយចំនួន ៦០៥នាក់ និងស្លាប់ថ្មីចំនួន ១៧នាក់ បន្ថែមទៀត ។
ដូច្នេះគិតចាប់ពីថ្ងៃទី ២៣ ដល់ថ្ងៃទី ២៩ ខែកញ្ញា ដែលជាពេលអត្រាឆ្លងប្រចាំថ្ងៃបានហក់ខ្ពស់រយៈពេល ៧ ថ្ងៃជាប់ៗគ្នា គឺមានការឆ្លងសរុបដល់ទៅ ៦០៣២នាក់ (ករណីនាំចូល ៦៥៦នាក់) ជាសះស្បើយ ៣៦៩៣នាក់ និងស្លាប់សរុបដល់ទៅ ១៤៣នាក់ ដែលក្នុងនោះដែរក៏មានករណីរកឃើញ វិជ្ជមាន វីរុសកូវីដ១៩ បំប្លែងថ្មី ប្រភេទ Delta ផងដែរ ។ ជាងនេះទៅទៀត ការឆ្លងមានការកើនឡើងពេញមួយសប្តាហ៍នេះ ក៏រកឃើញមានព្រះសង្ឃ គណៈកម្មការវត្ត សិស្សនិស្សិតស្នាក់នៅវត្ត និងយាយជីតាជី ជាង ១៤០នាក់នៅវត្តរាជធានីភ្នំពេញវិជ្ជមានកូវីដ-១៩ ផងដែរ រហូតឈានដល់ការផ្អាកពិធីកាន់បិណ្ឌ និងបុណ្យភ្ជុំបិណ្ឌផងដែរ ។
សូមបញ្ជាក់ថា កម្ពុជា រកឃើញករណីកូវីដ-១៩ ដំបូងបង្អស់កាលពីថ្ងៃទី ២៧ ខែមករា ឆ្នាំ២០២០ លើបុរសជនជាតិចិន នៅខេត្តព្រះសីហនុ ។គិតមកដល់បច្ចុប្បន្ន អ្នកឆ្លងកូវីដ-១៩ សរុបនៅកម្ពុជាបានឡើងដល់ ១១២ ៦៥១នាក់ អ្នកជាសះស្បើយសរុប ១០២ ៨២៧នាក់ និង អ្នកស្លាប់សរុប ២៣១៩នាក់ ។
យ៉ាងណាមិញ ជាមួយនឹងការរកឃើញការឆ្លងប្រចាំថ្ងៃមានចំនួនកើនឡើងខ្ពស់ជាប់ៗគ្នាពេញមួយសប្តាហ៍ ក៏មានការរៀបចំត្រៀមបើកដំណើរការ មណ្ឌលព្យាបាលជំងឺកូវីដ-១៩ កម្រិតស្រាលកោះពេជ្រ ឡើងវិញ ផងដែរ ។ នេះបើតាមការបញ្ជាក់របស់លោកវេជ្ជបណ្ឌិត នៅ គីមសាន នៅមន្ទីរពេទ្យព្រះកុសុមៈ បានអោយដឹងនៅលើគណនីហ្វេសប៊ុករបស់លោក នៅថ្ងៃទី២៩ ខែកញ្ញា ឆ្នាំ២០២១នេះ ។
សូមជម្រាបថា ចាប់តាំងពីផ្ទុះព្រឹត្តិការណ៍ ឆ្លងក្នុងសហគមន៍ ២០កុម្ភៈ ក្នុងប្រទេសកម្ពុជាមក អាជ្ញាធររាជធានីភ្នំពេញ បានយកសម្រេចយកទីតាំងធំៗមួយចំនួន សម្រាប់ព្យាបាលអ្នកជំងឺកូវីដ-១៩ រួមមាន ៖ សណ្ឋាគារ Great Duke, មន្ទីរពេទ្យហ្លួងម៉ែ, ដឹព្រីមៀរសែនសុខ, សាលមង្គលការកោះពេជ្រ, ស្តាតអូរឡាំពិក និងសាលារៀនមួយចំនួន ។ កន្លងមក ក្រសួងសុខាភិបាល ក៏បានអនុញ្ញាតឲ្យមន្ទីរពេទ្យឯកជន ស្របច្បាប់ក្នុងរាជធានីភ្នំពេញ ទទួលពិនិត្យ ថែទាំ និងព្យាបាលអ្នកជំងឺកូវីដ-១៩បាន ។ ហើយអ្នកជំងឺកូវីដ-១៩ កម្រិតស្រាលក៏អាចព្យាបាលដោយខ្លួនឯង នៅតាមផ្ទះ ផងដែរ ។ សូមបងប្អូនប្រជាពលរដ្ឋទាំងអស់ ចូលរួមអនុវត្តវិធានការ ៣ការពារ និង៣កុំ ឲ្យបានខ្ជាប់ខ្ជួន ៕
ចែករំលែកព័តមាននេះ