រាជធានីភ្នំពេញ ៖ នៅវេលាយប់ខានស្អែកការប្រកួតប្រដាល់អន្តរជាតិនៅក្នុងព្រឹត្តិការណ៍ប្រដាល់ទេសចរណ៍ជើងទី៣របស់ស្ថានីយទូរទស្សន៍អាស៊ីអាគ្នេយ៍ប្រចាំឆ្នាំ២០១៦ នឹងចាប់ផ្ដើមធ្វើនៅខេត្តកំពង់ចាមវិញម្ដង ។ កីឡាករកម្ពុជា៣រូបគឺ បឺត ខាំ, ម៉ឺន សុភា និងមាស ច័ន្ទមាន ដែលសុទ្ធតែជាកីឡាករល្អៗ នឹងត្រូវប៉ះប្រកួតជាមួយកីឡាករថៃដែលមានសមត្ថភាពមិនណយដែរនោះពិតជាធ្វើឱ្យកក្រើកសង្វៀនខ្លាំងជាងវត្តមានរបស់គូអន្តរជាតិកាលពីមុនទៅទៀត ។
កីឡាករបឺត ខាំ ជើងខ្លាំងមកពីក្លិបសាលវ័ន្តកីឡា នឹងត្រូវគេឱ្យស្វាគមន៍ជាមួយកីឡាករថៃឈ្មោះ ណាំ ឈោក ក្នុងនាមជាគូអន្តរជាតិទី១ ។ កីឡាករទាំងពីរនឹងឡើងប៉ះគ្នានៅក្នុងព្រឹត្តិការណ៍ប្រដាល់មួយនេះ នៅលើទឹកដីខេត្តកំពង់ចាមចាប់ពីម៉ោង៨យប់រហូតដល់ម៉ោង១០យប់ ថ្ងៃសុក្រ ទី៤ មីនា ខានស្អែក ។ ការប្រកួតរបស់គូនេះ ត្រូវគេកត់សម្គាល់ថា បានទទួលការតាមដានខ្ពស់ណាស់ពីក្រុមអ្នកគាំទ្រ ដោយសារតែកីឡាករថៃត្រូវគេអះអាងថា ជាជើងខ្លាំងប្រចាំប្រទេសថៃ ហើយកីឡាករកម្ពុជាមានការទទួលស្គាល់យូរមកហើយថាមិនណយ ចាប់តាំងពីបានត្រឡប់មកកាន់សង្វៀនប្រដាល់វិញ ។ អ្នកដឹកនាំកីឡាករថៃឱ្យមកប្រកួតបានអះអាងថា នៅក្នុងប្រទេសថៃកីឡាករ ណាំ ឈោក ធ្លាប់ផ្ដួលកីឡាករល្អនៅលើសង្វៀនច្រើនណាស់ ដោយកេរ្តិ៍ឈ្មោះរបស់គេក៏ត្រូវស្ថានីយទូរទស្សន៍នៅក្នុងទីក្រុងបាងកក ផ្ដល់រហស្សនាមថា ជាកីឡាករដែលមានប្រជាប្រិយភាពព្រោះតែការឡើងប្រកួតកម្រផ្ដល់ឱកាសឱ្យដៃគូគេចផុតពីការបរាជ័យ។ ការប្រកួតរបស់គេជាមួយបឺត ខាំ យប់ខានស្អែក មានអ្នកស្នេហាប្រដាល់មិនតិចនោះទេ រង់ចាំឃ្លាំមើល និងចង់ដឹងថា អ្នកណាឈ្នះ អ្នកណាចាញ់ក្រោយបញ្ចប់ការប្រកួត ។
យ៉ាងណាក៏ដោយមានការប៉ាន់ស្មានថា កីឡាករថៃទំនងមិនអាចវាយឈ្នះជើងខ្លាំងរបស់កម្ពុជាបានទេ ដោយសារបឺត ខាំ ក្រៅពីជាកីឡាករលំដាប់ជួរមុខសម្រាប់ប្រភេទទម្ងន់៦៩គីឡូក្រាម គាត់ក៏ជាគ្រូបង្វឹកដែលមានស្នាដៃម្នាក់ដែរ ។ កីឡាករ ណាំ ឈោក ធ្លាប់ប្រកួតបាន៩៩លើក ឈ្នះ៧៩លើក ចាញ់១៦លើក និងស្មើ៤លើក ដោយការប្រកួតរបស់គេកន្លងមក គឺគេល្អត្រង់ម៉ាត់ និងទាត់ឆ្វេងស្ដាំ។ ភាគីអ្នកគាំទ្រនៅតែទុកចិត្តលើកីឡាករកម្ពុជាដោយសារតែជើងខ្លាំងរូបនេះ ទាំងកម្លាំងស៊ុហ្វ និងបច្ចេកទេសគឺល្អរស់រវើកទាំងព្រម ។ សំអាងលើប្រវត្តិធ្លាប់ប្រកួតបានដល់២៦៤លើក ឈ្នះ២៥១លើក ចាញ់១១លើក និងស្មើ២លើក អ្នកគាំទ្រនៅតែជឿជាក់ច្រើនថាកីឡាករបឺត ខាំ នឹងស្ពាយជ័យជម្នះពីកំពង់ចាមត្រឡប់មកភ្នំពេញវិញមិនខាន ។
កីឡាករម៉ឺន សុភា មកពីសមាគមកីឡាប្រដាល់ក្រសួងការពារជាតិ នឹងត្រូវប៉ះប្រកួតជាមួយកីឡាករថៃឈ្មោះ ភិច ប៊ុនជុង ក្នុងនាមជាគូអន្តរជាតិទី២នៅលើសង្វៀន ។ កីឡាករថៃរូបនេះធ្លាប់ប្រកួតនៅលើសង្វៀនទូរទស្សន៍អាស៊ីអាគ្នេយ៍ច្រើនលើកមកហើយ ដោយការប្រកួតរបស់គេ គឺទោះជាមានលទ្ធផលអាក្រក់ខ្លះនៅក្រោយពេលប្រកួតចប់ក៏ដោយ ក៏លទ្ធផលថ្វីដៃដែលបានបង្ហាញឡើងមិនធម្មតា ។ កីឡាករ ភិច ប៊ុនជុង គឺជាសមាសភាពថៃដែលមានអ្នកស្នេហាការប្រដាល់នៅកម្ពុជាទទួលស្គាល់សមត្ថភាពមិនអន់ជាងម៉ឺន សុភា នោះឡើយ ដោយអាចនិយាយបានថា អ្នកទាំងពីរមានថ្វីដៃនៅលើរេញមិនចាញ់គ្នានោះផង ។ គូនេះ គេមិនហ៊ានធានាថាកីឡាករកម្ពុជា ឬកីឡាករថៃ នឹងឈ្នះនោះទេ ដោយម្នាក់ៗបានទទូចរង់ចាំមើលភាពជាក់ស្ដែងនៅលើសង្វៀនយប់ស្អែកច្រើនជាង។
យ៉ាងណាក៏ដោយ គេនៅតែទុកចិត្តចំពោះកីឡាករកម្ពុជាក្នុងកម្រិតច្រើនជាង ដោយសារតែ ម៉ឺន សុភា ឡើងប្រកួតលើកណាក៏សឹងមិនធ្វើឱ្យអ្នកទស្សនាខកចិត្ត ។ ការប្រកួតគូនេះ មានការប៉ាន់ស្មានថា នឹងធ្វើឱ្យកក្រើកសង្វៀនសម្រាប់ព្រឹត្តិការណ៍ប្រដាល់អន្តរជាតិទេសចរណ៍នៅខេត្តកំពង់ចាមរបស់ទូរទស្សន៍អាស៊ីអាគ្នេយ៍លើកនេះមិនខាន។ កីឡាករភិច ប៊ុនជុង ធ្លាប់ប្រកួត១០៩លើក ឈ្នះ៨៩លើក ចាញ់១៦លើក និងស្មើ៤លើក ខណៈដែលកីឡាករកម្ពុជា ម៉ឺន សុភា ធ្លាប់ប្រកួតបាន៨៦លើក ឈ្នះ៧៤លើក ចាញ់១១លើក និងស្មើ១លើក ។ ទោះបីតួលេខប្រកួតតិចជាងកីឡាករថៃបន្តិចមែន ប៉ុន្តែសន្ទស្សន៍នៃការព្យាករមានទំនុកចិត្តលើកីឡាករកម្ពុជាច្រើនជាង។
គូអន្តរជាតិមួយទៀត គឺជាការប៉ះគ្នារវាងកីឡាករ មាស ច័ន្ទមាន មកពីសមាគមកីឡាប្រដាល់ក្រសួងការពារជាតិ ជាមួយនឹងកីឡាករថៃឈ្មោះ ហ្វា ផាយ៉ាក់ ដែលគូនេះក៏មានការចាប់អារម្មណ៍មិនតិចនោះដែរ ។ កីឡាករថៃគូនេះ ធ្លាប់ប្រកួតបាន៩៩លើក ឈ្នះ៧៤លើក ចាញ់២៤លើក និងស្មើ១លើក ខណៈដែលកីឡាករកម្ពុជាធ្លាប់ប្រកួតបាន១១៧លើក ឈ្នះ៩៤លើក និងចាញ់២៣លើក គឺច្រើនជាងគូប្រកួត ។ យ៉ាងណាក៏ដោយគេចាត់ទុកថា កីឡាករមាស ច័ន្ទមាន ទំនងមិនងាយស៊ីកីឡាករថៃដោយស្រួលនោះទេ ដោយសារការប្រកួតប៉ុន្មានលើកចុងក្រោយរបស់គេក៏មិនសូវនឹងដៃ ហើយកីឡាករថៃ ហ្វា ផាយ៉ាក់ ក៏មានថ្វីដៃមុតស្រួច ។
លោក ញាណ សុធី អ្នករៀបចំការប្រកួតបានអះអាងថា ការបើកសង្វៀនប្រកួតនៅខេត្តកំពង់ចាម យប់ស្អែក គឺជាការចាប់ផ្ដើមលើកទី៣ សម្រាប់ព្រឹត្តិការណ៍ប្រដាល់ទេសចរណ៍ដែលរៀបចំធ្វើឡើងក្នុងឆ្នាំ២០១៦ ។ ក្រៅពីការប្រកួតរបស់គូអន្តរជាតិទាំង៣គូ ក៏មានកីឡាករកម្រិតជាតិប្រកួតគ្នាចំនួន៤គូផងដែរនៅក្នុងព្រឹត្តិការណ៍នោះ ។ លោកនៅតែរំពឹងខ្ពស់ចំពោះសន្ទុះគាំទ្របន្ទាប់ពីការប្រកួតបើកឆាកនៅខេត្តរតនគីរី និងខេត្តសៀមរាបទទួលបានការគាំទ្រយ៉ាងពេញទំហឹង ។ ព្រឹត្តិការណ៍នេះលោកថា នឹងធ្វើការផ្សាយបន្តផ្ទាល់តាមកញ្ចក់ទូរទស្សន៍អាស៊ីអាគ្នេយ៍ពីម៉ោង៨យប់ដល់ម៉ោង១០យប់ ដោយព្រឹត្តិការណ៍ប្រដាល់គឺបើកឱ្យទស្សនាដោយសេរីមិនមានលក់សំបុត្រនោះឡើយ ៕
ចែករំលែកព័តមាននេះ