អភិបាលខេត្តសៀមរាបលោក ឃឹម ប៊ុនសុង បានមានប្រសាសន៍ថា យ៉ាងហោចណាស់ មានមនុស្សស្រី-ប្រុសចំនួន១៤នាក់ ត្រូវបានកងរាជអាវុធហត្ថ និងនគរបាលចាប់ឃាត់ខ្លួន នៅក្នុងប្រតិបត្តិការឆ្មក់បង្គ្រាប
ខេត្តសៀមរាប ៖ អភិបាលខេត្តសៀមរាបលោក ឃឹម ប៊ុនសុង បានមានប្រសាសន៍ថា យ៉ាងហោចណាស់ មានមនុស្សស្រី-ប្រុសចំនួន១៤នាក់ ត្រូវបានកងរាជអាវុធហត្ថ និងនគរបាលចាប់ឃាត់ខ្លួន នៅក្នុងប្រតិបត្តិការឆ្មក់បង្គ្រាប ទៅលើទីតាំងកាស៊ីណូខុសច្បាប់ ខ្នាតមធ្យមមួយជ្រកក្រោមស្លាកភោជនីយដ្ឋានមួយកន្លែង កណ្តាលបេះដូង ក្រុងទេសចរណ៍សៀមរាប ។
ប្រតិបតិ្តការបង្គ្រាបទីតាំងកាស៊ីណូខាងលើធ្វើឡើងរួមគ្នារវាងកម្លាំងកងរាជអាវុធហត្ថ និងកម្លាំងនគរបាលខេត្ត នៅម៉ោង៧និង៣០នាទីយប់ថ្ងៃទី២៨ កុម្ភៈ ក្នុងភោជនីយដ្ឋានមួយដែលមានយីហោ សាន់ ស៊ាំង ក្នុងបុរីប្រឹមប្រិយ ភូមិត្រពាំងសេះ សង្កាត់គោកចក កណ្តាលក្រុងទេសចរណ៍សៀមរាប ។
គួរំលឹកថា នេះជាការបង្គ្រាបសំបុកល្បែងស៊ីសង ដែលមានលក្ខណៈជាកាស៊ីណូលើកទី២ហើយ ចាប់តាំងពីដើមឆ្នាំ២០១៣ រហូតមក ដោយលើកទីមួយបង្គ្រាបទៅលើទីតាំងលេងល្បែងស៊ីសង តាមប្រព័ន្ធអិុនណែតឬហៅម្យ៉ាងទៀតថាប្រពន្ធ័ «អនឡាញ»ជ្រកក្រោមក្លឹបរាត្រី «អង្គរវ៉ាលី» ក្នុងភូមិសាលាកន្សែង សង្កាត់ស្វាយដង្គំ កណ្តាលក្រុងទេសចរណ៍សៀមរាប ដែលមានថៅកែជាជនជាតិកូរ៉េ ។
លោកអភិបាលបានខេត្តបញ្ជាក់យ៉ាងច្បាស់ដែរថា តាមព័ត៍មានដែលទម្លាយឲ្យដឹង ទីតាំងហ្នឹងបានរៀបចំបំពាក់ឧបករណ៍ល្បែងនេះ បានប្រហែលមួយសប្តាហ៏តែប៉ុណ្ណោះ ហើយបានបើកលេងកាលពីយប់មិញ ទើបត្រូវបានបង្គ្រាប ។
លោកបានបន្ថែមថា ល្បែងស៊ីសងគ្រប់រូបភាពទាំងអស់ មិនអនុញាតិឲ្យមានជាដាច់ខាត សំរាប់ទីក្រុងទេសចរណ៍សៀមរាប ។ នេះគឺជាការព្រមានសំរាប់អ្នកមានបំណងលួចបើកទីតាំងល្បែងស៊ីសងគ្រប់រូបភាព ឬប្រព្រឹត្តរបរល្មើសច្បាប់ទាំងឡាយ ។
លោកបានបញ្ជាក់ថា ចំពោះករណីនេះ គឺមិនអាចមានការសម្របសម្រួល ក្រៅប្រពន្ធ័ច្បាប់បានទេ ដាច់ខាតថៅកែនិងជនពាក់ពន្ធ័ត្រូវតែបញ្ជូនខ្លួនទៅតុលាការ ដើម្បីចាត់ការទៅតាមនិច្បាប់ ដើម្បីទុកជាការព្រមានដល់អ្នកក្រោយទៀត ។
គួរបញ្ចាក់ផងដែរកាលពីប៉ុន្មានឆ្នាំកន្លងទៅ ប្រមុខរាជរដ្ឋាភិបានកម្ពុជាសមេ្តចអគ្គមហាសេនាបតីតេជោហ៊ុន សែន ធ្លាប់បានលើកឡើងថា ទីក្រុងសៀមរាប គឺជាទីក្រុងទេសចរណ៍វប្បធម៌ ប្រវត្តិសាស្ត្រ មិនអាចឲ្យមានទេសចរណ៍ផ្លូវភេទ និងកាស៊ីណូជាដាច់ខាត ។
ចំណែកលោកវរសេនីយទោ ថា ដាលុច ប្រធានមន្ទីរស្រាវជ្រាវយុត្តិធម៌នៃ កងរាជអាវុធ ហត្ថខេត្ត ដែលបានដឹកនាំកម្លាំងក្នុងការបង្គ្រាបបានថ្លែង នៅព្រឹកថ្ងៃទី២៩ កុម្ភៈ ថា នៅក្នុងការបង្គ្រាបដ៏ជោគជ័យខាងលើ យើងបានឃាត់ខ្លួនមនុស្សចំនួន១៤នាក់ ក្នុងនោះស្រី៥នាក់ ប្រុស៩នាក់ និងបានរឹបអូសសម្ភារៈបម្រើឲ្យកាស៊ីណូជាច្រើន ដូចជាម៉ាស៊ីនរ៉ូឡត ម៉ាស៊ីនទូហ្គេមបាញ់ត្រី ទូហ្គេមផ្លែឈើ រួមទាំងតុចែកបៀមួយចំនួនទៀត ។
ទោះជាយ៉ាងណាលោកថា រហូតមកទល់ពេលនេះ គេមិនទាន់បានដឹងថា ថៅកែកាស៊ីណូ ដែលត្រូវបង្ក្រាបនោះ ជាអ្នកណានៅឡើយ ខណៈជនដែលត្រូវចាប់ខ្លួនទាំងនោះបានព្យាយាមលាក់បំពួន ដោយអ្នកខ្លះអះអាងខ្លួនថា ជាសន្តិសុខ ខ្លះជាអ្នកសំអាត និងខ្លះទៀតជាជាងភ្លើងជាងម៉ាស៊ីនត្រជាក់ ក៏ប៉ុន្តែលោកបញ្ជាក់ថាលោកកំពុងកោះហៅម្ចាស់ផ្ទះដើម្បីសួររកមុខអ្នកជួលទីតាំងនោះ ។
នៅព្រឹកថ្ងៃទី២៩ កុម្ភៈ ព្រះរាជអាជ្ញានៃសាលាដំបូងខេត្ត លោក កើត សុវណ្ណារ៉េត បានមានប្រសាសន៍ថា រហូតមកដល់ពេលនេះជនដែលត្រូវបានចាប់ខ្លួនទាំងនោះ កំពុងស្ថិតនៅក្នុងដំណាក់កាលស៊ើបសួរ របស់មន្ត្រីនគរបាលយុត្តិធម៌(កងរាជអាវុធហត្ថ) នៅឡើយ ។
លោកបានបញ្ជាក់បែបនេះថា «ពួកគេទាំង១៤នាក់ហ្នឹង អាចនឹងត្រូវចោទប្រកាន់ ពីបទល្មើសបើកល្បែងស៊ីសង គ្រាន់តែយើងនៅមិនទាន់អាចញែកចេញថាតើជនណាខ្លះអ្នកបើកល្បែង អ្នកណាខ្លះជាមេការ អ្នកណាខ្លះអ្នកចែកបៀ អ្នកណាខ្លះជាអ្នកទៅលេង» ។
យោងតាមច្បាប់ ស្តីពីការបង្គ្រាប់ល្បែងស៊ីសង ចំពោះអ្នកលេងអាចជាប់គុករយៈពេលចាប់ពីមួយថ្ងៃទៅមួយសប្តាហ៍ ឬបង់ពិន័យជាប្រាក់ខ្ពស់បំផុត ៥ម៉ឺនរៀល ។ ចំណែកអ្នកស៊ីសង អ្នកចាត់ចែងល្បែង ថៅកែ និងអ្នកនៅពីក្រោយខ្នងល្បែង អាចប្រឈមនឹងការកាត់ទោសឲ្យជាប់គុករយៈពេល ចាប់ពី១ឆ្នាំទៅ២ឆ្នាំ និងពិន័យជាប្រាក់ចាប់ពី៥ លានរៀលទៅ២០លានរៀល ។
ទាក់ទិនទៅនឹងការបង្គ្រាបទីតាំងកាស៊ីណូខុសច្បាប់ខាងលើ ក្រុមសង្គមស៊ីវិល នឹងប្រជាពលរដ្ឋ បានសម្តែងនូវការស្វាគមន៍យ៉ាងពេញទំហឹង ។ ក៏ប៉ុន្តែពួកគេក៏បានបន្ថែមសំណូមពរដល់សមត្ថកិច្ចបង្កើនប្រតិបត្តិការ ខណៈគេបានឃើញសកម្មភាព ល្បែងស៊ីសងគ្រប់រូបភាព ដូចជាកន្ទុយលេខ ភ្នាល់បាល់ បៀ អាប៉ោង បញ្ជល់មាន់ ជាពិសេសហ្គែមតាមអ៊ីនធឺណែត កំពុងតែកើតមានយ៉ាងព្រោងព្រាត និងកំពុងតែគំរាមគំហែងយ៉ាងធ្ងន់ធ្ងរ ដល់សន្តិសុខសង្គម រួមទាំងអន្តរាយដល់អនាគត់យុវជន ដែលជាសរសរទ្រូងនៃប្រទេសជាតិផងដែរ ៕
ចែករំលែកព័តមាននេះ