យោងតាមការចុះផ្សាយរបស់សារព័ត៌មានបរទេសបានឱ្យដឹងថា ការទទួលទានល្ហុងទុំគឺជាវិធីសាស្ត្រដ៏ប្រសើរមួយក្នុងការជួយគ្រប់គ្រង និងការពារជំងឺទឹកនោមផ្អែមយ៉ាងមានប្រសិទ្ធភាព។

បើទោះបីជាល្ហុងមានរសជាតិផ្អែមឆ្ងាញ់ពីធម្មជាតិក៏ដោយ ប៉ុន្តែវាត្រូវបានគេរកឃើញថាមានកម្រិតជាតិស្ករទាបបំផុត ពោលគឺក្នុងមួយចំណិតធំមានជាតិស្ករត្រឹមតែប្រមាណ ៨,៣ ក្រាមប៉ុណ្ណោះ។ លក្ខណៈពិសេសនេះហើយដែលធ្វើឱ្យល្ហុងក្លាយជាផ្លែឈើដ៏ស័ក្តិសិទ្ធិ និងផ្ដល់ភាពងាយស្រួលសម្រាប់អ្នកជំងឺទឹកនោមផ្អែមក្នុងការទទួលទានដោយមិនសូវព្រួយបារម្ភពីរឿងឡើងជាតិស្ករខ្លាំង។

ក្រៅពីការជួយតុល្យភាពជាតិស្ករ វីតាមីន និងជីវជាតិរុក្ខជាតិដែលមានវត្តមានយ៉ាងសំបូរបែបនៅក្នុងផ្លែល្ហុង ក៏ដើរតួនាទីយ៉ាងសំខាន់ក្នុងការទប់ស្កាត់ និងរារាំងការវិវត្តនៃជំងឺបេះដូង ដែលជាផលវិបាកជាញឹកញាប់កើតឡើងចំពោះអ្នកជំងឺទឹកនោមផ្អែម។ ស្របជាមួយគ្នានេះដែរ ចំពោះអ្នកដែលមិនទាន់មានជំងឺទឹកនោមផ្អែម ការទម្លាប់ទទួលទានល្ហុងទុំជាប្រចាំ គឺជាវិធីសាស្ត្រដ៏ល្អបំផុតមួយក្នុងការការពាររាងកាយមិនឱ្យកើតជំងឺនេះបានយ៉ាងមានប្រសិទ្ធភាព។

ការញ៉ាំល្ហុងមិនត្រឹមតែជួយដល់ប្រព័ន្ធរំលាយអាហារប៉ុណ្ណោះទេ ប៉ុន្តែថែមទាំងជាអាហារបំប៉នការពារសុខភាពរាងកាយទាំងមូលឱ្យកាន់តែមាំមួនទៀតផង។
​

បញ្ជាក់៖ ព័ត៌មាននេះផ្តល់ជូនសម្រាប់តែជាចំណេះដឹងទូទៅប៉ុណ្ណោះ។ ប្រសិនបើលោកអ្នកមានបញ្ហាសុខភាព ឬអាការៈមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕
​