ផ្អាកការប្រកួតប្រដាល់ខ្មែរជើងឯកអាស៊ីអាគ្នេយ៍ មានទាំងផលវិជ្ជមាន និងអវិជ្ជមាន
- ភ្នំពេញ
រាជធានីភ្នំពេញ ៖ បន្ទាប់ពីរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន សម្រេចផ្អាកការរៀបចំការប្រកួតកីឡា
រាជធានីភ្នំពេញ ៖ បន្ទាប់ពីរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន សម្រេចផ្អាកការរៀបចំការប្រកួតកីឡាប្រដាល់គុនខ្មែរ ជើងឯកអាស៊ីអាគ្នេយ៍ ដែលគ្រោងរៀបចំនៅខែតុលា ឆ្នាំ២០២១ ដោយសារការឆ្លងរីករាលនៃជំងឺងកូវីដ១៩ ត្រូវបានគេមើលឃើញថា មានកត្តាវិជ្ជមាន និងអវិជ្ជមាន ជាពិសេសសម្រាប់គ្រូបង្វឹក និងកីឡាករ ដែលខំរំពឹងថា នឹងបានបញ្ចេញស្នាដៃអោយពិភពលោកភ្ញាក់ផ្អើលនោះ។ យ៉ាងណាមិញមានការបញ្ជាក់ថា ព្រឹត្តិការណ៍នេះនៅតែត្រូវបានរៀបចំនៅកម្ពុជាសារជាថ្មី ដោយគ្រាន់តែមិនដឹងថាពេលណាកំណត់បាន ។
កម្ពុជានឹងបើកការប្រកួតកីឡាប្រដាល់គុនខ្មែរ ជើងឯកអាស៊ីអាគ្នេយ៍ ចាប់ពីថ្ងៃទី១៧ ដល់ថ្ងៃទី២៤ ខែតុលា ឆ្នាំ២០២១ ដោយមានបណ្ដាកីឡាករមកពីប្រទេសមួយចំនួនចូលរួមដណ្ដើមមេដាយ។ ការរៀបចំគឺដើម្បីផ្សព្វផ្សាយក្បាច់គុនខ្មែរ អោយកាន់តែមានការទទួលស្គាល់ ដែលនេះត្រូវបានគេមើលឃើញថាគឺជាយុទ្ធសាស្ត្រធ្វើអោយក្បាច់គុនប្រដាល់ខ្មែរ ខ្ទរខ្ទារខ្លាំងដូចគ្នាដូចគ្នានឹងកីឡាមួយថៃរបស់ថៃ។
កីឡាករកម្ពុជាមួយចំនួនក៏ត្រូវបានគេសម្រាំងដើម្បីបង្អូតសមត្ថភាពផងដែរ ដោយអ្នកគាំទ្រភាគច្រើនរំពឹងថា កម្ពុជានឹងក្ដោបក្ដាប់មេដាយបានច្រើនក្នុងនាមជាម្ចាស់ផ្ទះផង។ នេះមិនមែនជាលើកទី១ទេ ដែលកម្ពុជាគៀគរកីឡាករបរទេសអោយមកប្រកួតនៅស្រុកខ្មែរ តែអាចចាត់ទុកថាគឺជាការៀបចំទ្រង់ទ្រាយផ្លូវការក្រោមការចាត់ចែងរបស់សហព័ន្ធ ដែលអាចរាប់ថាគឺជាការដណ្ដើមមេដាយរបស់ប្រទេស និង ប្រទេស ដែលសហព័ន្ធប្រដាល់កម្ពុជារៀបចំឡើង។ យ៉ាងណាក៏ដោយ ក្ដីស្រម៉ៃមួយនេះ ត្រូវបានប្រកាសលើកពេល ខណៈដែលកាលបរិច្ឆេទជាថ្មី ក៏អាចមើលមិនទាន់ឃើញ។ រដ្ឋមន្ត្រីក្រសួងអប់រំ យុវជន និងកីឡា បានផ្ញើលិខិតមួយ ទៅកាន់លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ តាំងពីប៉ុន្មានថ្ងៃមុន សំណើរអោយលុបចោល ដោយសារតែហេតុផលកូវីត១៩នៅតែបន្តរៀលដាល។
លិខិតនោះសរសេរថា« ដោយយោងលើស្ថានភាពមិនទាន់ធូរស្បើយនៃការរីករាលដាលជំងឺកូវីដ-១៩ ដូច្នេះ ក្រសួងអប់រំ យុវជន និងកីឡា បានសម្រេចជាគោលការណ៍ឲ្យសហព័ន្ធកីឡាប្រដាល់គុនខ្មែរ ផ្អាកការប្រកួតជើងឯកអាស៊ីអាគ្នេយ៍»។ ការសម្រេចលុបនេះ នៅតែត្រូវបានអ្នកពាក់ព័ន្ធការប្រដាល់ជជែកវែកញែក ខណៈដោយអ្នកខ្លះក៏ថាជារឿងល្អ តែអ្នកខ្លះក៏ថាជារឿងសោកស្ដាយ និងថាគឺជារឿងធ្វើអោយកីឡាករបាក់ទឹកចិត្ត និងលែងចង់ត្រៀមខ្លួនជាថ្មី បើទោះជាមានការសម្រេចប្រកួតជាថ្មី។
លោក ពេជ្រ សូផែន អគ្គលេខាធិការរង សហព័ន្ធកីឡាប្រដាល់គុនខ្មែរ ទទួលបន្ទុកការងារបច្ចេកទេស និងការងារព័ត៌មាន បានបញ្ជាក់ថា ការសម្រេចផ្អាកនេះ មិនទាន់កំណត់ពេលវេលាឡើងវិញទេ ឬក៏អាចពន្យារពេលដល់ឆ្នាំ២០២២។ លោកថាគឺជារឿងសោកស្ដាយ តែសហព័ន្ធក៏មិនអាចប្រថុយប្រថានក្នុងការរៀបចំផងដែរ។ លោកថាហេតុផលនៃការប្រកាសផ្អាក គឺទី១កូវីតផ្ទុះឡើងកាន់ខ្លាំង ដែលពិបាករៀបចំការប្រកួតដែលតម្រូវអោយជួបជុំ។ ទី២គឺកីឡាករមកពីប្រទេសខ្លះសម្រេចលុបចោល ដែលមិនអាចអោយកម្ពុជាធ្វើជាម្ចាស់ផ្ទះដោយមោទនភាព។
គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) រូបនេះ បានសរសេរលើហ្វេសប៊ុកបន្ថែមថា «តាមគម្រោង សហព័ន្ធបានជូនដំណឹងដល់បណ្តាប្រទេសទាំងអស់ក្នុងអាស៊ានរួចរាល់ ហើយអំពីការត្រៀមរៀបចំនេះ ប៉ុន្តែដោយសារការផ្អាកនេះ មិនទាន់ច្បាស់លាស់ពីការចូលរួមថា តើមានកីឡាករប៉ុន្មាននាក់ មកពីប្រទេសណាខ្លះនៅឡើយទេ ទើបកម្ពុជាសម្រេចលុបចោលតែម្ដង»។ លោកថាកម្ពុជាមិនចង់ធ្វើជាម្ចាស់ផ្ទះក្នុងភាពស្រពិចស្រពិលទេ ហើយបើទោះជាបានលុបចោលមែន តែការប្រកួតមួយនេះ គឺកម្ពុជានៅតែចិញ្ចឹមចិត្តធ្វើឡើង។ អគ្គលេខាធិការរងរូបនេះ បង្ហាញការរំពឹងថា កម្ពុជានឹងអាចរៀបចំការប្រកួតនេះក្រោយពេលស្ថានភាពជំងឺកូវីដ-១៩បានធូរស្បើយ ដើម្បីបង្កើនសមត្ថភាពកីឡាករជម្រើសជាតិប្រដាល់គុនខ្មែរ ឲ្យកាន់តែមានសក្តានុពល ត្រៀមឆ្ពោះទៅស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ពាក់ព័ន្ធនឹងការប្រកាសលុបចោលខាងលើនេះ លោក មាស សុខគ្រី ជាគណកម្មការប្រដាល់ និងជាគ្រូបង្វឹកមួយរូប និយាយថា ការលុបបែបនេះគឺជារឿងដ៏ល្អដើម្បីសុវត្ថិភាពកីឡាករ ប៉ុន្តែលោកក៏បារម្ភផងដែរថា តើនៅពេលសម្រេចរៀបចំការប្រកួតជាថ្មី តើនឹងអាចមានកីឡាករល្អៗ ចូលប្រកួតទៀតទេ។ លោកថា ការសម្រេចលុបចោល គឺតែងតែមានទាំងលទ្ធផលវិជ្ជមាន និងអវិមាន ប៉ុន្តែក្នុងនាមជាអ្នកទទួលខុសត្រូវលើកីឡាករមួយរូប លោកថា បើទោះជាដល់ពេលនោះកីឡាករខ្លះបែរជាហួសដឺឡេ ឬមិនចូលប្រកួតលើរេញ ក៏បណ្ដាក្លិបទាំងអស់ នឹងបណ្ដុះកីឡាករល្អៗ ថ្មីៗ ដើម្បីជំនួសផងដែរ ថ្វីត្បិតតែកម្លាំងជំនួសវាអាចមិនដូចកីឡាករល្អៗដែលមានស្រាប់។
គួរបញ្ជាក់ផងដែរថា នាពេលកន្លងមកសហព័ន្ធកីឡាប្រដាល់គុនខ្មែរ បានត្រៀមរៀបចំវិញ្ញាសា ក្នុងការប្រកួតជើងឯកកម្រិតអាស៊ាននេះ មានចំនួន១០ប្រភេទទម្ងន់ ដូចជាប្រភេទទម្ងន់ ៤៥គីឡូក្រាម, ៤៨, ៥១, ៥៤, ៥៧, ៦០, ៦៣.៥, ៦៧, ៧១ និងទម្ងន់ ៨១គីឡូក្រាម។ កីឡាករដែលត្រៀមនៅក្នុងព្រឹត្តិការណ៍ក៏ម្នាក់ៗប្រឹងប្រែងណាស់ ប៉ុន្តែចុងក្រោយគឺសម្រេចលុបចោល ដោយសារកូវីត១៩ បង្កនូវផលប៉ះពាល់ ៕
ចែករំលែកព័តមាននេះ