រាជធានីភ្នំពេញ៖ នៅពេលនេះសាលារាជធានីភ្នំពេញកំពុងដំណើរការស្តារប្រឡាយលូ៥ និងប្រឡាយភូមិម័លដែលជាប្រឡាយសំខាន់ក្នុងការដោះទឹកចេញពីភូមិសាស្ត្រខណ្ឌ៣ គឺខណ្ឌមានជ័យ ខណ្ឌដង្កោ និងខណ្ឌសែនសុខ។ ប្រឡាយខាងលើនេះបច្ចុប្បន្នមានសភាពគោករាក់ និងរួមតូចដោយសារកត្តាធម្ម ជាតិ និងការរំលោភបំពានរបស់ជនឳកាសនិយមមួយចំនួនធ្វើឲ្យប៉ះពាល់ដល់ចរន្តទឹកមិន អាចហូរបាន និងធ្វើឲ្យប៉ះពាល់ដល់បរិស្ថានធ្ងន់ធ្ងរនៅតំបន់នេះ។
លោក វ៉ា មុនីសម្បត្តិ តំណាងក្រុមហ៊ុនBBEដែលជាក្រុមហ៊ុនទទួលម៉ៅការស្តារប្រឡាយនេះបានឲ្យដឹងថា ការស្តារប្រឡាយលូ៥ និងប្រឡាយភូមិម័ល បានចាប់ដំណើរការតាំងពីថ្ងៃទី២ខែធ្នូ ឆ្នាំ២០១៥ គិតមកដល់ពេលនេះយើងសម្រេចស្តារបានប្រវែង៣០៤២ម៉ែត្រ លើប្រវែងសរុប៣៦៥០ម៉ែត្រ ពោលគឹនៅសល់តែ៦០៨ម៉ែត្រទៀតប៉ុណ្ណោះត្រូវបញ្ចប់ ។
លោកបន្តថា ប្រឡាយនេះត្រូវស្តារមានទទឹងពី១០ទៅ២០ម៉ែត្រ លើគម្រោងរបស់សាលារាជធានីភ្នំពេញមានទទឹង៥០ម៉ែត្រ តែយើងជូបការលំបាកដោយសារប៉ះលើលំនៅដ្ឋានប្រជាពលរដ្ឋ ទីតាំងរោងចក្រ សហគ្រាសផ្សេងៗ និងមានការលំបាកក្នុងការចល័តគ្រឿងចក្រចុះស្តារ ។
តំណាងក្រុមហ៊ុនបានអះអាងថា ក្រុមហ៊ុនរបស់លោកនឹងជម្រុញការស្តារ ប្រឡាយមេទាំងពីរនេះឲ្យរួចរាល់នៅមុនបុណ្យចូលឆ្នាំថ្មីប្រពៃណី ជាតិខាងមុខស្របតាមផែនការយុទ្ធសាស្ត្ររំដោះទឹកចេញពីទីក្រុង។ បន្ទាប់ពីស្តាររួចសុំអោយអាជ្ញាធរដែនដី និងប្រជាពលរដ្ឋកុំយកសំរាម ឬកាកសំណល់ផ្សេងៗទៅបោះចូលក្នុងប្រឡាយ និងបញ្ឈប់ការរំលោភបំពានយកប្រឡាយធ្វើជាប្រយោជន៍ឯកជនតទៅទៀត៕
ចែករំលែកព័តមាននេះ