តាមទំនៀមទម្លាប់ប្រពៃណីព្រះពុទ្ធសាសនានៅកម្ពុជា នៅពេលដល់រដូវបិណ្ឌភ្ជុំម្តងៗ វត្តអារាមនៅទូទាំងប្រទេសកម្ពុជាតែងមានសភាពមមាញឹកទទួលពុទ្ធបរិស័ទដែលនាំទេយ្យទាន និងទេយ្យវត្ថុនានាទៅប្រគេនព្រះសង្ឃសម្រាប់ឆាន់និងប្រើប្រាស់យ៉ាសម្បូរហូរហៀរ ។ ប៉ុន្តែអ្វីៗត្រូវប្រែប្រួលទាំងស្រុង នៅរដូវបុណ្យភ្ជុំបិណ្ឌឆ្នាំនេះ(២០២១)ប្រព្រឹត្តទៅបានត្រឹមតែបិណ្ឌទីបីប៉ុណ្ណោះក៏ត្រូវបានរាជរដ្ឋាភិបាលផ្អាក់កម្មវិធីបុណ្យជាបន្ទាន់ ព្រោះបញ្ហាជំងឺកូវីដ-១៩បានផ្ទុះឡើងនៅតាមបណ្តាវត្តនានាក្នុងរាជធានីភ្នំពេញ និងតាមបណ្តាមួយចំនួនយ៉ាងលឿន ។
បន្ទាប់ពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងក្រសួងធម្មការ និងសាសនា សម្រេចផ្អាកពិធីបុណ្យកាន់បិណ្ឌ និងភ្ជុំបិណ្ឌចាប់ពីថ្ងៃបិណ្ឌទី៤រហូតដល់ថ្ងៃភ្ជុំបិណ្ឌ នៅតាមបណ្តាវត្តអារាមនានា ក្នុងរាជធានីភក្នំពេញ មានសភាពស្ងាត់ជ្រងំ មិនមានមនុស្សម្នាអ៊ូអរ ឬសំឡេងភ្លេងពិនពាទ្យប្រគំកំដរកម្មវិធីបុណ្យកាន់បិណ្ឌដូច៣ថ្ងៃកន្លងមកនោះឡើយ ពោលគឺវត្តអារាមទាំងអស់បានវិលទៅរកសភាពដើមវិញ ដូចកាលពីមិនទាន់ប្រារព្ធពិធីបុណ្យនេះយ៉ាងដូច្នោះដែរ ។
វត្តអារាមទាំងឡាយនៅទូទាំងប្រទេសត្រូវបិទទ្វារធ្វើឱ្យទីវត្តអារាមនីមួយៗស្ថិតក្នុងសភាពស្ងប់ស្ងាត់គួរឱ្យសង្វេគ ឯពុទ្ធបរិស័ទក៏កំពុងប្រឈមនឹងការលំបាកផ្នែកសេដ្ឋកិច្ចផង ហើយជំងឺកូវីដ-១៩នៅតែបន្តឆ្លងរាលដាលឥតស្រាកស្រាន្តឡើយ ។ ប៉ុន្តែទោះជាយ៉ាងណា វត្តមួយចំនួនបានដាក់តុនៅខាងមុខខ្លោងទ្វារវត្ត អមដោយព្រះសង្ឃ និងអាចារ្យ គណៈកម្មការវត្តផងដែរ ដើម្បីទទួលទេយ្យទាន និងចង្ហាន់អំពីពុទ្ធបរិស័ទដែលនាំយកមកប្រគេន ប៉ុន្តែមិនមានការជួបជុំកុះករមនុស្សច្រើនដូចមុននោះឡើយ ។
គណៈកម្មការវត្តកំសាន្ត លោកអ៊ំឈួន សារុន បានឱ្យដឹងនៅព្រឹកថ្ងៃ២៧ ខែកញ្ញានេះថា វត្តកំសាន្តគឺជាវត្តមួយនៅរាជធានីភ្នំពេញក៏មិនខុសពីវត្តដទៃទៀតដែរ វត្តនេះមានព្រះសង្ឃគង់នៅចំនួន២៤អង្គបានអនុវត្តគោរពតាមការសម្រេចរបស់ក្រសួងធម្មការ និងសាសនា ក៏ដូចជាសេចក្តីសម្រេចរបស់ប្រមុខរាជរដ្ឋាភិបាល ដែលបានឱ្យផ្អាកការប្រារព្ធពិធីបុណ្យកាន់បិណ្ឌ និងភ្ជុំបិណ្ឌចាប់ពីថ្ងៃបិណ្ឌ៤រហូតដល់ថ្ងៃភ្ជុំបិណ្ឌ ដែលក្នុងគោលបំណងទប់ស្កាត់ការឆ្លងរីករាលដាលនៃជំងឺកូវីដ-១៩ ពិសេសមេរោគបំប្លែងខ្លួនថ្មីប្រភេទដែលតាចម្លងយ៉ាងលឿន ។
លោកអ៊ំគណៈកម្មការបានឱ្យដឹងទៀតថា បើទោះជាវត្តកំសាន្តមិនមានអ្នកកើតជំងឺកូវីដក្តីក៏វត្តត្រូវតែមានការប្រយ័ត្នប្រយែងបំផុត ដោយគោរពតាមវិធានការសុខាភិបាល រក្សាគម្លាត មានទឹកអាល់កុលបាញ់សម្លា.ប់មេរោគជាដើម ។ ហើយក៏មិនមានការជួបជុំបរិស័ទច្រើននោះដែរ ពោលគឺពុទ្ធបរិស័ទដែលយកចង្ហាន់មកប្រគេនព្រះសង្ឃចូលទៅប្រគេនម្នាក់ម្តងៗតាមលំដាប់ គឺទាំងព្រះសង្ឃ និងទាំងពុទ្ធបរិស័ទសុទ្ធតែមានការប្រយ័ត្នទាំងអស់គ្នា ។
ចំណែកនៅវត្តព្រែកប្រា ស្ថិតនៅក្នុងខណ្ឌច្បារអំពៅ ដូនជីដែលស្និទ្ធនឹងវត្តមួយរូបឈ្មោះង៉ូវ យ៉ាន បានឱ្យដឹងដែរថា វត្តនេះមានព្រះសង្ឃចំនួន២៦អង្គគង់ស្នាក់អាស្រ័យរាល់ថ្ងៃនេះ ។ វត្តព្រែកប្រាក៏ជាវត្តមួយក្នុងចំណោមវត្តទូទៅនៅកម្ពុជាដែរត្រូវបានផ្អាកពិធីបុណ្យកាន់បិណ្ឌនិងភ្ជុំបិណ្ឌធ្វើឱ្យជីវភាពព្រះសង្ឃជួបការលំបាកខ្លះ ប៉ុន្តែមិនមែនរហូតដល់ដាច់ចង្ហាន់នោះទេ ព្រោះវេនបិណ្ឌនីមួយៗគេធ្វើចង្ហាន់យកមកប្រគេននៅត្រឹមខ្លោងទ្វារវត្ត ព្រះសង្ឃឆាន់បានគ្រប់គ្រាន់ តែមិនបរិបូណ៌ដូចឆ្នាំមុនៗទេ ។ ដូច្នេះជីវភាពប្រចាំថ្ងៃរបស់សង្ឃទាំងអស់ក៏ត្រូវសម្រួលបន្សាំទៅតាមសភាពការណ៍ជាក់ស្តែងដែរ ក្នុងនោះវត្តក៏បានទទួលចង្ហាន់តាមវេនដែលពុទ្ធបរិស័ទនាំមកប្រគេននៅត្រឹមខ្លោងទ្វារវត្ត បានត្រឹមម៉ាគ្រប់ឆាន់មិនមានការខ្វះខាតចង្ហាន់នោះទេ ។
លោក សេង សុមុនី អ្នកនាំពាក្យក្រសួងធម្មការ និងសាសនាបានបញ្ជាក់ថា នៅរាជធានីភ្នំពេញមានចំនួន១៥៤វត្ត និងមានព្រះសង្ឃគង់នៅសរុបប្រហែល៨០០០អង្គ ។
កាលពីថ្ងៃទី២៣ ខែកញ្ញា ឆ្នាំ២០២១ រាជរដ្ឋាភិបាលបានចេញសេចក្តីសម្រេចបន្ទាន់មួយ ដោយសម្រេចផ្អាកការរៀបចំពិធីបុណ្យកាន់បិណ្ឌនិងភ្ជុំបិណ្ឌចាប់ពីបិណ្ឌទី៤ ដែលត្រូវនឹងថ្ងៃទី២៥ ខែកញ្ញា ឆ្នាំ២០២១នេះ ។
ការផ្អាកនេះធ្វើឡើងដើម្បីទប់ស្កាត់ការឆ្លងជំងឺកូវីដ-១៩ ខណៈសម្តេចតេជោនាយករដ្ឋមន្ត្រី ហ៊ុន សែន សង្កេតឃើញថា ក្នុងរយៈពេលពីរថ្ងៃដំបូងនៃការរៀបចំពិធីបុណ្យកាន់បិណ្ឌនេះ មានការជួបជុំនិងប្រមូលផ្តុំមនុស្សជាច្រើននៅតាមបណ្តាវត្តអារាម ដោយមិនបានអនុវត្តត្រឹមត្រូវតាមវិធានការសុវត្ថិភាពផ្នែកសុខាភិបាល ដែលនាំឱ្យកម្ពុជាប្រឈមហានិភ័យខ្ពស់នៃការឆ្លងរាលដាលជំងឺកូវីដ-១៩ ជាទ្រង់ទ្រាយធំនៅទូទាំងប្រទេស ជាពិសេសមេរោគបំប្លែងខ្លួនថ្មីប្រភេទ ដែលតា (Delta) ដែលមានកម្រិតនៃការឆ្លងរាលដាលឆាប់រហ័សនោះ ។
លោកសេង សុមុនី បានបញ្ជាក់ថា ទោះបីជាពិធីកាន់បិណ្ឌនិងភ្ជុំបិណ្ឌត្រូវផ្អាកចាប់ពីបិណ្ឌទី៤ ក៏ប៉ុន្តែប្រជាពលរដ្ឋនៅតែអាចយកចង្ហាន់ទៅប្រគេនព្រះសង្ឃនៅត្រឹមមុខខ្លោងទ្វារវត្ត និងការវេរទេយ្យទានតាមប្រព័ន្ធធនាគារជាដើម ។ លោកថាការផ្អាកពិធីកាន់បិណ្ឌនិងភ្ជុំបិណ្ឌឆ្នាំនេះមិនមានអ្វីត្រូវប៉ះពាល់ដល់ទំនៀមទម្លាប់ ប្រពៃណី និងជំនឿសាសនារបស់ខ្មែរតាំងពីបរមបុរាណមកនោះទេ តែជាការរៀនរស់នៅក្នុងរបត់ថ្មីនៃវិបត្តិកូវីដ-១៩ ៕ សាន សារិន
ចែករំលែកព័តមាននេះ