ខេត្តបាត់ដំបង ៖ ក្រុមឈ្មូញដែលរកស៊ីដឹកផ្លែឈើចូលពីប្រទេសថៃ តាមច្រកទ្វារអន្តរជាតិ«ដូង»ស្រុកកំរៀង រាប់សិបនាក់បានបើករថយន្តប្រភេទម៉ាកសាំយ៉ុង(១២កៅអី)រាប់សិបគ្រឿង ទៅឈប់កកកុញនៅខាងមុខស្នាក់ការគយនិងរដ្ឋាក«ដូង»ដើម្បីធ្វើការតវ៉ាសុំបញ្ចុះតំលៃបង់ប្រាក់ នៅព្រឹកថ្ងៃទី២៣ កញ្ញា នេះ ក្រោយពីមន្ត្រីគយ នៃស្នាក់ការនេះជំរិតទារប្រាក់បង់ក្បាលរថយន្តច្រើនៗពេក ដែលធ្វើពួកគេមួយចំនួនគ្មានសល់ប្រាក់ចំណេញ។
ក្រុមអ្នកតវ៉ាបានផ្ដល់ព័ត៌មានពីកន្លែងកើតហេតុមកថា អ្នកតវ៉ារាប់សិបនាក់ ដែលភាគច្រើនសុទ្ធតែឈ្មូញដឹកផ្លែឈើ បានផ្អាកដឹកផ្លែឈើមួយថ្ងៃ ហើយបាននាំគ្នាបើករថយន្តរៀងៗខ្លួន ទៅជួបជុំគ្នានៅខាងមុខស្នាក់ការគយ និងរដ្ឋាក «ដូង» នៅស្រុកកំរៀង ដើម្បីធ្វើការតវ៉ាទាមទារឲ្យមន្ត្រីគយ នៃស្នាក់ការនេះបញ្ជុះតំលៃបង់ក្បាលរថយន្តដឹកផ្លែឈើ។ ប្រភពដដែលបានបញ្ជាក់ថា កន្លងមកនេះ មន្ត្រីគយប្រចាំស្នាក់ការនេះ បានបង្ខំទារប្រាក់ពីក្រុមឈ្មូញដឹកផ្លែឈើ ក្នុងរថយន្តសាំយ៉ុងមួយគ្រឿង ត្រូវបង់ប្រាក់ចន្លោះពី ១០ម៉ឺន ទៅ១៥ម៉ឺន ឬ រហូតដល់២០ម៉ឺនរៀលឯណោះ។
ហើយមិនមែនបង់តែមន្ត្រីគយមួយកន្លែងនេះទេ នៅបង់ឲ្យពួកកុងត្រោលជជុះបណ្ដាក់គ្នាដូចខ្យងហូរហែ នៅតាមដងផ្លូវជាបន្តបន្តាប់ទៀត ទម្រាំទៅដល់ទីផ្សារ។ ដូច្នេះ ធ្វើឲ្យពួកគាត់មិនអាចលក់ប្រាក់ចំណេញទេ។ ក្រុមអ្នកដឹកផ្លែឈើបានបញ្ជាក់បន្ថែមថា ពួកគាត់ដែលមកតវ៉ានេះ គឺសុំឲ្យមន្ត្រីគយបន្ធូរបន្ថយតំលៃមកនៅត្រឹមពី៥ម៉ឺន ទៅ៦ម៉ឺនរៀល ក្នុងរថយន្តមួយគ្រឿង តែខាងភាគីគយមិនយល់ព្រមតាមការស្នើសុំទេ។ នៅកន្លែងប្រមូលផ្ដុំគ្នាតវ៉ាខាងលើនេះ គេឃើញលោកអភិបាលរងស្រុកកំរៀងម្នាក់ បានចុះអន្តរាគមន៍ ជួយសម្របសម្រូលរវាងភាគីគយនិងក្រុមឈ្មូញដឹកផ្លែឈើ។ ប៉ុន្តែបើតាមមន្ត្រីរដ្ឋបាលស្រុកកំរៀង បាននិយាយថា ភាគីទាំង០២មិនបានត្រូវរ៉ូវគ្នាទេ បើទោះជាអាជ្ញាធរស្រុក បានប្រឹងប្រែងជួយសម្របសម្រួលក្ដី។
មន្ត្រីរូបនេះបានប្រាប់ថា អាជ្ញាធរបានសម្របសម្រូល ហៅតំណាងអ្នកតវ៉ាប៉ុន្មាននាក់ឲ្យជួយដោះស្រាយជាមួយមន្ត្រីគយដែរ តែភាគីគយបានគ្រវីក្បាល មិនឯកភាពតាមការទាមទាបញ្ចុះតំលៃពីភាគីអ្នកតវ៉ាទេ។ ការជួបរកដំណោះស្រាយបានបរាជ័យ ខណៈក្រុមអ្នកតវ៉ានៅតែបន្តប្រមូលផ្ដុំគ្នាទាំងមនុស្សទាំងរថយន្តកកកុញលើដងផ្លូវ ខាងមុខស្នាក់ការគយ ដែលធ្វើឲ្យមានការព្រួយបារម្ភយ៉ាងខ្លាំងអំពីការឆ្លងរាលដាលនូវជំងឺកូវីដ១៩។ កោះសន្តិភាព មិនអាចទំនាក់ទំនងសុំការបំភ្លឺពីប្រធានស្នាក់ការគយនិងរដ្ឋាក «ដូង» ឬ មន្ត្រីគយណាម្នាក់ប្រចាំស្នាក់ការនេះបានភ្លាមៗនៅឡើយទេ នៅរសៀលថ្ងៃទី២៣ កញ្ញានេះ។
ប៉ុន្តែបើតាមប្រភពព័ត៏មានពីមន្ត្រីស្រុកកំរៀង បាននិយាយថា ការចរចាររកដំណោះស្រាយរវាងក្រុមឈ្មូញដឹកផ្លែឈើ និង មន្ត្រីគយ រកច្រកចេញមិនរួចទេ ដោយសារភាគីគយ មិនឯកភាពតាមសំណូមពរខាងភាគីឈ្មូញដឹកផ្លែឈើ។ ប៉ុន្តែនៅសៀលថ្ងៃដដែលនេះ អាជ្ញាធរខេត្ត នឹងចុះអន្តរាគមន៍ជួយសម្របសម្រូលរឿងនេះបន្ត តែមិនដឹកថា ទៅមុខរួចឬអត់នោះទេ។
សូមរំលឺកថា កន្លងមកមន្ត្រីគយប្រចាំស្នាក់ការខាងលើនេះ បានប៉ះទង្គិចជាមួយឈ្មូញដឹកផ្លែឈើច្រើនលើកហើយ ដោយសារតែជំរិតទាប្រាក់ពីអ្នកដឹកផ្លែឈើច្រើនៗពេក។ ពេលខ្លះ មន្ត្រីគយខាងលើនេះ បានបើករថយន្តប្រដេញរថយន្តដឹកផ្លែឈើផ្អើលពេញផ្លូវទៀតផង ដោយសារអ្នកដឹកផ្លែឈើ មិនព្រមបង់ប្រាក់។ បើតាមឈ្មូញដឹកផ្លែឈើ ឬ ដឹកទំនិញផ្សេងៗ បាននិយាយថា មន្ត្រីគយខាងលើនេះ បានទាប្រាក់ពីឈ្មូញរកស៊ីតាមទំនើងចិត្ត ហើយក៏គ្មានការចេញវិក័យបត្របង់ប្រាក់តាមច្បាប់ទម្លាប់ដែរ។
ពួកគេបានត្អូញត្អែរថា អ្នកដឹកផ្លែឈើ ត្រូវចំណាយប្រាក់យ៉ាងតិចចន្លោះពី៣០ម៉ឺន ទៅ ៤០ម៉ឺនរៀល ក្នុងរថយន្តសាំយ៉ុងមួយគ្រឿង សម្រាប់បង់ឲ្យមន្ត្រីគយ និងបង់តាមកុងត្រោលជជុះនានា ដែលបណ្ដាក់គ្នាដូចខ្យងនៅតាមដងផ្លូវ ចាប់ពីព្រំដែនថៃ រហូតដល់ទីផ្សារក្នុងក្រុងបាត់ដំបង។ ដូច្នេះ ពួកគេគ្មានសល់ប្រាក់ចំណេញសម្រាប់ចិញ្ចឹមជីវភាពគ្រួសារទេ ហើយបើរថយន្តខូចទៀត ប្រាដកជាខាតបង់ចូលដើមហើយ។ ពោល គឺសព្វថ្ងៃរកប្រាក់សម្រាប់តែចិញ្ចឹមមន្ត្រីគយ និងពួកកុងត្រោលជជុះតែប៉ុណ្ណោះ ៕
ចែករំលែកព័តមាននេះ