មកដឹងពីជំហរកីឡាកររត់ប្រណាំង១រូប បើទោះជាស៊ីហ្គេមនៅវៀតណាមមិនច្បាស់លាស់
- ភ្នំពេញ
រាជធានីភ្នំពេញ ៖ ថ្វីត្បិតតែកីឡាស៊ីហ្គេមនៅវៀតណាមនៅមិនទាន់ច្បាស់ថាធ្វើ ឬសម្រេចលុបចោល តែក្រឡេកមកមើលកីឡាករ
រាជធានីភ្នំពេញ ៖ ថ្វីត្បិតតែកីឡាស៊ីហ្គេមនៅវៀតណាមនៅមិនទាន់ច្បាស់ថាធ្វើ ឬសម្រេចលុបចោល តែក្រឡេកមកមើលកីឡាករកីឡាការិនីជាច្រើនក៏នៅតែមានការត្រៀមខ្លួន។ ជាក់ស្ដែង កីឡាករជម្រើសជាតិអត្តពលកម្មកម្ពុជា យ៉ាតវិទូ ច័ន្ទទិវា ដែលត្រៀមរត់ប្រណាំងលើវិញ្ញារត់ល្បឿនលឿន ក៏នៅតែមានការតាំងចិត្តខ្ពស់ណាស់ដែរ ក្នុងការហ្វឹកហាត់លើវិញ្ញាសារត់ល្បឿន ១០០ម៉ែត្រ ២០០ម៉ែត្រ និង៤០០ម៉ែត្រនៅស៊ីហ្គេម។
យុវជនវ័យ២១ឆ្នាំរូបនេះ អះអាងថា កន្លងមកធ្លាប់បានចូលរួមប្រកួត ក្នុងព្រឹត្តិការណ៍អន្តរជាតិបាន៤លើក ដោយទទួលបានចំណាត់លេខ៦ ក្នុងវគ្គជម្រុះផងដែរ។ ដូច្នេះ បូករួមការហ្វឹកហាត់បន្ថែម នៅទីលានស្តង់ដារនៃកីឡដ្ឋានជាតិ មរតកតេជោ និងការចេញទៅហ្វឹកហាត់នៅប្រទេសចិនទៀតនោះ នឹងជួយជំរុញឲ្យសមត្ថភាពវិវឌ្ឍទៅរកដណ្តើមមេដាយជាក់ជាមិនខាន។
យ៉ាតវិទូ ច័ន្ទទិវា ជឿជាក់ថា ការជួយជំរុញពីគ្រូបង្វឹក និងការផ្តល់កម្លាំងចិត្តគាំទ្រពីថ្នាក់ដឹកនាំ នឹងជួយឲ្យខ្លួនទទួលបានជោគជ័យពីការប្រកួតលើឆាកអន្តរជាតិ សម្រាប់ខ្លួនឯង និងក្រុមគ្រួសារ ជាពិសេសគឺជូនជាតិ ពីការប្រកួតស៊ីហ្គេម នៅវៀតណាម នាអំឡុងពាក់កណ្តាលឆ្នាំ២០២២ ប្រសិនបើព្រឹត្តិការណ៍ហ្គេមដ៏ធំប្រចាំតំបន់មួយនេះ មិនមានអ្វីប្រែប្រួលទេនោះ។ មិនខុសពីកីឡាករកីឡាការិនីផ្សេងទៀត ពួកគេម្នាក់ៗ ក៏នៅតែបង្ហាញពីការត្រៀមខ្លួនផងដែរ ដោយមិនមានអ្នកណាម្នាក់រយាលដៃពីការហ្វឹកហាត់នោះទេ ជាពិសេសនៅពេលពួកគេដឹងថា កីឡាស៊ីហ្គេមនៅវៀតណាមនឹងអាចលុបចោល ប្រសិនបើប្រទេសវៀតណាម នៅតែមិនព្រមកំណត់ពេលវេលារៀបចំអោយច្បាស់ក្នុងកិច្ចប្រជុំនាខែតុលាខាងមុខ។
យោងតាមការបញ្ជាក់របស់លោក វ៉ាត់ ចំរើន លោកមានប្រសាសន៍ថា «គណៈអចិន្ដ្រៃយ៍របស់ក្រុមប្រឹក្សាកីឡាអាស៊ីអាគ្នេយ៍ បានផ្ដល់លទ្ធភាពឲ្យវៀតណាមនៅខែតុលាខាងមុខ នៅពេលប្រជុំគណៈអចិន្ដ្រៃយ៍ម្ដងទៀត ត្រូវសម្រេចឲ្យបានថា វៀតណាម ធ្វើនៅពេលណា? បើវៀតណាមមិនសម្រេចទេ នឹងមានការសម្រេចចិត្តក្នុងប្រទេសអាស៊ានទាំងអស់ថា នឹងមានការលុបចោល ឬក៏ផ្អាកការធ្វើជាម្ចាស់ផ្ទះរបស់វៀតណាម ហើយផ្ទេរភាពជាប្រធានមកឲ្យកម្ពុជាតែម្ដង ដើម្បីយើងធ្វើដំណើរទៅឲ្យស្រួល និងស្របតាមកម្មវិធី ដែលកម្ពុជាយើងជាម្ចាស់ផ្ទះ មានភាពជាអ្នកដឹកនាំច្បាស់លាស់ មានអ្នកដឹកនាំច្បាស់លាស់ ពីព្រោះដល់វេណយើង យើងជាប្រធានដឹកនាំការរៀបចំស៊ីហ្គេម»។
លោកបានបញ្ជាក់ទៀតថា សម្រាប់ពេលនេះ គឺកីឡាករជម្រើសជាតិ នៅតែត្រូវបានកំណត់អោយហ្វឹកហាត់ ទាំងក្នុងនឹងក្រៅប្រទេសដើម្បីត្រៀមខ្លួនដដែល ប៉ុន្តែបើមានការសម្រេចលុបចោលការប្រកួតនៅវៀតណាមពិតមែន ក៏មិនមានបញ្ហានោះដែរ គឺចាត់ទុកថា ការប្រឹងប្រែងរបស់កីឡាករទាំងប៉ុន្មាន គឺដើម្បីត្រៀមខ្លួនសម្រាប់ស៊ីហ្គេម២០២៣ ក្នុងពេលកម្ពុជាធ្វើជាម្ចាស់ផ្ទះខ្លួនឯងទៅវិញ។
គួរបញ្ជាក់ផងដែរថា កីឡាករ យ៉ាតវិទូ ច័ន្ទទិវា ជាកីឡាករអត្តពលកម្មជម្រើសជាតិឈុតថ្នាល ទើបជាប់ជាជម្រើសជាតិឈុតធំ នៅក្នុងឆ្នាំ២០២១នេះ កំពុងហ្វឹកហាត់លើវិញ្ញាសារត់ល្បឿន ១០០ម៉ែត្រ, ២០០ម៉ែត្រ និង៤០០ម៉ែត្រ ប៉ុន្តែវិញ្ញាសាដែលសង្ឃឹមខ្ពស់ថា នឹងអាចឈានដល់កម្រិតមេដាយបាននោះ គឺវិញ្ញាសា២០០ម៉ែត្រ និង៤០០ម៉ែត្រ ៕
ចែករំលែកព័តមាននេះ