រាជធានីភ្នំពេញ ៖ កម្ពុជាចាត់ទុកវិស័យទេសចរណ៍ ជាវិស័យអាទិភាពមួយក្នុងចំណោមវិស័យជាសសរស្ដមទ្រទ្រង់កំណើនសេដ្ឋកិច្ចជាតិ ដោយហេតុថា វិស័យនេះផ្ដល់កាលានុវត្តភាព ការងារបន្ថែម និងរួមចំណែកដល់ការលើកកម្ពស់
រាជធានីភ្នំពេញ ៖ កម្ពុជាចាត់ទុកវិស័យទេសចរណ៍ ជាវិស័យអាទិភាពមួយក្នុងចំណោមវិស័យជាសសរស្ដមទ្រទ្រង់កំណើនសេដ្ឋកិច្ចជាតិ ដោយហេតុថា វិស័យនេះផ្ដល់កាលានុវត្តភាព ការងារបន្ថែម និងរួមចំណែកដល់ការលើកកម្ពស់កម្រិតជីវភាពរបស់ប្រជាជន និងកាត់បន្ថយភាពក្រីក្រ តាមរយៈការបង្កើនប្រាក់ចំណូល និងទាក់ទាញការវិនិយោគពីបរទេស ។
ថ្លែងក្នុងពិធីបិទវេទិកាជាតិ «យុវជន និងទីក្រុងស្អាត» លើកទី១ និងពិធីអបអរសាទរទិវាជាតិ «ទីក្រុងស្អាត» លើកទី៤ ក្រោមប្រធានបទ «ទីក្រុងខ្ញុំស្អាត សុខសុវត្ថិភាពល្អ ទេសចរណ៍មានកំណើន» លោកឧបនាយករដ្ឋមន្ត្រី បណ្ឌិតសភាចារ្យ សុខ អាន បានមានប្រសាសន៍ថា ៖«តាមរយៈការដាក់ចេញនូវយុទ្ធនាការផ្សព្វផ្សាយនានា សំដៅលើកកម្ពស់កិត្យានុភាពរបស់កម្ពុជា ជាគោលដៅទេសចរណ៍ដែលមានឧត្តមភាពប្រកួតប្រជែងខ្ពស់ទាំងនៅក្នុងតំបន់ និងសកលលោក ប្រកបដោយភាពទាក់ទាញ និងភាពកក់ក្តៅដល់ភ្ញៀវទេសចរ នៅឆ្នាំ២០១៥ កម្ពុជាទទួលបានទេសចរអន្តរជាតិចំនួនជាង៤លាន៧សែននាក់ ក្នុងអត្រាកំណើនប្រមាណជាង៦,១% បើធៀបនឹងឆ្នាំ២០១៤ ដោយបាននាំមកនូវប្រាក់ចំណូលប្រមាណជាង៣ប៊ីលានដុល្លារអាមេរិក» ។
ទន្ទឹមនឹងនេះ បើយោងតាមរបាយការណ៍លោករដ្ឋមន្ត្រីក្រសួងទេសចរណ៍ កម្ពុជារំពឹងថានឹងទទួលបានភ្ញៀវទេសចរប្រមាណជាង៧លាននាក់នៅឆ្នាំ២០២០ ដែលអាចផ្ដល់ប្រាក់ចំណូលប្រមាណ៥ប៊ីលានដុល្លារ និងបង្កើតឱកាសការងារបានប្រមាណ១លាននាក់ ។
ដើម្បីសម្រេចបាននូវគោលដៅនេះ បច្ចុប្បន្នប្រមុខរាជរដ្ឋាភិបាល ពិសេសក្រសួង ស្ថាប័នពាក់ព័ន្ធ បាននិងកំពុងខិតខំប្រឹងប្រែងក្នុងការអភិវឌ្ឍវិស័យមួយនេះ ដោយបណ្ដុះនូវផ្នត់គំនិត និងចលនាឲ្យប្រជាជន ពិសេសយុវជនកម្ពុជា រួមគ្នាលើកកម្ពស់ និងថែរក្សាទីក្រុងឱ្យស្អាត និងបៃតង ដើម្បីទាក់ទាញភ្ញៀវទេសចរ តាមរយៈយុទ្ធនាការផ្សព្វផ្សាយ និងរៀបចំវេទិកាផ្សេងៗ ។
ជាក់ស្ដែង ក្រសួងទេសចរណ៍ គណៈកម្មាធិការជាតិវាយតម្លៃទីក្រុងស្អាត ក្រសួងបរិស្ថាន សហភាពសហព័ន្ធយុវជនកម្ពុជា អង្គភាព ស្ថាប័នពាក់ព័ន្ធទាំងអស់ បានសហការរៀបចំវេទិកាជាតិ «យុវជន និងទីក្រុងស្អាត» លើកទី១ និងពិធីអបអរសាទរទិវាជាតិ «ទីក្រុងស្អាត» លើកទី៤ នេះឡើង ដែលជាវេទិកាមានសារសំខាន់មួយក្នុងការជំរុញចលនាទីក្រុងស្អាត ហើយផ្ដល់ឱកាសឱ្យយុវជនចូលរួមសកម្មភាពនេះកាន់តែសកម្មថែមទៀត ក្នុងការរួមចំណែកដល់ការថែរក្សាបរិស្ថាន និងទីក្រុងស្អាត ដែលជាកិច្ចការត្រូវបានប្រទេសនានាលើពិភពលោកយកចិត្តទុកដាក់ខ្ពស់ សំដៅលើកកម្ពស់សុខុមាលភាពរបស់ប្រជាពលរដ្ឋផង និងជាគោលដៅទេសចរណ៍ដ៏ទាក់ទាញផង ។
យោងតាមការលើកឡើងរបស់លោកថោង ខុន រដ្ឋមន្ត្រីក្រសួងទេសចរណ៍ ដែលបានថ្លែងក្នុងវេទិកាជាតិ «យុវជន និងទីក្រុងស្អាត» លើកទី១ ក្រោមប្រធានបទ«រួមគិត រួមធ្វើ រួមទទួលខុសត្រូវ» ថា តាមការសិក្សារបស់អង្គការទេសចរណ៍ពិភពលោក (UNWTO) ចំនួនទេសចរយុវជនកើនឡើងដល់ប្រមាណ២២៧លាននាក់នៅឆ្នាំ២០១៤ស្មើនឹង២០%នៃចំនួនទេសចរសរុបនៅលើពិភពលោក ដោយបានបង្កើតនូវចំណូលប្រមាណជិត២៥០ពាន់លានដុល្លារ ចាក់បញ្ចូលក្នុងចរន្តសេដ្ឋកិច្ចសាកលលោក ។ តាមការព្យាករចំនួនទេសចរយុវជននឹងកើនឡើងដល់ប្រមាណ៣០០លាននាក់ នៅឆ្នាំ២០២០ ។
លោករដ្ឋមន្ត្រីបានបញ្ជាក់ថា៖ « បច្ចុប្បន្នយុវជនបាននិងកំពុងក្លាយជាកម្លាំងចលករមួយដ៏សំខាន់ទ្រទ្រង់ការអភិវឌ្ឍ និងរីកចម្រើនវិស័យទេសចរណ៍សកលលោក និងទ្រទ្រង់កំណើនសេដ្ឋកិច្ចសកលលោក និងក៏ជាកាលានុវត្តភាពបញ្ជាក់ថា ទេសចរយុវជនពិតជាទីផ្សារដ៏មានសក្តានុពលនាពេលអនាគតសម្រាប់វិស័យទេសចរណ៍កម្ពុជា ក៏ដូចជាចូលរួមទ្រទ្រង់កំណើនសេដ្ឋកិច្ចកម្ពុជា ។
ចំណុចដែលទេសចរយុវជនជាកម្លាំងចលករដ៏សំខាន់នោះ ក៏ព្រោះតែទេសចរយុវជនបានបង្កើតឡើងនូវតម្លៃ និងចំណូលធំធេងសម្រាប់វិស័យទេសចរណ៍ ព្រោះថាយុវជនគឺជាវ័យមួយដែលយើងទទួលស្គាល់ថា មានចំណូលតិចតួច ប៉ុន្តែមានពេលវេលាច្រើន ដែលជាកត្តាអំណោយផលជំរុញឲ្យពួកគេស្នាក់នៅគោលដៅទេសចរណ៍មួយយូរជាងទេសចរធម្មតា ។ ទន្ទឹមនឹងនោះទេសចរណ៍យុវជនជាទីផ្សារធន់នឹងការធ្លាក់ចុះទោះបីស្ថិតក្នុងកាលៈទេសៈវិបត្តិសេដ្ឋកិច្ច ឬវិបត្តិនយោបាយក៏ដោយចុះ ក្នុងពេលដែលទេសចរយុវជនផ្តល់ផលប្រយោជន៍ដោយផ្ទាល់ដល់សហគមន៍មូលដ្ឋាន និងអាចចាត់ទុកថា ទេសចរណ៍យុវជនជាដែកឆក់ស្រូបទាញយកទីផ្សារទេសចរណ៍ថ្មីៗ ៕
ចែករំលែកព័តមាននេះ