ប្រទេសឡាវ ៖ ក្រុមហ៊ុនពាណិជ្ជកម្មជប៉ុន Mitsubishi Corp បានវិនិយោគលើគម្រោងរោងចក្រថាមពលខ្យល់ដ៏ធំមួយនៅក្នុងប្រទេសឡាវ ដើម្បីចែកចាយថាមពលអគ្គិសនីដល់ប្រទេសវៀតណាមដែលគ្រោងជាកសិដ្ឋានផលិតអគ្គិសនីដោយថាមពលខ្យល់នេះ គឺជាគម្រោងធំជាងគេនៅអាស៊ីអាគ្នេយ៍។ ក្រុមហ៊ុន Mitsubishi…
ប្រទេសឡាវ ៖ ក្រុមហ៊ុនពាណិជ្ជកម្មជប៉ុន Mitsubishi Corp បានវិនិយោគលើគម្រោងរោងចក្រថាមពលខ្យល់ដ៏ធំមួយនៅក្នុងប្រទេសឡាវ ដើម្បីចែកចាយថាមពលអគ្គិសនីដល់ប្រទេសវៀតណាមដែលគ្រោងជាកសិដ្ឋានផលិតអគ្គិសនីដោយថាមពលខ្យល់នេះ គឺជាគម្រោងធំជាងគេនៅអាស៊ីអាគ្នេយ៍។
ក្រុមហ៊ុន Mitsubishi បាននិយាយនៅក្នុងសេចក្តីប្រកាសព័ត៌មានថ្មីមួយថា រោងចក្រថាមពលខ្យល់ ៦០០ មេហ្កាវ៉ាត់ នៅខេត្តសេកុង និងខេត្ត Attapeu នៅភាគខាងត្បូងប្រទេសឡាវ ដែលជារោងចក្រដំបូងគេនៅក្នុងប្រទេសនេះ នឹងត្រូវបានអភិវឌ្ឍន៍ ដោយក្រុមហ៊ុន Impact Energy Asia Development Ltd (IEAD) ដែលមានមូលដ្ឋាននៅទីក្រុងហុងកុង ចាប់ពីឆ្នាំក្រោយ ជាមួយនឹងប្រតិបត្តិការគ្រោងនឹងចាប់ផ្តើមនៅឆ្នាំ ២០២៥ ។
គម្រោងកសិដ្ឋានផលិតថាមពលពីខ្យល់ ដែលត្រូវបានគេពិពណ៌នាផងដែរថាជា «ការ ផ្លាស់ប្តូរអគ្គិសនីឆ្លងដែនដំបូងគេចេញពីការបង្កើតថាមពលខ្យល់» នៅក្នុងតំបន់ គឺមានគោលបំណងប្រយុទ្ធប្រឆាំងនឹងការប្រែប្រួលអាកាសធាតុ ខណៈគម្រោងទាញយកថាមពលផលិតជាអគ្គិសនីពីខ្យល់ គឺជាការគាំទ្រដល់សកម្មភាពសេដ្ឋកិច្ច។
ប្រទេសវៀតណាមត្រូវការការផ្គត់ផ្គង់ថាមពលបន្ថែមដើម្បីរក្សាកំណើនសេដ្ឋកិច្ចរបស់ខ្លួន ជាពិសេសនៅរដូវប្រាំង នៅពេលដែលរោងចក្រថាមពលខ្យល់ត្រូវបានគេរំពឹងថានឹងដំណើរការក្នុងអត្រាខ្ពស់ ហើយលទ្ធភាពនៃការបង្កើតវារីអគ្គិសនីដែលជាប្រភពថាមពលសំខាន់មួយរបស់ប្រទេសមានចំនួនកំណត់នោះ ។ នេះបើយោងតាមប្រកាសព័ត៌មានរបស់ ក្រុមហ៊ុន Mitsubishi ។
ទោះបីជា ក្រុមហ៊ុនមិនបានបង្ហាញពីទំហំនៃការវិនិយោគក៏ដោយ ក្រុមហ៊ុន Mitsubishi ដែលមានមូលដ្ឋាន នៅទីក្រុងតូក្យូ បាននិយាយថាក្រុមហ៊ុនបុត្រសម្ព័ន្ធរបស់ខ្លួនដែលមានមូលដ្ឋាននៅទីក្រុងហុងកុង កាន់កាប់ភាគហ៊ុនប្រហែល ២៤% នៅក្នុងគម្រោងនេះ ដោយភាគហ៊ុននៅសល់ ត្រូវបានកាន់កាប់ដោយក្រុមហ៊ុន BCPG Public Company Ltd និង Earth Power Investment Ltd, ក្រុមហ៊ុនទាំងពីរគឺជាក្រុមហ៊ុនបុត្រសម្ព័ន្ធរបស់ក្រុមហ៊ុនថៃ ។
ក្រុមហ៊ុន Mitsubishi បាននិយាយថា «យើងនឹងបន្តរួមចំណែកដល់ការសំរេចបាននូវសង្គមដែលមានការកាត់បន្ថយនូវកាបូនឌីអុកស៊ីត (CO2) ដោយការខិតខំដើម្បីសម្រេចបាននូវការផ្គត់ផ្គង់អគ្គិសនីប្រកបដោយស្ថិរភាពនៅក្នុងប្រទេសវៀតណាម និងដោះស្រាយបញ្ហាប្រឈមផ្នែកបរិស្ថានសម្រាប់សង្គមមានស្ថិរភាព» ។
ការវិវត្តន៍ទៅមុខបន្តនេះ គឺត្រូវបានអនុវត្តតាមសេចក្តីប្រកាសមួយកាលពី ខែកក្កដាដោយ BCPG ថា IEAD និង Vietnam Electricity ដែលជាក្រុមហ៊ុនថាមពលឈានមុខគេនៅក្នុងប្រទេសបានយល់ព្រមជាផ្លូវការលើការទិញអគ្គិសនីរយៈពេល ២៥ ឆ្នាំ។
ប្រធាន IEAD លោកស្រី Paradai Suebma ត្រូវបានដកស្រង់សម្តីនៅក្នុងសេចក្តីប្រកាសព័ត៌មាន BCPG ដោយនិយាយថា ការចុះហត្ថលេខាលើកិច្ចព្រមព្រៀងនេះគឺជាការសហការគ្នាជានិមិត្តរូបរវាងឡាវ វៀតណាម ជប៉ុន និងថៃ ដើម្បីធ្វើការឆ្ពោះទៅរកការស្វែងរកសកលនៃការបំភាយឧស្ម័នធម្មជាតិសុទ្ធ ៕
ចែករំលែកព័តមាននេះ