ប្រទេសកម្ពុជា កំពុងតែមានការរីកចម្រើនសេដ្ឋកិច្ចក្នុងរង្វង់៧ភាគរយនៅក្នុងមួយឆ្នាំ ។ ជីវភាពរបស់ប្រជាជន ក៏មានការប្រសើរឡើង តាមកំណើនសេដ្ឋកិច្ច ។ ប៉ុន្តែទោះបីជាយ៉ាងណាក៏ដោយចុះ ប្រជាជននឹងអាចទទួលផលប្រយោជន៍បានច្រើនជាងនេះទៅទៀត នៅពេលដែលមានការយកចិត្តទុកដាក់ដល់ការពង្រីកមុខរបរតូចៗ ជូនដល់ប្រជាជនក្រីក្រ ដើម្បីឱ្យពួកគេអាចទទួលផលប្រយោជន៍កាន់តែច្រើនពីកំណើនសេដ្ឋកិច្ចរបស់ប្រទេស ។
ការពង្រីកមុខរបរតូចៗ សម្រាប់ប្រជាជននឹងមិនត្រឹមតែបង្កើតការងារបានច្រើនទេ វាថែមទាំងអាចកាត់បន្ថយការចំណាយប្រចាំថ្ងៃរបស់ប្រជាជនទូទៅ ព្រមទាំងសម្រាប់ភ្ញៀវទេសចរបរទេសផងដែរ ។ ការពង្រីក និងបង្កើតមុខរបរផ្នែកចំណីអាហារ គឺជាឧទាហរណ៍ដ៏ល្អមួយ ដែលនឹងជួយច្រើនដល់ប្រជាជនកម្ពុជាទាំងអស់ ។
មនុស្សនៅទីក្រុងភ្នំពេញជាច្រើន បាននាំគ្នាត្អូញត្អែរអំពីការចំណាយខ្ពស់ សម្រាប់ការរស់នៅប្រចាំថ្ងៃ ។ ឧទាហរណ៍ ដូចជាការចំណាយទៅលើអាហារពេលព្រឹកតែមួយមុខ គឺអាចចំណាយយ៉ាងតិចពីរដុល្លារ ទៅប្រាំដុល្លារ ដើម្បីបានអាហារ ដែលសមរម្យ និងមានគុណភាពសម្រាប់សុខភាពនៅតាមហាងក្នុងទីក្រុងភ្នំពេញ ។
ដូច្នេះ ការបង្រៀនប្រជាជនឱ្យយល់ច្បាស់លាស់អំពីរបៀបធ្វើម្ហូមអាហារ ដែលមានអនាម័យសម្រាប់លក់តាមដងផ្លូវនៅជិតកន្លែងធ្វើការនានា នឹងអាចបង្កើតមុខរបរផ្នែកម្ហូបអាហារជាច្រើន ដល់ប្រជាជនកម្ពុជា និងអាចជួយកាត់បន្ថយការចំណាយទៅលើផ្នែកម្ហូបអាហារសម្រាប់ប្រជាជនកម្ពុជាទាំងអស់ ។
មនុស្សជាច្រើន ដែលមានលទ្ធភាពមិនហ៊ានទទួលទានម្ហូបអាហារតាមដងផ្លូវឡើយ ទោះបីជាអាហារទាំងនោះ មានតម្លៃថោកក្តី។ ដូច្នេះ វាចាំបាច់ណាស់ដែលថា រដ្ឋាភិបាលគួរយកចិត្តទុកដាក់ដល់ការបណ្តុះបណ្តាល ការធ្វើម្ហូបអាហារប្រកបដោយអនាម័យ
នេះ ។ ការបណ្តុះបណ្តាលបែបនេះ វានឹងមិនត្រឹមតែបង្ហាត់បង្រៀនប្រជាជនឱ្យចេះបង្កើតមុខរបរតូចៗ ដើម្បីចិញ្ចឹមជីវិតទេ វាថែមទាំងជួយកាត់បន្ថយការចំណាយរបស់ប្រជាជនកម្ពុជា ទៅលើម្ហូបអាហារ និងបញ្ហាសុខភាពដែលកើតចេញពីការបរិភោគអាហារដែលមានឆ្លងមេរោគផងដែរ ។
នៅក្នុងចក្ខុវិស័យដែលទូលាយជាងនេះ ការបង្កើតមុខរបរតូចៗឱ្យបានច្រើននឹងជួយដល់ការកាត់បន្ថយអត្រាអត់ការងារធ្វើ ហើយនឹងកាត់បន្ថយបញ្ហាសង្គមនានា ដូចជាអំពើប្លន់ លួច ឬក៏ជួញដូរគ្រឿងញៀនជាដើម ។
ដូច្នេះ ការបង្កើតមុខរបរតូចៗតាមរយ:ការផ្តល់ការបណ្តុះបណ្តាលផ្នែកមុខរបរនេះ នឹងជួយច្រើនដល់ប្រជាជន និងប្រទេសជាតិទាំងមូល ។
តើអ្នកអានកោះសន្តិភាពគិតយ៉ាងណាដែរ អំពីគំនិតនេះ? សូមចុច share ដល់មិត្តរបស់អ្នក បើសិនជាអ្នកយល់ថា អត្ថបទនេះមានប្រយោជន៍សម្រាប់ទាំងអស់គ្នា ។
ចែករំលែកព័តមាននេះ