ខេត្តបាត់ដំបង ៖ ជនសង្ស័យចំនួន០២នាក់ត្រូវកម្លាំងកងរាជអាវុធហត្ថ ស្រាវជ្រាវឃាត់ខ្លួនបាន កាលពីថ្ងៃទី ២៨ កញ្ញា នៅចំណុចភូមិស្វាយវែង ឃុំកំរៀង ស្រុកកំរៀង…
ខេត្តបាត់ដំបង ៖ ជនសង្ស័យចំនួន០២នាក់ត្រូវកម្លាំងកងរាជអាវុធហត្ថ ស្រាវជ្រាវឃាត់ខ្លួនបាន កាលពីថ្ងៃទី ២៨ កញ្ញា នៅចំណុចភូមិស្វាយវែង ឃុំកំរៀង ស្រុកកំរៀង ក្រោយ០២ថ្ងៃ ដែលពួកគេបានរួមដៃគ្នាចូលលួចកាត់ខ្សែភ្លើងនៅក្នុងរោងចក្រម្សៅមីមួយកន្លែងនៅក្នុងស្រុកនេះ។
របាយការណ៍កងរាជអាវុធហត្ថបានឲ្យដឹងថា ជនសង្ស័យទាំង០២នាក់ ម្នាក់ឈ្មោះ គា ណៃ អាយុ២៣ឆ្នាំ នៅភូមិស្វាយវែង ឃុំកំរៀង និងម្នាក់ទៀតឈ្មោះ ខ្វើ កើ អាយុ២៣ឆ្នាំ នៅភូមិកំរៀង ឃុំកំរៀង។ ជនទាំង០២នាក់ ត្រូវកម្លាំងកងរាជអាវុធហត្ថស្រុកកំរៀង ឃាត់ខ្លួន ក្រោយទទូលបណ្ដឹងពីឈ្មោះ សុខ ចំរើន ប្រុសអាយុ៤១ឆ្នាំ តំណាងក្រុមហ៊ុន ផលិតម្សៅមី (BAI) ដែលប្ដឹងករណីចោរលួចកាត់ខ្សែភ្លើងនៅក្នុងរោងចក្រ។
បើតាមតំណាងក្រុមហ៊ុន លោក សុខ ចំរើន បានប្ដឹងទៅកាន់កងរាជអាវុធហត្ថថា ជនមិនស្គាល់មុខបានចូលលួចកាត់ខ្សែភ្លើង និងសម្ភារមួយចំនួនទៀតនៅក្នុងរោងចក្រម្សៅមី កាលពីពាក់កណ្ដាលអាធ្រាត្រថ្ងៃទី២៦ កញ្ញា ។ ក្រោយទទូលបានបណ្ដឹងតំណាងក្រុមហ៊ុនខាងលើ រយៈពេល០២ថ្ងៃក្រោយមក កម្លាំងកងរាជអាវុធហត្ថស្រុកកំរៀង បានធ្វើការស្រាវជ្រាវរហូតឈានដល់ ការឃាត់ខ្លួនជនសង្ស័យបានចំនួន០២នាក់ ថែមទាំងដកហូតវត្ថុតាងមួយចំនួនផង។
វត្ថុតាងទាំងនោះរួមមាន ខ្សែភ្លើងស្ពាន់ចំនួន៩គីឡូក្រាម ម៉ូតូម៉ាកវ៉េវកញ្ចាស់សម្រាប់ជិះធ្វើសកម្មភាពលួច០១គ្រឿង និង ម៉ូទ័រភ្លើង០១គ្រឿង។ មន្ត្រីកងរាជអាវុធហត្ថ បាននិយាយថា ក្រោយពេលឃាត់ខ្លួនជនទាំង០២នាក់បានសារភាពថា ពួកខ្លួនពិតជាបានលួចកាត់ខ្សែភ្លើង និងសម្ភារមួយចំនួនទៀត នៅក្នុងរោងចក្រម្សៅមីខាងលើនេះមែន។ ពេលនេះ មន្ត្រីជំនាញ កំពុងសួរនាំ និង កំពុងរៀបចំសំណុំរឿងបញ្ជូនជនទាំង០២នាក់ទៅសាលាដំបូងខេត្តហើយ៕
ចែករំលែកព័តមាននេះ