រាជធានីភ្នំពេញ ៖ នៅថ្ងៃសៅរ៍ទី៥ មីនា ខាងមុខនេះ កីឡាករកម្ពុជា២រូប គឺ ថុល មករា មកពីក្លិបឃ្លាំងមឿងកីឡា និង វៀង សាវ៉នមកពីក្លិបកងពលតូចលេខ៧០ នឹងដល់ថ្ងៃឡើងវ៉ៃជាមួយកីឡាករថៃនៅលើសង្វៀនស៊ីធីអិន ។ អ្នកនិយមទស្សនាកីឡាប្រដាល់ជាច្រើននាក់កំពុងរង់ចាំអ៊ុតមើលថា តើកីឡាករកម្ពុជាទាំង២អាចសម្រេចគោលដៅរបស់ខ្លួន ឬយ៉ាងណា ខណៈដែលកីឡាករបរទេសដែលពួកគេត្រូវជួបហាក់មានសមត្ថភាពពិបាកផ្ដួលអ៊ីចឹងនោះ ។
ការប្រកួតនៅថ្ងៃនោះ កីឡាករថុល មករា នឹងជួបប្រកួតជាមួយកីឡាករជើងខ្លាំងថៃឈ្មោះ ស៊ីតរ៉ាក់ ពែកខាឃែរ ក្នុងប្រភេទម្ងន់៦៥គីឡូក្រាម ។ ថុល មករា ធ្លាប់ប្រកួតបាន៤៥ដង ឈ្នះ២៧ដង ចាញ់១៧ដង ស្មើ១ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១០ដង។ រីឯស៊ីតរ៉ាក់ ពៀកខាឃែរ ធ្លាប់ប្រកួតបាន៦៦ដង ឈ្នះ៥៦ដង ចាញ់១០ដង។ សម្រាប់ការប្រកួតលើកនេះ ថុល មករា មិនអាចធ្វេសប្រហែសបានឡើយ ព្រោះកីឡាករថៃរូបនេះមានថ្វីដៃប្រកួតមិនធម្មតានោះឡើយទាំងផ្លែកែង ជង្គង់ និងកម្លាំងស៊ុហ្វពិតជាធ្វើឱ្យថុល មករា ពិបាកស៊ីបន្តិចហើយ ។ ទោះបីយ៉ាងណា លោក សុខ វិជ័យ ដែលជាគ្រូបង្ហាត់កីឡាករថុល មករា បានអះអាងថា សិស្សរបស់លោកមិនហ៊ានធានាថា យ៉ាងណានោះទេ ប៉ុន្តែលោកមានជំនឿចិត្តលើគេថានឹងមិនធ្វើឱ្យលោកអស់សង្ឃឹមឡើយ។ ថុល មករា ក៏ជាអ្នកប្រដាល់មួយរូបដែលមានបទពិសោធន៍ប្រកួតនៅលើសង្វៀនច្រើនគួរសម ទើបគេមិនទាន់ដឹងថា គូនេះអ្នកណាខ្លាំងជាងអ្នកណា មានតែប្ដូរកណ្ដាប់គ្នាមើលសិនទើបដឹង ។
ចំណែក វៀង សាវ៉ន ត្រូវប្រកួតជាមួយកីឡាករថៃឈ្មោះ វិរៈឆ័យ ស.ច.បួសាយ ។ វៀង សាវ៉ន ធ្លាប់ប្រកួតបាន១១៤ដង ឈ្នះ៧៨ដង ចាញ់៣២ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន២០ដង។ រីឯកីឡាករថៃធ្លាប់ប្រកួតបាន៧៥ដង ឈ្នះ៥០ដង ចាញ់២៣ដង និងស្មើ២ដង ។ បើទោះជា វៀង សាវ៉ន ធ្លាប់ប្រកួតច្រើនដងជាងមែនក៏មិនប្រាកដថា អាចផ្ដួលអ្នកប្រដាល់ថៃរូបនេះបានដែរ ។ ម្យ៉ាង វៀង សាវ៉ន មួយរយៈមកនេះ មិនសូវឃើញលេចមុខនៅលើសង្វៀនញឹកញាប់ដូចមុន ដោយសារវ័យរបស់គេក៏រាងជ្រេបន្តិចទៅហើយដែរ ដូច្នេះកម្លាំងស៊ុហ្វប្រហែលជាមិនខ្លាំងដូចមុនទៀតនោះទេ ។ ចំណែកកីឡាករថៃមិនធ្លាប់មកប្រកួតនៅស្រុកខ្មែរម្ដងណាឡើយ ទើបគ្មាននរណាដឹងថា អ្នកប្រដាល់ថៃរូបនេះខ្លាំងប៉ុនណា ។ ដូច្នេះគូនេះមានតែរង់ចាំអ៊ុតមើលលើការប្រកួតជាក់ស្ដែងប៉ុណ្ណោះទើបអាចដឹងបាន ។
នៅលើសង្វៀនដដែលក៏មានគូប្រកួតមិត្តភាពធម្មតាដែលសុទ្ធតែជាកីឡាករជើងខ្លាំងក្នុងស្រុកដូចគ្នាដូចជា កីឡាករ ចាន់ សីហា មកពីក្លិបអប់រំកាយស្រុកអន្លង់វែង ប្រកួតជាមួយកីឡាករគុណ សំណង មកពីក្លិបគីសែមានរិទ្ធ ។ កីឡាករ វ៉ែន ហុងជូវ៉ុង មកពីក្លិបកងកេងខេត្តបាត់ដំបង ប្រកួតជាមួយកីឡាករ គង់ វិចិត្រ មកពីក្លិបកងពលតូចលេខ៧០ និងកីឡាករឡុង សុភ័ស្ស មកពីក្លិបសាលវ័ន្តកីឡាប្រកួតជាមួយកីឡាករប៊ុន សុធា មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ