អភិបាលក្រុងមួយនៅអាល្លឺម៉ង់គ្រោងដំឡើងថ្លៃចតឡានដល់៦០០% ព្រោះហេតុផលម្យ៉ាង
អាល្លឺម៉ង់ ៖ យោងតាមសារព័ត៌មាន The Guardian បានចេញផ្សាយកាលពីថ្ងៃទី២២ ខែកញ្ញា បានឱ្យដឹងថា អភិបាលក្រុង
អាល្លឺម៉ង់ ៖ យោងតាមសារព័ត៌មាន The Guardian បានចេញផ្សាយកាលពីថ្ងៃទី២២ ខែកញ្ញា បានឱ្យដឹងថា អភិបាលក្រុង Tubingen នាភាគខាងត្បូងប្រទេសអាល្លឺម៉ង់ទទួលការកោតសរសើរ រួមនិងការទិតៀនចំពោះផែនការថ្មី ដើម្បីដំឡើងថ្លៃចតរថយន្តដល់ទៅ៦០០% ក្នុងកិច្ចខិតខំប្រឹងប្រែងដើម្បីរារាំងរថយន្តចេញក្រៅ។
លោក Boris Palmer សមាជិកគណបក្ស Greens បានឈ្នះការគាំទ្រជាបឋមចំពោះសំណើរបស់គាត់ ដើម្បីដំឡើងថ្លៃចតរថយន្តប្រចាំឆ្នាំពី៣០អឺរ៉ូ ឡើងដល់១៨០អឺរ៉ូ។
ដើមឡើយ លោកបានជំរុញឱ្យមានការបង់ថ្លៃរហូតដល់៣៦០អឺរ៉ូ ប៉ុន្តែសំណើនេះ មិនទទួលបានការគាំទ្រគ្រប់គ្រាន់ពីមន្ត្រីសាលាក្រុងនៅក្នុងគណៈកម្មាធិការអាកាសធាតុនោះទេ។
ប្រភពពីកាសែត Stuttgarter Zeitung បានឱ្យដឹងថា សម្រាប់តម្លៃ១៨០អឺរ៉ូនឹងត្រូវអនុវត្តលើរថយន្តម៉ាស៊ីនចំហេះដែលមានទំងន់លើសពី១៨០០គីឡូក្រាម ក៏ដូចជារថយន្តអគ្គិសនីដែលមានទំងន់លើសពី២០០០គីឡូក្រាម។
លោក Palmer និយាយថា មនុស្សនៅលើសន្តិសុខសង្គមនឹងបង់ថ្លៃសេវាពាក់កណ្តាលនៃតម្លៃធម្មតា។ ហើយករណីលើកលែងត្រូវធ្វើឡើងចំពោះជនពិការ និងបុគ្គលិកថែទាំ ដែលពឹងផ្អែកលើយានយន្តពួកគេ ដើម្បីអាចបំពេញការងារ។ ហើយគោលបំណងនៃការដំឡើងថ្លៃចតរថយន្តនេះ គឺដើម្បីបញ្ចុះបញ្ចូលអ្នកបើកបរ ឱ្យទុកយានយន្តពួកគេនៅផ្ទះ ហើយងាកមកប្រើមធ្យោបាយសាធារណៈជំនួសវិញ។
ដូចគ្នានិងទីក្រុងនៅអាល្លឺម៉ង់ដទៃទៀតដែរ ទីក្រុង Tubingen មានគោលបំណងចង់ក្លាយជាទីក្រុងបៃតង ដែលគ្មានការបញ្ចេញឧស្ម័នបំពុលបរិស្ថាននៅឆ្នាំ២០៣០ ។ ទន្ទឹមជាមួយគ្នា ទីប្រជុំជន និងទីក្រុងដទៃទៀត ក៏កំពុងរៀបចំផែនការស្រដៀងគ្នា។ ហើយសំណើររបស់ទីក្រុង Tubingen ទទួលការគាំទ្រយ៉ាងទូលំទូលាយពីអ្នកធ្វើយុទ្ធនាការដើម្បីបរិស្ថាន។
យ៉ាងណាមិញ ការសម្រេចចុងក្រោយ នឹងត្រូវពិភាក្សាដោយក្រុមប្រឹក្សាក្នុងស្រុកនៅចុងខែកញ្ញានេះ។ ប៉ុន្តែលោក Palmer ត្រូវបានរាយការណ៍ថា ធានាបានការគាំទ្រចាំបាច់ ដែលជាឆ្អឹងខ្នងនៃកម្មវិធីការពារអាកាសធាតុ ដែលក្រុមប្រឹក្សាបានយល់ព្រមជាចម្បង ៕
ចែករំលែកព័តមាននេះ