នៅសល់តែពីរថ្ងៃទៀតទេ រដូវបុណ្យភ្ជុំបិណ្ឌនឹងចូលមកដល់ហើយសូមអស់លោកអ្នកឈ្វេងយល់អំពីពួកប្រេតដែលអាចទទួលអាហារដែលញាតិ មិត្តឧទ្ទិសទៅឱ្យក្នុងរដូវបុណ្យភ្ជុំបិណ្ឌដូចតទៅ៖ ប្រជាជនខ្មែរទូទៅ ជាពិសេសពុទ្ធសាសនិកខ្មែរតែងបានដឹង បានឮអំពីរឿងពាក់ព័ន្ធទៅនឹងពាក្យថា ប្រេត ឬសត្វប្រេត តាមរយៈព្រះសង្ឃទេសនាខ្លះ តាមរយៈការសិក្សាស្រាវជ្រាវនូវគម្ពីរដីកាពុទ្ធសាសនាខ្លះ…
នៅសល់តែពីរថ្ងៃទៀតទេ រដូវបុណ្យភ្ជុំបិណ្ឌនឹងចូលមកដល់ហើយសូមអស់លោកអ្នកឈ្វេងយល់អំពីពួកប្រេតដែលអាចទទួលអាហារដែលញាតិ មិត្តឧទ្ទិសទៅឱ្យក្នុងរដូវបុណ្យភ្ជុំបិណ្ឌដូចតទៅ៖ ប្រជាជនខ្មែរទូទៅ ជាពិសេសពុទ្ធសាសនិកខ្មែរតែងបានដឹង បានឮអំពីរឿងពាក់ព័ន្ធទៅនឹងពាក្យថា ប្រេត ឬសត្វប្រេត តាមរយៈព្រះសង្ឃទេសនាខ្លះ តាមរយៈការសិក្សាស្រាវជ្រាវនូវគម្ពីរដីកាពុទ្ធសាសនាខ្លះ និងរឿងនិទាននានាអំពីរឿងប្រេត ក៏ដូចជាបុព្វហេតុដែលញ៉ាំងឱ្យបុគ្គល ឬសត្វលោកភ្លាត់សតិទៅកើតក្នុងបេតវិស័យ ឬកំណើតជាសត្វប្រេត ។ ប្រេត ជាកំណើតក្នុងអបាយភូមិមួយក្នុងចំណោម កំណើតអបាយភូមិទាំង៤ពោលគឺ នរក ប្រេត អសុរកាយ និងតិរច្ឆាន ។
ក្នុងរដូវភ្ជុំបិណ្ឌនេះ តើមានប្រេតប៉ុន្មានពួកដែលអាចទទួលអាហារអំពីញាតិដែលឧទ្ទិសឱ្យ ? តាមទ្រឹស្តីព្រះពុទ្ធសាសនាបានពន្យល់ថា មានប្រេតតែ៤ពួកប៉ុណ្ណោះគឺ :
១- បរទត្តូបជីវិក: ប្រេតដែលចិញ្ចឹមជីវិតដោយអាស្រ័យលើអាហារដែលអ្នកដទៃឧទ្ទិសឱ្យ ។
២- ខុប្បិបាសិកវន្ត: ប្រេតដែលរងសេចក្តីទុក្ខលំបាក ព្រោះស្រេកឃ្លានជានិច្ច ។
៣- និជ្ឈាមតណ្ហិក: ប្រេតដែលសោយទុក្ខវេទនាត្រូវភ្លើងដុតឱ្យក្ដៅជានិច្ច ។
៤- កាលកញ្ជិក: ប្រេតក្នុងពួកអសុរកាយ ឬជាឈ្មោះរបស់អសុរកាយ ដែលជាប្រេត ។
ចំណែកខាងទានដែលទាយក ទាយិកាទាំងឡាយបានធ្វើហើយ អាចឧទ្ទិសបានចំពោះតែពួកប្រេត៣ពួកខាងលើប៉ុណ្ណោះ ។ នេះបើតាមសេចក្តីបញ្ជាក់របស់លោកគ្រូ សែម សូរ នៅក្នុងសៀវភៅប្រជុំភាណវារពិសេសបាលីប្រែយ៉ាងដូច្នេះថា ប្រេតដែលអាចទទួលផលដែលញាតិឧទ្ទិសឱ្យបានមាន៣ពួកគឺ ខុប្បិបាសិកវន្តប្រេត១ បរទត្តូបជីវិកប្រេត១ និងនិជ្ឈាមតណ្ហិកប្រេត១តែប៉ុណ្ណោះ ។ ត្រង់ចំណុចនេះ ច្បាប់់ខ្លះចែងថា មានតែក្រុមប្រេត បរទត្តូបជីវិកៈមួយប្រភេទប៉ុណ្ណោះ ដែលអាចទទួលផលបុណ្យដែលក្រុមញាតិ ឬបុគ្គលដទៃៗឧទ្ទិសឱ្យនារដូវបុណ្យភ្ជុំបិណ្ឌ ។
ក្នុងន័យមួយទៀតពាក្យថា ប្រេត មានន័យថា អ្នកដែលបានស្លាប់ ឬអ្នកដែលបានលាលោកនេះទៅកាន់លោកខាងមុខ ឬសត្វដែលស្រេកឃ្លានជានិច្ច ។
ព្រះបរមពោធិសត្វនៃយើងរាប់តាំងពីទ្រង់បានទទួលនូវពុទ្ធព្យាករណ៍អំពីសំណាក់ព្រះសព្វញ្ញុពុទ្ធ ទ្រង់ព្រះនាមទីបង្ករ ដែលកាលណោះ ព្រះអង្គទ្រង់យោនយកព្រះកំណើតក្នុងត្រកូលព្រាហ្មណ៍ មាននាមថា សុមេធបណ្ឌិត ជួបនាងព្រាហ្មណី នាមនាង សុមិត្តា មក រហូតដល់ទ្រង់យោនយកកំណើតចុងក្រោយជា ព្រះសិទ្ធត្ថៈ គោតម ជាកំណើតបានត្រាស់ដឹងជាព្រះពុទ្ធ មិនដែលកើតក្នុងកំណើតប្រេត៣ពួកខាងក្រោមនេះឡើយ ៕ សាន សារិន
ចែករំលែកព័តមាននេះ