រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានគូសបញ្ជាក់ទោះបីជាកម្ពុជាយើងមានភាពជឿជាក់លើការចាក់វ៉ាក់សាំងការពារជំងឺកូវីដ១៩ យ៉ាងណាក្តីក៏យើងស្ថិតក្នុងភាពផុយស្រួយក្នុងការឆ្លងដដែល បើមិនគោរពវិធានការសុខាភិបាល ។
យោងតាមសារលិខិតរបស់សម្តេចតេជោ ហ៊ុនសែន នាយករដ្ឋមន្ត្រីក្នុងពិធី បអរសាទរទិវាទេសចរណ៍ពិភពលោកឆ្នាំ២០២១ ក្រោមប្រធានបទ «ទេសចរណ៍សម្រាប់កំណើនប្រកបដោយបរិយាបន្ន (Tourism for Inclusive Growth) ដែលប្រព្រឹត្តទៅនៅថ្ងៃទី២៧ ខែកញ្ញា ឆ្នាំ២០២១ បានលើកឡើងថា កន្លងមកវិស័យទេសចរណ៍បានបំពេញតួនាទីយ៉ាងសកម្មជាម៉ាស៊ីនអូសទាញកំណើនសម្រាប់វិស័យសេដ្ឋកិច្ច-សង្គមដ៏ទៃទៀត តាមរយៈឥទ្ធិពលមេគុណសេដ្ឋកិច្ចពី៤ទៅ៥ដង និងមេគុណឥទ្ធិពល ការងារដ៏ខ្ពស់ដោយការងារផ្ទាល់១ ក្នុងវិស័យទេសចរណ៍អាចបង្កើតការងារមិនផ្ទាល់ចំនួន១,៥ (មួយកន្លះ) ។
សម្តេចបញ្ជាក់ថា ៖«ក្នុងន័យនេះ ខ្ញុំសូមលើកទឹកចិត្តដល់ស្ថាប័នពាក់ព័ន្ធ អាជ្ញាធរមូលដ្ឋានផ្នែកឯកជន យុវជន និងដៃគូអភិវឌ្ឍជាតិ និងអន្តរជាតិ ចូលរួមជំរុញការបង្កើត និងផ្គត់ផ្គង់សេវាកម្មទេសចរណ៍ឱ្យកាន់តែសម្បូរបែបតាមរយៈការដាក់ចុះនូវកម្មវិធីយុវជន និងធុរកិច្ចក្នុងវិស័យទេសចរណ៍កម្មវិធីជំរុញការបង្កើតថ្មី និងនវានុវត្តន៍ទេសចរណ៍ជនបទព្រមទាំងលើកកម្ពស់ការយល់ដឹង និងកសាងសមត្ថភាពផ្នែកទេសចរណ៍ឌីជីថលដល់ថ្នាក់មូលដ្ឋានក្រោមការសម្របសម្រួល និងដឹកនាំរបស់ក្រសួងទេសចរណ៍ និងក្រោមកិច្ចសហប្រតិបត្តិការពីអង្គការទេសចរណ៍ ពិភពលោក សហគមន៍អន្តរជាតិ និងដៃគូអភិវឌ្ឍនានា»។
សម្តេចលើកឡើងថា វិបត្តិកូវីដ-១៩ បានធ្វើឱ្យមានការចាកចេញពីការងារ ខ្សែសង្វាក់ផ្គត់ផ្គង់ទេសចរណ៍គ្រប់កម្រិត ត្រូវផ្អាកស្ទើរទាំងស្រុង ដែលទាំងនេះបា នបង្កជាឧបសគ្គនៃដំណើរការស្តារឡើងវិញនៃវិស័យ ទេសចរណ៍ នាពេលខាងមុខ ។
ក្នុងន័យនេះ ខ្ញុំសូមអំពាវនាវដល់ក្រសួងស្ថាប័នពាក់ព័ន្ធត្រូវសហការកាន់រឹតសកម្មថែមទៀត ជាមួយក្រសួងទេសចរណ៍ធ្វើការបណ្តុះបណ្តាលជំនាញបន្ថែម និងជំនាញថ្មីដល់យុវជនស្របតាមយន្តការអភិវឌ្ឍន៍ជំនាញទេសចរណ៍ប្រកបដោយចីរភាព ។
សម្តេចតេជោ បន្ថែមថា បន្ទាប់ពីវិបត្តិកូវីដ-១៩ ខ្ញុំយល់ឃើញថា និន្នាការទេសចរណ៍ និងមានសភាពខុសពីមុនពោល គឺការគិតគូរអំពីសុវត្ថិភាពនិ ងផាសុកភាពនឹងក្លាយជាកត្តាអាទិភាពក្នុងការសម្រេចចិត្តជ្រើសរើសគោលដៅធ្វើដំណើរកំសាន្ត ។
សម្តេចថា ៖«ក្នុងន័យនេះ ខ្ញុំសូមលើកទឹកចិត្ត និងគាំទ្រនូវការដាក់ចុះយុទ្ធនាការ «កម្ពុជាសុវត្ថិភាព – Cambodia Safe» ដើម្បីជាមុំយុទ្ធសាស្ត្រទាក់ទាញទេសចរផ្ទៃក្នុង និងអន្តរជាតិក្នុងដំណាក់កាលនៃការបើកឡើងវិញ និងពេលអនាគត»។
សម្តេចថា ៖«បច្ចុប្បន្នទោះជាមានការជឿនលឿនខ្លាំងលើការចាក់វ៉ាក់សាំងនៅកម្ពុជាយើងនៅតែស្ថិតក្នុងភាពផុយស្រួយ ហើយយើងទាំងអស់គ្នាត្រូវបន្តចូលរួមអនុវត្តវិធានរដ្ឋបាល និងសុខាភិបាលតទៅទៀត ដោយសេចក្តីអត់ធ្មត់ ដើម្បីជាគ្រឹះរឹងមាំនៃការបើកសកម្មភាពទេសចរណ៍ក៏ដូចជាសកម្មភាពសេដ្ឋកិច្ច និងសង្គមផ្សេងៗទៀតឡើងវិញ ប្រកបដោយសុវត្ថិភាព និងការទទួលខុសត្រូវ» ៕
ចែករំលែកព័តមាននេះ