រាជធានីភ្នំពេញ ៖ កម្មវិធីអិុមអូស៊ី ១០១ Incubator ដែលជាគំនិតផ្តួចផ្តើមមួយរបស់ក្រសួងពាណិជ្ជកម្ម ត្រូវបានធ្វើបទបង្ហាញក្នុងគោលបំណងអប់រំ និងលើកទឹកចិត្តដល់ការចាប់ផ្តើមដំណើរការអាជីវកម្មដំបូងរបស់សហគ្រិន
រាជធានីភ្នំពេញ ៖ កម្មវិធីអិុមអូស៊ី ១០១ Incubator ដែលជាគំនិតផ្តួចផ្តើមមួយរបស់ក្រសួងពាណិជ្ជកម្ម ត្រូវបានធ្វើបទបង្ហាញក្នុងគោលបំណងអប់រំ និងលើកទឹកចិត្តដល់ការចាប់ផ្តើមដំណើរការអាជីវកម្មដំបូងរបស់សហគ្រិន តាមរយៈការបណ្តុះបណ្តាល និងប្រឹក្សាយោបល់។ នេះបើយោងតាមប្រភពព័ត៌មានពីក្រសួងពាណិជ្ជកម្ម ។
នៅក្នុងបណ្តាញទំនាក់ទំនងសង្គមរបស់ក្រសួងពាណិជ្ជកម្មបានឲ្យដឹងថា កម្មវិធីអិុមអូស៊ី ១០១ Incubator បាននាំមកនូវចំណេះដឹងថ្មីៗជូនដល់សហគ្រិនកម្ពុជា ពីរបៀបលក់ផលិតផល និងពង្រីកអាជីវកម្មថ្មី ឬអាជីវកម្មដែលមានស្រាប់សម្រាប់វិស័យពាណិជ្ជកម្ម តាមប្រព័ន្ធអេឡិចត្រូនិក និងវេទិកាលក់ទំនិញក្នុងពេលអនាគត ។
ក្រសួងពាណិជ្ជកម្មលើកឡើងថា សហគ្រិនចំនួន៤៥ក្រុម ដែលបានឆ្លងកាត់វគ្គបណ្តុះបណ្តាលខាងលើដោយជោគជ័យ ត្រូវបានអនុញ្ញាតឲ្យចូលរួមប្រកួតប្រជែងវគ្គផ្សព្វផ្សាយទីផ្សារ ដោយដាក់បង្ហាញនូវផលិតផល និងសេវាកម្មរៀងៗខ្លួននៅក្នុងកម្មវិធីតាំងពិព័រណ៍ភូមិមួយផលិតផលមួយ កាលពីចុងឆ្នាំ២០១៥ ។
នៅក្នុងកម្មវិធីធ្វើបទបង្ហាញចុងក្រោយ១៧ក្រុម បេក្ខជនឆ្នើមជាងគេនឹងមានរយៈពេល១០នាទីក្នុងការធ្វើបទបង្ហាញចំពោះមុខវិនិយោគិនដ៏មានសក្តានុពលរបស់កម្ពុជា ក្នុងការប្រកួតប្រជែងដើម្បីទាក់ទាញវិនិយោគិនទាំងនោះឲ្យផ្តល់ការសហការគាំទ្រធ្វើពាណិជ្ជកម្ម និងផ្តល់នូវមូលនិធិហិរញ្ញប្បទានដល់ពួកគេ ។ ក្រុមបេក្ខជននីមួយៗអាចស្វែងរកឱកាសក្នុងការបង្កើតទំនាក់ទំនងអាជីវកម្ម ពាណិជ្ជកម្មក្នុងអំឡុងពេលសម្រាកអាហារសម្រន់ ដែលមានការចូលរួមពីអាជីវករ និងពាណិជ្ជកម្មប្រមាណជាង១០០នាក់ផងដែរ ។
លោកទេសរដ្ឋមន្ត្រី ស៊ុន ចាន់ថុល ក៏បានសម្តែងនូវការកោតសរសើរ និងថ្លែងអំណរគុណដល់គណៈវិនិច្ឆ័យ គ្រូបង្គោលផ្តល់ប្រឹក្សា គ្រូបង្រៀន អ្នកចូលរួម និងអ្នកចាត់ចែងកម្មវិធី ដែលបានខិតខំប្រឹងប្រែងយ៉ាងខ្លាំងក្លាក្នុងការធ្វើឲ្យកម្មវិធីអុិមអូស៊ី ១០១ Incubator នេះទទួលបានជោគជ័យ ។
លោកទេសរដ្ឋមន្ត្រីសង្ឃឹមថា ៖ « អ្នកចូលរួមទាំងអស់ដែលបានឈានដល់ដំណាក់កាលធ្វើបទបង្ហាញចុងក្រោយនេះ និងបានសិក្សាជំនាញដែលចាំបាច់ដើម្បីទាក់ទាញវិនិយោគិនដែលឲ្យពួកគេចាប់ផ្តើមដំណើរការអាជីវកម្មដំបូង ព្រមទាំងពង្រីកអាជីវកម្មរបស់ខ្លួន ។ ក្រសួងប្ដេជ្ញា ធ្វើយ៉ាងណា ឲ្យច្បាប់ស្ដីពីការធ្វើពាណិជ្ជកម្មតាមប្រព័ន្ធអេឡិចត្រូនិកត្រូវបានអនុម័តនៅក្នុងឆ្នាំនេះ ដើម្បីគាំទ្រដល់អាជីវកម្មរបស់ពួកគេ » ។
ក្រសួងពាណិជ្ជកម្មបង្ហាញថា កម្មវិធីនេះប្រព្រឹត្តទៅនៅទីស្តីការក្រសួងពាណិជ្ជកម្មដែលរៀបចំឡើងដើម្បីកសាងសមត្ថភាពអាជីវករ ពាណិជ្ជករ តាមរយៈការផ្តល់នូវគោលគំនិតល្អៗសំខាន់ៗសម្រាប់ការចាប់ផ្តើមអាជីវកម្មដំបូង និងអាជីវកម្មដែលមានស្រាប់ តាមរយៈការបណ្តុះបណ្តាលផ្សេងៗ ។ កម្មវិធីនេះចែកចេញជា៤ដំណាក់កាលគឺ វគ្គចាប់ផ្តើមដំបូង (Boot Camp), វគ្គបណ្តុះបណ្តាលភ្ញាស់គំនិតអាជីវកម្ម (Incubation), វគ្គការផ្សព្វផ្សាយនៅលើទីផ្សារ (Market Day) និងវគ្គផ្តាច់ព្រ័ត្រ (Final Pitch)។
ក្រសួងពាណិជ្ជកម្មបញ្ជាក់ទៀតថា វគ្គបណ្តុះបណ្តាលនេះ បានផ្តល់នូវចំណេះដឹងកាន់តែស៊ីជម្រៅអំពីសារសំខាន់នៃការបង្ហាញគំនិតអាជីវកម្មទៅកាន់សហគ្រិនក្នុង
ការកសាងផែនការអាជីវកម្មដ៏រឹងមាំ ។ ក្នុងក្របខ័ណ្ឌការងារដើម្បីវាយតម្លៃលទ្ធភាពជោគជ័យរយៈពេលវែង, របៀបស្វែងរកមូលនិធិគាំទ្រគម្រោងអាជីវកម្ម, វិធីស្វែងរកទីផ្សារតាមប្រព័ន្ធអនឡាញ និងកត្តាដទៃទៀតដែលជំរុញការចាប់ផ្ដើមអាជីវកម្មមួយឱ្យទទួលបានជោគជ័យក្នុងវិស័យពាណិជ្ជកម្មតាមប្រព័ន្ធអេឡិចត្រូនិក ៕
ចែករំលែកព័តមាននេះ