ភ្នំពេញ៖ រថយន្តម៉ាស្តាមួយគ្រឿង បានបង្កគ្រោះថ្នាក់ចរាចរណ៍ ហើយមិនព្រមឈប់ទទួលខុសត្រូវ បែរជាព្យាយាមបើករថយន្តរត់គេច តាំងពីក្រុងតាខ្មៅ រហូតដល់ខណ្ឌមានជ័យ រាជធានីភ្នំពេញ ទើបសមត្ថកិច្ច ឃាត់បាន នៅវេលាម៉ោង ៧យប់ ថ្ងៃទី២៧ ខែកញ្ញា ឆ្នាំ២០២១ ទល់មុខដេប៉ូខ្សាច់ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ។
បងប្អូនប្រជាពលរដ្ឋ ដែលឃើញហេតុការណ៍ និងជួយដេញតាម បានអោយដឹងថា មុនពេលកើតហេតុ គេបានឃើញបុរសម្នាក់ បើករថយន្ត ម៉ាក ម៉ាស្តា ពណ៌ស ពាក់ស្លាកលេខ ភ្នំពេញ 2BA-7011 បានបើកចេញពីក្រុងតាខ្មៅ ចូលទៅក្រុងភ្នំពេញ លុះមកដល់ចំនុចមុខសាលាខេត្តកណ្តាល ក៏ជ្រុលទៅបុកម៉ូតូ មិនចាំម៉ាកមួយគ្រឿង បណ្ដាលឲ្យដួលម៉ូតូ រងរបួសតិចតួច។ ភ្លាមៗនោះ អ្នកបើកបរ មិនព្រមឈប់ទេ គឺព្យាយាមបើករត់ ទាំងរថយន្តបែកកង់មុខចំហៀងខាងស្តាំ រហូតដល់ម្តុំដេប៉ូខ្សាច់ ផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ ទើបសមត្ថកិច្ចខណ្ឌមានជ័យ ជួយដេញឃាត់រថយន្ដ និងអ្នកបើកបរបាន។
ដោយឡែក អ្នកបើកបររថយន្តវិញ នៅពេលសមត្ថកិច្ច សាកសួរ ដោយម្តងនិយាយថា គាត់ជិះបុកម៉ូតូគេ ម្តងថា រថយន្តរបស់គាត់ បើកបុកឃឿនចិញ្ចើមផ្លូវ ដោយមិនប្រាកដថា ខ្លួនឯង បើកបុកអ្វី អោយច្បាស់នោះទេ។
ក្រោយពេលកើតហេតុ សមត្ថកិច្ចខណ្ឌមានជ័យ ក៏បានទាក់ទងហៅកម្លាំងសមត្ថកិច្ចនៃអធិការដ្ឋានក្រុងតាខ្មៅ អោយមកទទួលយកអ្នកបើកបរ និងអូសយករថយន្ត យកទៅរក្សាទុកនៅផ្នែកជំនាញ ដើម្បីសមត្ថកិច្ចស្រាវជ្រាវ រកភាគីខាងរងគ្រោះ ដោះស្រាយគ្នា៕
ចែករំលែកព័តមាននេះ