ខេត្តកំពង់ស្ពឺ ៖ ស្រ្តីក្រីក្រកូន៣នាក់ក្នុងបន្ទុកនិងប្តីជាកម្មករសំណង់នៅភ្នំពេញ បានខ្ចីលុយធនាគារភូមិចំនួន១៨០០ដុល្លារ និងបានបង់រំលស់នៅសល់ប្រមាណ៧៣ម៉ឺនរៀលគឺ៣ខែទៀតដាច់ ត្រូវបុគ្គលិកធនាគារភូមិយកសោទៅចាក់ទ្វារផ្ទះដាក់ស្លាកលក់ ក្រោយពេលស្រ្តីនោះបានយកលុយទៅបង់មិនទាន់ពេលវេលាកំណត់ ។
ស្រ្តីដែលអះអាងថាខ្លួនជាជនរងគ្រោះឈ្មោះ អៀង គីម អាយុ៤១ឆ្នាំ និងប្តីឈ្មោះ ចក់ សៅ អាយុ៣៤ឆ្នាំ រស់នៅក្នុងភូមិអង់សខ្នាយ ឃុំមហាប្ញស្សី ស្រុកគងពិសី ។
បើតាមសាច់ញាតិបានឲ្យដឹងនៅរសៀលថ្ងៃទី១៩ កុម្ភៈ ២០១៦ថា មូលហេតុដែលនំាឲ្យខាងបុគ្គលិកធនាគារភូមិចាក់សោទ្វារផ្ទះនិងដាក់ស្លាកលក់តម្លៃ១លានរៀលនោះ ដោយសារកាលពីថ្ងៃទី២៩ មករា ២០១៦ ស្រ្តីម្ចាស់ផ្ទះបានយកលុយ២០ម៉ឺនរៀលទៅបង់នៅវេលាម៉ោងជាង៥ល្ងាច ខណៈធនាគារកំណត់បិទម៉ោង៤រសៀល ក៍ត្រូវបុគ្គលិកបា្រប់ថា ហួសពេលបិទទ្វារមិនទទួលឡើយ ។
លុះពេលយកលុយទៅបង់នៅថ្ងៃបន្តបន្ទាប់ទៀត ធនាគារនៅតែមិនព្រមទទួលក៍វិលចូលមកភ្នំពេញធ្វើការសំណង់ជាមួយប្តីវិញ ស្រាប់តែសាច់ញាតិបា្រប់ថា ផ្ទះត្រូវធនាគារចាក់សោដាក់ស្លាកលក់កាលពីថ្ងៃទី០៣ កុម្ភៈ ក៍បានវិលមកវិញឃើញដូចការនិយាយបា្រប់ និងសុំញាតិជិតខាងស្នាក់នៅបណ្តោះអាសន្ន ។
ស្រ្តីក្រីក្រ អៀង គីម និងប្តី បានលើកដៃសំពះសុំឲ្យធនាគារយោគយល់ទទួលយកលុយដែលត្រូវបង់នៅសល់តែ៣ខែទៀតដាច់ និង ប្រគល់ផ្ទះមកឲ្យវិញ ។
យ៉ាងណាក៍ដោយ មកដល់ម៉ោង៣រសៀលថ្ងៃទី១៩ កុម្ភៈ ២០១៥ គេហទំព័រកោះសន្តិភាពបានទូរស័ព្ទទៅធនាគារភូមិដើម្បីសុំការបំភ្លឺ ប៉ុន្តែទូរស័ព្ទចូលជាច្រើនលើកពុំមានអ្នកលើកទទួល ៕
ចែករំលែកព័តមាននេះ