ខេត្តមណ្ឌលគិរី ៖ ក្រុមគ្រូពេទ្យបន្តរកឃើញអ្នកវិជ្ជមានកូវីដ១៩ នៅក្រុមហ៊ុនដាំម្រេចវែលបាយអូរ ក្រោយធ្វើតេស្តលើកទី២ លើកម្មករនិយោជិកដែលកំពុងធ្វើចត្តាឡីស័កដែលធ្វើឲ្យចំនួនអ្នកឆ្លងកូវីដក្នុងក្រុមហ៊ុននេះឡើងដល់១១២នាក់ ។
យោងតាមរបាយការដែលមន្ត្រីជំនាញចុះយកសំណាក នៅថ្ងៃទី២៦ កញ្ញា ២០២១ បានឲ្យដឹងថា ការយកសំណាកកូវីដ-១៩ លើកទី២ ជូនកម្មករនិយោជិត នៅក្នុងក្រុមហ៊ុន វែលបាយអូ ខូអិលធីឌី សរុបចំនួន២៣៩នាក់ ស្រី៦៥នាក់ លទ្ធផលវិជ្ជមានសរុបចំនួន១១នាក់ ស្រី០២នាក់ ។
សូមរំឮកថា មានករណីឆ្លងរីករាលដាលជំងឺកូវីដ១៩ លើកម្មករនិយោជិកជាង១០១នាក់ ក្នុងក្រុមហ៊ុនចំការម្រេចរបស់ជនជាតិកូរ៉េ នៅភូមិពូតាង ឃុំពូជ្រៃ ស្រុកពេជ្រាដា ។
ប្រភពបន្តថា ការស្នាក់នៅរបស់កម្មករចំការម្រេច វែលបាយអូ នេះ គឺមានសភាពណែនណាន់តាន់តាប់ខ្លាំងព្រោះក្នុងមួយបន្ទប់ថៅកែឲ្យពួកគេស្នាក់នៅចំនួនដល់ទៅ១០នាក់ដែលនេះ ជាឱកាសសម្រាប់ជំងឺកូវីដ១៩ វាយប្រហារទ្រង់ទ្រាយធំលើកម្មករបម្រើការនៅទីនោះ រហូតសូម្បីម្ចាស់ក្រុមហ៊ុន និងមេការ គឺសុទ្ធតែវិជ្ជមានកូវីដទាំងអស់ ។
ដោយសារតែចំនួនអ្នកជំងឺកាន់តែកើនឡើងក្រុមគ្រូពេទ្យបានចុះយកសំណាករហូតដល់បួនលើក ដើម្បីស្វែងរកអ្នកជំងឺឲ្យទាន់ពេលវេលា ។
សកម្មភាពចុះយកសំណាកបានផ្តើមពីថ្ងៃទី១៧ រហូតដល់ថ្ងៃទី២០ លើមនុស្សជា៥០០នាក់ វិជ្ជមានជាង១០១នាក់ ។ ក្នុងនោះយកសំណាកថ្ងៃទី១៧ វិជ្ជមាន១២នាក់ ថ្ងៃទី១៨ វិជ្ជមាន២០នាក់ ថ្ងៃទី១៩ វិជ្ជមាន៣៧នាក់ ថ្ងៃទី២០ វិជ្ជមាន៣២នាក់ ៕
ចែករំលែកព័តមាននេះ