តើអ្នកធ្លាប់ឆ្ងល់ទេថាហេតុអ្វីបានជាអ្នកពិបាកផ្តាច់បារី? ថ្ងៃនេះ អ្នកបានស្គាល់ពីមូលហេតុនេះ។

ការជក់បារីគឺជាទម្លាប់ដ៏ពិបាកក្នុងផ្តាច់ ព្រោះថ្នាំជក់មានផ្ទុកសារធាតុគីមីម្យ៉ាងឈ្មោះនីកូទីនដែលធ្វើឱ្យញៀនខ្លាំង។ លើសពីនេះទៅទៀត អ្នកជក់បារីម្នាក់ៗញៀននឹងការរួមបញ្ចូលគ្នានៃសារធាតុរំញោចសតិអារម្មណ៍ ដែលមាននៅក្នុងបារី។ នៅពេលអ្នកចាប់ផ្តើមជក់បារីដំបូង អ្នកអាចមានអាការៈចង់ក្អួត វិលមុខ ឈឺក្បាល ឬឈឺក្រពះ ប៉ុន្តែយូរៗ ទៅនៅពេលដែលការជក់បារីរបស់អ្នកក្លាយជាទម្លាប់ រាងកាយរបស់អ្នកនឹងស៊ាំជាក់ជាមិនខាន។ ការស៊ាំនេះ ក៏មានន័យថា រាងកាយរបស់អ្នកត្រូវការសារធាតុនីកូទីនបន្ថែមទៀត ដើម្បីអាចមានអារម្មណ៍ដូចពេលការជក់បារីដំបូងៗ។

ជាតិនីកូទីនចូលទៅក្នុងចរន្តឈាម ហើយទៅដល់ខួរក្បាលលឿនជាងថ្នាំដែលចូលរាងកាយតាមរយៈសរសៃរបស់យើង។ ជាតិនីកូទីនប៉ះពាល់ដល់ផ្នែកជាច្រើននៃរាងកាយ។ វាផ្លាស់ប្តូររបៀបដែលរាងកាយប្រើអាហារ (ការរំលាយអាហារ) បណ្តាលឱ្យបេះដូងរបស់យើងលោតលឿន ជីពចររបស់យើងលឿន។ វាបង្កើនសម្ពាធឈាម ហើយសរសៃឈាមវ៉ែនចាប់ផ្តើមរួមតូច ដែលបណ្តាលឱ្យលំហូរឈាមក្នុងរាងកាយកាន់តែពិបាក។

ជាតិនីកូទីនក៏ធ្វើឱ្យផ្នែកជាក់លាក់មួយនៃខួរក្បាលរបស់អ្នក ដែលធ្វើឱ្យអ្នកមានអារម្មណ៍សប្បាយរីករាយ តាមរយៈការរំញោចការបញ្ចេញអរម៉ូនដូប៉ាមីន។ ការបញ្ចេញសារធាតុដូប៉ាមីន នៅពេលស្រូបជាតិនីកូទីន ត្រូវបានគេគិតថាជាប្រភពនៃអារម្មណ៍រីករាយដែលអ្នកជួបប្រទះនៅពេលជក់បារី ដែលអាចរួមបញ្ចូលទាំងការបន្ធូរអារម្មណ៍ និងការបន្ធូរភាពតានតឹង។

ប៉ុន្តែបន្ទាប់ពីអ្នកជក់បារីពីរបីដង ជាតិនីកូទីនចាប់ផ្តើមចុះខ្សោយសមត្ថភាពក្នុងការមានអារម្មណ៍រីករាយ ដែលនេះបណ្តាលឱ្យអ្នកត្រូវការជាតិនីកូទីនបន្ថែមដើម្បីឱ្យនៅតែមានអារម្មណ៍ល្អ។ នេះគឺជាវដ្តនៃទម្លាប់ជក់បារី ដែលធ្វើឱ្យអ្នកពិបាកផ្តាច់បារី៕