ប្រទេសវៀតណាម ៖ ទោះបីជាក្រុមអ្នកជំនាញបានព្យាករថា អត្រាការប្រាក់កម្ចីនឹងកើនឡើងក្នុងឆ្នាំ២០១៦នេះក្តី ក៏មន្ត្រីធនាគារជាតិវៀតណាមមួយរូបជឿជាក់ថា ការរក្សាអត្រាការប្រាក់ឲ្យមានស្ថិរភាពនោះនឹងអាចកាត់បន្ថយបន្តិចម្តងៗ
ប្រទេសវៀតណាម ៖ ទោះបីជាក្រុមអ្នកជំនាញបានព្យាករថា អត្រាការប្រាក់កម្ចីនឹងកើនឡើងក្នុងឆ្នាំ២០១៦នេះក្តី ក៏មន្ត្រីធនាគារជាតិវៀតណាមមួយរូបជឿជាក់ថា ការរក្សាអត្រាការប្រាក់ឲ្យមានស្ថិរភាពនោះនឹងអាចកាត់បន្ថយបន្តិចម្តងៗ គឺជារឿងមួយដែលសំខាន់ទៅវិញ ។
លោក Bui Quoc Dung អគ្គនាយកផ្នែកគោលនយោបាយរូបិយប័ណ្ណនៃធនាគារជាតិវៀតណាម ឲ្យដឹងថា ៖ « ទោះបីជាធនាគារជាតិបានសម្រេចរក្សាអត្រាការប្រាក់របស់ខ្លួនឲ្យមានស្ថិរភាពនៅឆ្នាំនេះក្តី ក៏ធនាគារត្រូវមានវិធានការកាត់បន្ថយអត្រាការប្រាក់រយៈពេលមធ្យម និងរយៈពេលវែងក្នុងឆ្នាំនេះដែរ ហើយនៅមានកត្តាជាច្រើនទៀតនឹងដាក់សម្ពាធលើអត្រាការប្រាក់នេះ ។ កត្តាទី១ គឺអត្រាអតិផរណាត្រូវបានគេព្យាករថា នឹងមានប្រមាណពី៤% ទៅ៥%នៅឆ្នាំនេះ បើធៀបនឹងឆ្នាំមុនបានកើនឡើង០,៦% ពោលគឺវាអាចដាក់សម្ពាធដល់អត្រាការប្រាក់បញ្ញើតែម្តង » ។
លោកបន្តថា ៖ « តម្រូវការឥណទាន ក៏ត្រូវបានគេព្យាករថា នឹងមានការកើនឡើងដែរនៅឆ្នាំនេះ ខណៈគោលដៅកំណើនផលិតផលក្នុងស្រុករបស់រដ្ឋាភិបាលមាន៦,៧% បើធៀបនឹងឆ្នាំមុនស្មើនឹង៦,៦៨% និង៥,៨៨% ជាមធ្យមនៅក្នុងអំឡុងឆ្នាំ២០១១-២០១៥ » ។
លើសពីនេះទៀត នឹងមានសម្ពាធធ្ងន់ធ្ងរជាច្រើនទៀតទៅលើអត្រាការប្រាក់រយៈពេលមធ្យម និងរយៈពេលវែងនៅឆ្នាំនេះ ខណៈអត្រាការប្រាក់បំណុលរបស់រដ្ឋាភិបាលមានរយៈពេល៥ឆ្នាំ ដែលផុតកំណត់កាលពីឆ្នាំមុន បានកើនឡើងយ៉ាងខ្លាំងពី៥,៤% ដល់ជិត៧% ។ ក្នុងនោះដែរ តម្រូវការបំណុលរដ្ឋាភិបាលក្នុងឆ្នាំនេះត្រូវគេរំពឹងថា មានអត្រាខ្ពស់បើធៀបនឹងឆ្នាំមុន ។ នេះបើតាមប្រសាសន៍របស់លោក Bui Quoc Dung ។
ទន្ទឹមនឹងនេះ ដើម្បីកាត់បន្ថយការប្រាក់ឲ្យធ្លាក់ចុះបន្តិចតាមគោលដៅដែលបានកំណត់នោះ គឺត្រូវធ្វើកំណែទម្រង់ និងអនុវត្តតាមវិធានការដូចនៅឆ្នាំ២០១៥ដែរ ។ ធនាគារកណ្តាលក៏បានអនុវត្តវិធានការផ្សេងទៀតដែរដើម្បីកាត់បន្ថយអត្រាការប្រាក់តាមដែលអាចធ្វើទៅបាន ស្របនឹងគោលដៅគោលនយោបាយរូបិយប័ណ្ណ ។
កន្លងមក ក្រុមអ្នកជំនាញបានព្រួយបារម្ភថា អត្រាការប្រាក់អាចនឹងកើនឡើងនៅឆ្នាំនេះ បន្ទាប់ពីធ្លាក់ចុះទាបក្នុងរយៈពេលពីរបីឆ្នាំកន្លងមក ។ នេះគួរតែអរគុណដល់ប្រព័ន្ធធនាគារដែលបានកាត់បន្ថយអត្រាការប្រាក់កម្ចីមកនៅត្រឹមពាក់កណ្តាល ពោលគឺបានកាត់បន្ថយពី២០% ក្នុងឆ្នាំ២០១១ មកនៅត្រឹម៩%-១១% នៅឆ្នាំនេះ សម្រាប់កម្ចីធម្មតា និង៦,៥%សម្រាប់កម្ចីចាំបាច់ ដែលស្មើនឹងអត្រាការប្រាក់នៅក្នុងឆ្នាំ២០០៦ ។
បើយោងតាមរបាយការណ៍ចុះផ្សាយកាលពីសប្តាហ៍មុន ក្រុមហ៊ុនមូលបត្រ MBS បានព្យាករថា តម្រូវការឥណទានខ្ពស់អាចនឹងធ្វើឲ្យអត្រាការប្រាក់នៅខែក្រោយកើនឡើងបន្តិច។ អត្រាការប្រាក់អន្តរធនាគារនៅពាក់កណ្តាលខែមករា និងដើមខែកុម្ភៈ ឆ្នាំ២០១៦ បានកើនឡើងគួរឲ្យកត់សម្គាល់ ដោយសារតែការផ្លាស់ប្តូរនៃប្រព័ន្ធធនាគារក្នុងអំឡុងពេលចូលឆ្នាំចិន ។
ជាងនេះទៀត ទោះបីជាធនាគារជាតិបានផ្តល់ប្រាក់ជាច្រើនទៅកាន់ទីផ្សាអន្តរធនាគារក្នុងអំឡុងពេលចូលឆ្នាំចិនក្តី ក៏ការប្រែប្រួលរបស់ប្រព័ន្ធធនាគារបានបង្ហាញនូវសញ្ញាតឹងរឹុងថា អត្រាការប្រាក់របស់អន្តរធនាគារនៅតែមានអត្រាខ្ពស់៥,២%ក្នុងមួយឆ្នាំ បើធៀបនឹងរយៈពេល២សប្តាហ៍មុនបានកើនឡើង៥,១% ។
យោងតាមស្ថិតិរបស់ធនាគារជាតិវៀតណាមបង្ហាញថា គ្រឹះស្ថានឥណទានចំនួន១៤គ្រឹះស្ថានបានដំឡើងអត្រាការប្រាក់បញ្ញើរបស់ខ្លួនពី០,១% ទៅ០,៥%ក្នុងមួយឆ្នាំ ដោយបែកចែកតាមដំណាក់កាល ដែលអាចធ្វើឲ្យអត្រាការប្រាក់កម្ចីកើនឡើងនៅពេលក្រោយទៀតផង ។
ចំពោះធនាគារវិញ ចាំបាច់ត្រូវតែបង្កើនអត្រាការប្រាក់បញ្ញើដើម្បីទាក់ទាញអតិថិជនរបស់ខ្លួន ។ ទោះជាយ៉ាងណា ប្រសិនបើធនាគារគ្មានតុល្យភាពចំពោះតម្លៃចេញ-ចូលទេនោះ ពួកគេអាចនឹងដំឡើងការប្រាក់កម្ចីជាក់ជាមិនខាន ។ ជាក់ស្តែង អត្រាការប្រាក់ទាបនឹងធ្វើឲ្យប្រព័ន្ធធនាគារប្រឈមមុខនឹងហានិភ័យ ។
បើតាមអ្នកជំនាញផ្នែកធនាគារ លោក Nguyen Tri Hieu ឲ្យដឹងថា ៖ « លោកមិនឃើញសញ្ញាណាមួយបញ្ជាក់ថា អត្រាការប្រាក់នៅឆ្នាំនេះអាចនឹងធ្លាក់ចុះឡើយ ខណៈអត្រាការប្រាក់ដែលបានព្យាករអាចនឹងកើនឡើងយ៉ាងហោចណាស់ក៏១% ដែរ ។ ហេតុផលមួយទៀតដែលធ្វើឱ្យអត្រាការប្រាក់កើនឡើងនោះ ដោយសារតែគេព្យាករថា វានឹងមានស្ថិរភាព ដូច្នេះ គម្លាតរវាងអត្រាការប្រាក់ដុង និងដុល្លារ ត្រូវតែមានកម្រិតខ្ពស់គួរសមដើម្បីទាក់ទាញឲ្យមានកំណើនប្រាក់បញ្ញើដុង ។ កំណើនសេដ្ឋកិច្ចនៅឆ្នាំនេះ អាចជំរុញដល់មូលធនតម្រូវការឱ្យកាន់តែខ្ពស់ ដែលនឹងធ្វើឲ្យអត្រាការប្រាក់កើនឡើង » ៕
ចែករំលែកព័តមាននេះ