ភ្នំពេញ៖ ប្រមុខរាជរដ្ឋាភិបាលកម្ពុជា ប្រកាសផ្តល់ជូនរដ្ឋាភិបាលឡាវ នូវអំណោយថ្នាំវ៉ាក់សាំង ប្រភេទស៊ីណូវ៉ាក់ ចំនួន ២សែនដូស ក្នុងស្មារតីសាមគ្គីភាព និងមិត្តភាពជាប្រពៃណីរវាងប្រទេសបងប្អូនទាំងពីរ និងដើម្បីរួមចំណែកដល់ការខិតខំប្រឹងប្រែងប្រយុទ្ធប្រឆាំងនឹងជំងឺដ៏សាហាវកូវីដ១៩។…
ភ្នំពេញ៖ ប្រមុខរាជរដ្ឋាភិបាលកម្ពុជា ប្រកាសផ្តល់ជូនរដ្ឋាភិបាលឡាវ នូវអំណោយថ្នាំវ៉ាក់សាំង ប្រភេទស៊ីណូវ៉ាក់ ចំនួន ២សែនដូស ក្នុងស្មារតីសាមគ្គីភាព និងមិត្តភាពជាប្រពៃណីរវាងប្រទេសបងប្អូនទាំងពីរ និងដើម្បីរួមចំណែកដល់ការខិតខំប្រឹងប្រែងប្រយុទ្ធប្រឆាំងនឹងជំងឺដ៏សាហាវកូវីដ១៩។ អំណោយវ៉ាក់សាំងនេះ នឹងត្រូវបញ្ជូនទៅដល់ច្រកទ្វារព្រំដែនត្រពាំងក្រៀល ក្នុងខេត្តស្ទឹងត្រែង-ណុងណុកខៀន នៅថ្ងៃទី២៨ ខែកញ្ញា ឆ្នាំ២០២១។
សម្តេចតេជោ ហ៊ុន សែន បានប្រកាសដូច្នេះ ក្នុងលិខិត ផ្ញើជូនលោក ផាន់ខាំ វីផាវ៉ាន់ នាយករដ្ឋមន្ត្រីឡាវ នៅថ្ងៃទី២៧ ខែកញ្ញា ឆ្នាំ២០២១។ ការប្រកាសពីជំនួយថ្នាំវ៉ាក់សាំង ដល់ប្រទេសឡាវនេះ ធ្វើឡើងតែមួយថ្ងៃប៉ុណ្ណោះ ក្រោយពីសម្តេច ជួបប្រជុំជាមួយលោក ថងលួន ស៊ីណូលីត អគ្គលេខាធិការគណបក្សប្រជាជនបដិវត្តន៍ឡាវ ក្នុងអំឡុងពេលនៃកិច្ចប្រជុំតទល់ត្រីភាគីរវាងមេដឹកនាំគណបក្សដឹកនាំប្រទេសកម្ពុជា វៀតណាម ឡាវ កាលពីថ្ងៃទី២៦ ខែកញ្ញា នៅទីក្រុងហាណូយ ប្រទេសវៀតណាម។
សូមរម្លឹកថា នៅថ្ងៃទី២៨ ខែកញ្ញានេះ ថ្នាំវ៉ាក់សាំង ស៊ីណូវ៉ាក់ ចំនួន ៣លានដូសទៀត ក៏នឹងត្រូវដឹកជញ្ជូនតាមយន្តហោះ ពិសេសពីប្រទេសចិន មកដល់កម្ពុជាផងដែរ។ វ៉ាក់សាំងទាំងនេះ ជាការបញ្ជាទិញរបស់កម្ពុជាពីក្រុមហ៊ុនចិន។
សូមរម្លឹកថា កាលពីថ្ងៃទី១៦ ខែវិច្ឆិកា ឆ្នាំ២០២០ កម្ពុជា បានផ្ដល់ជំនួយជាម៉ាស់ចំនួន ២លាន ១សែន និងបរិក្ខារពេទ្យជាច្រើនផ្សេងទៀត ជូនដល់ប្រទេសឡាវ ដើម្បីឱ្យប្រទេសជិតខាងកម្ពុជាមួយនេះ យកទៅប្រើប្រាស់ សម្រាប់ទប់ស្កាត់ការឆ្លងរីករាលដាលនៃជំងឺកូវីដ១៩។ ក្រៅពីឡាវ កម្ពុជាក៏បានផ្តល់ម៉ាស បរិក្ខារពេទ្យជាច្រើនទៀត រួមទាំងថវិកាច្រើនម៉ឺនដុល្លារ ដល់ប្រទេសជាមិត្តច្រើនទៀត ដូចជា ភូមា ទីម័រខាងកើត ប្រទេសនេប៉ាល់ និងប្រទេសវៀតណាម ជាដើម៕
ចែករំលែកព័តមាននេះ