កម្លាំងនគរបាលនៃអធិការដ្ឋានខណ្ឌដូនពេញ បានធ្វើការបង្ហាញក្រុមជនសង្ស័យដែលតែងតែធ្វើសកម្មភាពលួចស្លាកលេខរថយន្តយ៉ាងសកម្មនៅក្នុងរាជធានីភ្នំពេញ ជាពិសេសនៅខណ្ឌដូនពេញ ខណ្ឌបឹងកេងកង ខណ្ឌចំការមន និងអ្នកទទួលផលចោរកម្មសរុបចំនួន
រាជធានីភ្នំពេញ ៖ វេលាម៉ោង១០និង៣០នាទីព្រឹក ថ្ងៃទី២៨ ខែកញ្ញា ឆ្នាំ២០២១ នេះ កម្លាំងនគរបាលនៃអធិការដ្ឋានខណ្ឌដូនពេញ បានធ្វើការបង្ហាញក្រុមជនសង្ស័យដែលតែងតែធ្វើសកម្មភាពលួចស្លាកលេខរថយន្តយ៉ាងសកម្មនៅក្នុងរាជធានីភ្នំពេញ ជាពិសេសនៅខណ្ឌដូនពេញ ខណ្ឌបឹងកេងកង ខណ្ឌចំការមន និងអ្នកទទួលផលចោរកម្មសរុបចំនួន៦នាក់ ដែលបង្ក្រាបបានជាបន្តបន្តបន្ទាប់កាលពីថ្ងៃទី ២៥ និងថ្ងៃទី២៧ កញ្ញា កន្លងមកនេះ ហើយក៏បាននាំយកមកកោរត្រងោល មុននឹងបញ្ជូនទៅតុលាការ និងដកហូតបានស្លាកលេខចំនួន៤បន្ទះផងដែរ។
លោកវរសេនីយ៍ទោ អ៊ឹម ផល្គុន អធិការរងទទួលផែនព្រហ្មទណ្ឌបានប្រាប់ឱ្យដឹងទៀតថា ក្រោមការដឹកនាំរបស់ឯកឧត្តម ស ថេត ស្នងការនគរបាលរាជធានីភ្នំពេញ និងក្រោមការដឹកនាំរបស់លោកអភិបាលខណ្ឌ និងលោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញ បានចង្អុលបង្ហាញអោយខ្ញុំបាទ ធ្វើការស្រាវជ្រាវចាប់ខ្លួនបានជនសង្ស័យចំនួន៦នាក់ជាបន្តបន្តបន្ទាប់។
លោកអធិការរងទទួលផែនព្រហ្មទណ្ឌ បានប្រាប់បន្តថា ដោយកាលថ្ងៃទី២៥ កម្លាំងរបស់លោកបានធ្វើការចាប់ឃាត់ខ្លួនបានក្រុមជនសង្ស័យជាចោរលួចស្លាកលេខរថយន្តចំនួន៣នាក់ ក្នុងនោះមាន ទី១-ឈ្មោះ ផុន ម៉ូលីស៊ីន អាយុ១៩ឆ្នាំ ទី២- ឈ្មោះ ភិរិន វណ្ណា អាយុ១៩ឆ្នាំ និងទី៣- ឈ្មោះ ជា ឡេង អាយុ ២៨ឆ្នាំ ។ លុះដល់ថ្ងៃទី២៧ កម្លាំងរបស់លោកក៏បានបន្តស្រាវជ្រាវចាប់ឃាត់ខ្លួនបានអ្នកជាប់ពាក់ព័ន្ធផ្សំគំនិតចំនួន២នាក់ទៀត មានទី១- ឈ្មោះ សៅ ភ័ក្ត្រ អាយុ៣៣ឆ្នាំ និងទី២-ឈ្មោះ លាន ជីវី អាយុ២៥ឆ្នាំ និងឈានទៅដល់ការចាប់ឃាត់ខ្លួនអ្នកទទួលផលចោរកម្មម្នាក់ទៀតដែលមានឈ្មោះ អ៊ឹង តិចគីម អាយុ៣០ឆ្នាំ (មនុស្សស្រីធ្វើប្រុស) ជាបន្តបន្ទាប់ទៀតផងដែរ។
លោកអធិការរងទទួលផែនព្រហ្មទណ្ឌ បានប្រាប់បន្តទៀតថា ក្រៅពីការចាប់ឃាត់ខ្លួនបានហើយ ក្រុមជនសង្ស័យជាចោរលួចស្លាកលេខរថយន្ត និងពាក់ព័ន្ធទទួលផលចោរកម្មទាំ ៦នាក់ខាងលើនេះ កម្លាំងរបស់លោកក៏បានធ្វើការដកហូតស្លាកលេខរថយន្តចំនួន៤សន្លឹក ក្នុងនោះមានស្លាកលេខភ្នំពេញ ២AS-០៨៥៦ ពីរសន្លឹក និងស្លាកលេខភ្នំពេញ ២AP-២៨៩៥ ពីរសន្លឹក រួមទាំងសម្ភារៈប្រើប្រាស់ធ្វើសកម្មភាពមួយចំនួនទៀតផងដែរ។
លោកក៏បានប្រាប់បន្តទៀងថា បុរស៣នាក់ខាងលើ ពួកគាត់ជាមុខសញ្ញាគាស់ និងលួចស្លាកលេខរថយន្តយ៉ាងសកម្មនៅតាមបណ្តាភូមិសាស្ត្ររាជធានីភ្នំពេញ ជាពិសេសខណ្ឌដូនពេញ ខណ្ឌបឹងកេងកង និងខណ្ឌចំការមន នេះបើយោងតាមការឆ្លើយសារភាព ទើបឈានទៅដល់ការចាប់ឃាត់ខ្លួនអ្នកផ្សំគំនិត និងអ្នកទទួលផលចោរកម្មនេះ។
ចំពោះស្លាកលេខរថយន្តដែលយើងដកហូនបាននេះ គឺមានម្ចាស់ ដោយករណីទី១ បានដាក់ពាក្យបណ្តឹងនៅសង្កាត់បឹងរាំង និងករណីទី២ នៅសង្កាត់ផ្សារថ្មីទី៣ ដែលនៅយប់ថ្ងៃទី២៥ កន្លងមក ត្រូវបានជនសង្ស័យដោយមានកង់បីឥណ្ឌាជាមធ្យោបាយជិះ ដើរធ្វើសកម្មភាពលួច ហើយក៏និងប្រគល់ស្លាកលេខទៅដល់ម្ចាស់រថយន្តវិញផងដែរ។
ក្រុមជនសង្ស័យទាំងនេះ ពួកគេតែងតែធ្វើសកម្មភាពលួចទ្រព្យសម្បត្តិទូទៅ ជាចោរហារយដែលលួចភាគច្រើន គឺស្លាកលេខរថយន្តតែម្តង ។ ហើយជនសង្ស័យទាំងនេះ ក៏ត្រូវបានធ្វើការកោត្រងោលពួកគេជាមុន ទើបបញ្ជូនទៅកាន់តុលាការនារសៀលនេះបន្តទៀតផងដែរ។
ជាចុងក្រោយ លោកក៏បានធ្វើការអំពាវនាវទៅដល់បងប្អូនប្រជាពលរដ្ឋដែលរស់នៅក្នុងរាជធានីទាំងអស់ សូមមេត្តាចត ឬទុកដាក់រថយន្តរបស់ខ្លួនអោយបានត្រឹមត្រូវ បើអាចសូមដាក់កាមេរ៉ាសុវត្ថិភាពតាមផ្ទះអោយបានគ្រប់ៗគ្នា ដើម្បីងាយស្រួលទៅដល់កម្លាំងរបស់លោកធ្វើការ ឬស្រាវជ្រាវតាមរកចាប់ខ្លួនក្រុមជនសង្ស័យផងដែរ។
ចែករំលែកព័តមាននេះ