ខេត្តបន្ទាយមានជ័យ ៖ ចោរប្រដាប់អាវុធបានធ្វើសកម្មភាពប្លន់អាជីវករលក់មាសប្តូរប្រាក់២នាក់ម្តាយកូន ពេលកំពុងជិះម៉ូតូចេញពីផ្ទះ ដែលហេតុការណ៍ប្លន់នេះបង្កការភ្ញាក់ផ្អើលទាំងព្រឹកវេលាម៉ោងជាង៧ថ្ងៃទី២៤ កុម្ភៈ នៅភូមិក្បាលស្ពាន១
ខេត្តបន្ទាយមានជ័យ ៖ ចោរប្រដាប់អាវុធបានធ្វើសកម្មភាពប្លន់អាជីវករលក់មាសប្តូរប្រាក់២នាក់ម្តាយកូន ពេលកំពុងជិះម៉ូតូចេញពីផ្ទះ ដែលហេតុការណ៍ប្លន់នេះបង្កការភ្ញាក់ផ្អើលទាំងព្រឹកវេលាម៉ោងជាង៧ថ្ងៃទី២៤ កុម្ភៈ នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ដោយប្លន់យកអស់គ្រឿងអលង្ការ និងប្រាក់ជាច្រើន ។
គ្រួសាររងគ្រោះក្នុងអំពើប្លន់នេះ ប្តីឈ្មោះ ចំរើន សែ អាយុ៥០ឆ្នាំ ជាអនុប្រធានការិយាល័យប្រតិបត្តិស្រុកអូរជ្រៅ នៃមន្ទីរពេទ្យបង្អែកក្រុងប៉ោយប៉ែត ។ ឯប្រពន្ធឈ្មោះ សយ សុផាន់ណា អាយុ៤៥ឆ្នាំ និងកូនស្រីឈ្មោះ រ័ត្ន វិច្ឆិកា អាយុ១១ឆ្នាំ ។ គ្រួសារនេះមានទីលំនៅក្នុងភូមិកើតហេតុ ។
ស្ត្រីរងគ្រោះប្រាប់កោះសន្តិភាពថា មុនកើតហេតុគាត់ជិះម៉ូតូម៉ាកស្គូពី ពណ៌ស ពាក់ស្លាកលេខ បន្ទាយមានជ័យ 1K-6506 ពីរនាក់កូនស្រីចេញពីផ្ទះគ្រោងទៅតូបលក់ដូរនៅផ្សាររ៉ាថ្មីក្នុងភូមិប៉ោយប៉ែតដូចសព្វមួយដង ។ គាត់បន្តថា ទើបតែចេញពីផ្ទះទៅទិសខាងលិចបានប្រហែល៤០ម៉ែត្រប៉ុណ្ណោះ ដល់មុខស្នាក់ការសង្កាត់ជលផលក្រុងប៉ោយប៉ែត ស្រាប់តែមានចោរប្លន់២នាក់ជិះម៉ូតូបញ្ច្រាស់ទិសមកពាំងពីមុខជាប់ ។ ដោយចោរទាំង២នាក់មានអាវុធខ្លីគ្រប់ដៃ បានភ្ជង់គាត់និងកូនស្រីទារយកសោចាក់កែបម៉ូតូប្រមូលយកអស់ទ្រព្យសម្បត្តិជាគ្រឿងអលង្ការ និងប្រាក់ជាច្រើនដែលគាត់លាក់ទុក ។ បន្ទាប់មកក៏ជិះម៉ូតូគេចទៅទិសខាងកើតបាត់ស្រមោលទៅ ។
ប្រភពពីកន្លែងកើតហេតុបាននិយាយថា អំពើរប្លន់នេះអ្នកស្រុកមិនមាននរណាម្នាក់ហ៊ានជួយទេ មិនតែប៉ុណ្ណោះអ្នកខ្លះបែរជាក្រាបពួនទៀតផងព្រោះក្រុមចោរបានរេកាណុងកាំភ្លើងពេញផ្លូវមុនពេលគេចខ្លួន ។ ទំហំទ្រព្យសម្បត្តិដែលក្រុមចោរប្លន់នេះ គ្រួសាររងគ្រោះមិនត្រូវបានលម្អិតប្រាប់អ្នកយកព័ត៌មានទេដោយប្រាប់ថាពួកគាត់បានផ្តល់ព័ត៌មានឲ្យសមត្ថកិច្ចអស់ហើយ ។
តាមរបាយការណ៍បឋមពីសមត្ថកិច្ចបានឲ្យដឹងថា ទ្រព្យសម្បត្តិរបស់ជនរងគ្រោះដែលបាត់បង់ រួមមានប្លាទីនគ្រឿងត្បូង ជាចិញ្ចៀន៣ថាសប្រហែល៨០វង់ ក្នុង១វង់ៗមានតម្លៃពី២.០០០បាតទៅ៥.០០០បាតប្រាក់ថៃ,ខ្សែក៨ខ្សែមិនទាន់កំណត់តម្លៃ, ខ្សែដៃ៤០ខ្សែក្នុងមួួយខ្សែៗតម្លៃពី៣.០០០បាតដល់១០.០០០ ម៉ឺនបាត ក្នុងនោះគ្រឿងទទួលបញ្ចាំពីគេមួយចំនួនទៀតសរុបជាទឹកប្រាក់មានប្រាក់ខ្មែរ២លានរៀល, ប្រាក់ថៃ១០ម៉ឺនបាត និងប្រាក់អាមេរិក ៣.០០០ដុល្លារ ។
នៅព្រឹកកើតហេតុក្រោយមានអំពើរប្លន់នេះបានកើតឡើងធ្វើឲ្យអាជីវករលក់មាសប្តូរប្រាក់តាមផ្សារមួយចំនួនពិសេសផ្សារត្រីក្នុងភូមិបាលិលេយ្យសង្កាត់ប៉ោយប៉ែតបានបិទតូបព្រោងព្រាត តែបានបើកលក់វិញនៅព្រឹកថ្ងៃដដែល ។ សមត្ថកិច្ចបង្ហើបថាជនសង្ស័យក្នុងអំពើរប្លន់ប្រើប្រាស់អាវុធម៉ាកK59តកាណុង ព្រោះក្រោយកើតហេតុក្រុមចោរបានជ្រុះស្រោមកាំភ្លើងខ្លី១ នៅកន្លែងកើតហេតុ ។
គួរបញ្ជាក់ថារយៈ៣ថ្ងៃជាប់គ្នានេះ សមត្ថកិច្ចមកពីស្នងការដ្ឋាននគរបាលខេត្ត ទាំងនគរបាលក្រុងប៉ោយប៉ែត បានបើកប្រតិបត្តិការល្បាតឆែកត្រួតពិនិត្យរកបទល្មើស និងការពារសន្តិសុខនៅក្រុងប៉ោយប៉ែត ទាំងយប់ទាំងថ្ងៃផ្ទុយទៅវិញអំពើប្លន់នៅតែកើតមានដដែល ។ ពេលនេះសមត្ថកិច្ចកំពុងធ្វើការស្រាវជ្រាវរកមុខសញ្ញាជនសង្ស័យគ្រប់ច្រកល្ហកនៅក្នុងក្រុង ដោយសារតែក្រុមចោរទាំងនេះបានចាក់ចង្កេះសមត្ថកិច្ច ខណៈការរឹតបន្តឹងផ្នែកសន្ដិសុខ ពិសេសគោលដៅការពារអាជីវករលក់មាសប្ដូរប្រាក់ បានដាក់ពង្រាយតាំងពីចុងឆ្នាំកន្លងមក ស្របពេលដែលមានករណីប្លន់គួរឱ្យភ្ញាក់ផ្អើលនៅតាមខេត្តនានា បានកើតរឿងបន្តបន្ទាប់ ។ ទោះបីជាបែបណា ក្រុមចោរមិនបានប្លន់តូបលក់មាសនោះទេ បែរជាប្លន់ពេលអាជីវករលក់មាសចេញពីផ្ទះទៅតូបលក់ដូររបស់ខ្លួន ។
មានការកត់សម្គាល់ឃើញថា ការធ្វើសកម្មភាពប្លន់ដូចផ្លេកបន្ទោរនេះបានបង្ហាញថា រាល់សកម្មភាពរបស់អាជីវករលក់មាស ត្រូវបានពួកចោរឃ្លាំមើលមុនពេលប្លន់ ។ ដោយឡែកសម្រាប់អ្នករងគ្រោះនេះ ក្រុមចោរបានដឹងទៀតថា គ្រៀងអលង្ការ និងប្រាក់ត្រូវបានម្ចាស់លាក់ក្នុងម៉ូតូស្គូពីដែលជិះ ទើបពេលភ្ជង់ប្លន់ ចោរបង្គាប់ឱ្យចាក់សោបើកកែបម៉ូតូ ហើយប្រមូលយកអស់គ្មានសល់ ។
ព័ត៌មានចុងក្រោយ
ក្រោយអំពើប្លន់នៅភូមិក្បាលស្ពាន១ សង្កាត់ប៉ោយប៉ែត នាព្រឹកថ្ងៃទី២៤ ខែកុម្ភៈ នៅវេលារសៀលថ្ងៃដដែល ជនសង្ស័យ២នាក់ ត្រូវបានសមត្ថកិច្ចឃាត់ខ្លួន ក្នុងនោះម្នាក់ឈ្មោះ យ៉េន ធូ ភេទប្រុស អាយុ៣៧ឆ្នាំ ស្រុកកំណើតនៅឃុំគងជ័យ ស្រុកអូររាំងឪ ខេត្តត្បូងឃ្មុំ និងម្នាក់ឈ្មោះ ហេង មិនទាន់ស្គាល់នាមត្រកូលស្នាក់នៅផ្ទះជួលក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។ ដោយឡែកអ្នកពាក់ព័ន្ធម្នាក់ទៀត សមត្ថកិច្ចកំពុងតាមប្រមាញ់នៅឡើយ ។
យ៉ាងណាក៏ដោយ សមត្ថកិច្ចពុំទាន់នាំជនសង្ស័យទៅបង្ហាញកន្លែងលាក់ទុកគ្រឿងអលង្ការ និងប្រាក់ដែលប្លន់នៅឡើយទេ ។ ប្រភពព័ត៌មាននិយាយថា ជនសង្ស័យឈ្មោះ យ៉េន ធូ បានសារភាពពីអំពើប្លន់នេះហើយ ។
ចំណែកជន២នាក់ផ្សេងទៀត ដែលសមត្ថកិច្ចព័ទ្ធចាប់ជាមួយរថយន្តកាមរីបាឡែន ពណ៌ខៀវមួយគ្រឿង នៅភូមិផ្សារកណ្តាល សង្កាត់ផ្សារកណ្តាល នារសៀលថ្ងៃដដែលនោះមិនជាប់ពាក់ព័ន្ធនឹងអំពើប្លន់នេះទេ ។ តាមព័ត៌មានឲ្យដឹងថា រថយន្តមួយគ្រឿងនេះបើកប៉ះគេហើយក៏បានបើករត់ លុះចំពេលសមត្ថកិច្ចកំពុងតាមស្វែងរកចាប់ចោរប្លន់ក៏ត្រូវឃាត់ខ្លួន តែក៏បានដោះលែងវិញ ព្រោះមិនពាក់ព័ន្ធនឹងអំពើប្លន់នេះទេ ។
គួរបញ្ជាក់ថា ការឃាត់ខ្លួនជនសង្ស័យទាំង២ខាងលើ ធ្វើឡើងនៅហាងផឹកស៊ីស្រះបេះដូង ស្ថិតក្នុងភូមិមិត្តភាព សង្កាត់ប៉ោយប៉ែត ខណៈពួកគេកំពុងផឹកស៊ីធ្វើដូចជាមិនដឹងរឿងអី្វ។ សមត្ថកិច្ចជំនាញពាក់ព័ន្ធ បានបង្ហាញពីភាពសស្រាក់សស្រាំក្នុងការងារនេះ មិនថានគរបាលមកពីស្នងការដ្ឋានខេត្ត អាវុធហត្ថខេត្តនិងក្រុងទេ ក្នុងនោះក៏មាននគរបាលការពារព្រំដែនគោកលេខ៩១១ និងលេខ៨៩១ផងដែរ៕
ចែករំលែកព័តមាននេះ