សម្ដេចធិបតីស្នើឱ្យអាជ្ញាធរជួយមើលបទល្មើសអូសលៀសយកទាំងតូចទាំងធំធ្វើឱ្យហិនហោចអស់ពេលអនាគត
- ស្វាយរៀង
ខេត្តស្វាយរៀង ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើឱ្យអាជ្ញាធរជួយមើលបទល្មើសអូសលៀសតាមទន្លេ យកទាំងតូចទាំងធំដែលអាចឈានដល់ហិនហោចនាពេលអនាគត និងបានអំពាវនាវឱ្យអាជ្ញាធរ និងប្រជាពលរដ្ឋជួយការពារធនធានមច្ឆជាតិ ។
ការស្នើរបស់សម្ដេចធិបតី ធ្វើឡើងក្នុងឱកាសអញ្ជើញអបអរទិវាមច្ឆជាតិនៅទន្លេវ៉ៃគោ ខេត្តស្វាយរៀង នាព្រឹកថ្ងៃទី០១ ខែកក្កដា ឆ្នាំ២០២៦ ។
សម្ដេចបានមានប្រសាសន៍យ៉ាងដូច្នេះថា «សុំមើលផង អាការអូសលៀស អូសម្ដង៣០ ៤០តោន អូសទាំងអាតូចទាំងអាធំ ចឹងខ្ទេចអស់ ខ្ញុំបញ្ជាឱ្យកងទ័ពជើងគោកនៅចាំទន្លេសាបចេញធ្វើការ ឥឡូវកងទ័ពជើងគោក ២ឆ្នាំនេះវ៉ៃទាំងល្មើសធម្មជាតិទាំងទឹកទាំងគោក»។
ជុំវិញបញ្ហានេះ សម្ដេចធិបតីស្នើឱ្យគ្រប់ភាគីពាក់ព័ន្ធចូលរួម ជាមួយរដ្ឋបាលជលផល ជាមួយសមត្ថកិច្ចផ្សេងៗ ជាមួយសហគមន៍ ដើម្បីធ្វើការជាមួយគ្នាដោយរករូបមន្តណាមួយដែលមានចីរភាពសម្រាប់ទៅថ្ងៃខាងមុខ ។
សម្ដេចបានបញ្ជាក់ថា សម្ដេចមិនចង់ប្រើកងទ័ព កងកម្លាំងបន្ថែមទេ ប៉ុន្តែចង់ពង្រឹងសមត្ថភាពអ្នកនៅមូលដ្ឋានផ្ទាល់ឱ្យមានសមត្ថភាពការពារដោយខ្លួនឯង ។
សូមជម្រាបជូនថា ទិវាមច្ឆជាតិ ១ កក្កដា លើកទី២១ ឆ្នាំ២០២៦នេះ លែងត្រីមេពូជ កូនត្រី និងវារីសត្វសរុប២០ប្រភេទ រួមមាន៖ ត្រីគល់រាំង ត្រីរាជ ត្រីខ្ជឹង ត្រីដំរី ត្រីកាហែ ត្រីឆ្អិន ត្រីគ្រំ ត្រីត្រសក់ ត្រីកន្ត្រប់ខ្លា ត្រីប្រា ត្រីពោ ត្រីក្រាញ់ ត្រីសន្តាយ ត្រីអណ្តែង ត្រីព្រលូង កង្កែប បង្កង អន្ទង់ អណ្ដើក កន្ធាយ សរុបប្រមាណ១,៥លានក្បាល៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ