ខេត្តពោធិ៍សាត់ ៖ ឯកឧត្តមទេសរដ្ឋមន្ត្រី គន់ គីម ណែនាំឲ្យរៀបចំចងក្រងរចនាសម្ព័ន្ធ ក្រុមការងារសង្គ្រោះ និងការពង្រឹងសមត្ថភាពបន្ថែមទៀត ដើម្បីធានាសុវត្ថិភាពជូនប្រជាពលរដ្ឋដែលរងគ្រោះ មហន្តរាយផ្សេងៗ…
ខេត្តពោធិ៍សាត់ ៖ ឯកឧត្តមទេសរដ្ឋមន្ត្រី គន់ គីម ណែនាំឲ្យរៀបចំចងក្រងរចនាសម្ព័ន្ធ ក្រុមការងារសង្គ្រោះ និងការពង្រឹងសមត្ថភាពបន្ថែមទៀត ដើម្បីធានាសុវត្ថិភាពជូនប្រជាពលរដ្ឋដែលរងគ្រោះ មហន្តរាយផ្សេងៗ ។
ឯកឧត្តមទេសរដ្ឋមន្ត្រី គន់ គីម មានប្រសាសន៍បែបនេះ នៅក្នុងពិធីប្រគល់សម្ភារ និងគ្រឿងបំពាក់ដល់កងប្រតិបត្តិការ និងសង្គ្រោះគ្រោះមហន្តរាយ ដល់កងពលតូចអន្តរាគមន៍លេខ១៤ នៅថ្ងៃទី១៧ ខែកញ្ញា នៅទីបញ្ជាការកងអន្តរាគមន៍លេខ១៤ ក្នុងខេត្តពោធិ៍សាត់ ។
ឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ តំណាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា មានប្រសាសន៍ថា ការប្រគល់ឧបករណ៍ សម្ភារបច្ចេកទេសទាំងនេះ គឺជាការគិតគូរមួយរបស់សម្តេចតេជោ ហ៊ុន សែន ក្នុងការពង្រឹងសមត្ថភាព ក្រុមការងារជួយសង្គ្រោះ ពេលហេតុការណ៍គ្រោះមហន្តរាយផ្សេងៗ ដូចជាការបាក់រលំអគារ គ្រោះមហន្តរាយបណ្តាលមកពីធម្មជាតិ និងឧប្បត្តិហេតុផ្សេងៗ ទាំងលើគោក លើទឹក និងលើអាកាសផងដែរ ។
ឯកឧត្តមបញ្ជាក់ថា មើលឃើញតម្រូវការខ្ពស់ចំពោះសមត្ថភាព និងជំនាញ ក៏ដូចជាឧបករណ៍ សម្ភារបច្ចេកទេស ដើម្បីបម្រើដល់ប្រតិបត្តិការសង្គ្រោះ សម្តេចតេជោ ហ៊ុន សែន ក៏បានចាត់ចែងបញ្ជាឲ្យរៀបចំចងក្រងរចនាសម្ព័ន្ធក្រុមការងារសង្គ្រោះឲ្យបានច្បាស់លាស់ និងហ្វឹកហ្វឺនបន្ថែមលើសមត្ថភាពរបស់ពួកគេផងដែរ ។
ជាមួយគ្នានេះ ឯកឧត្តមនាយឧត្តមសេនីយ៍ គន់ គីម បានស្នើដល់បុគ្គលិកកងប្រតិបត្តិការរុករកសង្គ្រោះ ចងចាំថា ការងាររុករកសង្គ្រោះ គឺជាកិច្ចការប្រកប ដោយគ្រោះថ្នាក់បំផុត ដែលតម្រូវឲ្យបុគ្គលិកមានវិន័យខ្ពស់ ថែទាំសុខភាពឲ្យបានមាំមួន អភិវឌ្ឍន៍សមត្ថភាពជំនាញជានិច្ច ធ្វើលំហាត់ និងធ្វើការហ្វឹកហ្វឺនជាប្រចាំ ។
ឯកឧត្តមនាយឧត្តមសេនីយ៍ គន់ គីម បង្ហាញក្តីសង្ឃឹមថា វគ្គបណ្តុះបណ្តាលនឹងផ្តល់នូវចំណេះដឹងថ្មី របៀបប្រើប្រាស់ និងបទពិសោធន៍ ហើយបុគ្គលិក រុករកសង្គ្រោះទាំងអស់ និងខិតខំរៀនសូត្របំពេញភារកិច្ចដុះខាត់ច្នៃប្រឌិត បច្ចេកទេស ឲ្យបានល្អប្រសើរថែមទៀត ក្នុងស្មារតីទទួលខុសត្រូវថែរក្សាការពារ ឧបករណ៍ សម្ភារប្រកបដោយប្រសិទ្ធភាពខ្ពស់ ។
ឯកឧត្តមទេសរដ្ឋមន្ត្រីបានបន្ថែមថា ការបម្រែបម្រួលអាកាសធាតុនៅលើពិភពលោកនាពេលបច្ចុប្បន្ន ក៏បានជះឥទ្ធិពលមិនល្អដល់កម្ពុជាផងដែរ ពីមួយឆ្នាំទៅមួយឆ្នាំ កម្ពុជាតែងតែជួបនូវគ្រោះ មហន្តរាយនានា ដែលបណ្តាលមកពីកត្តាធម្មជាតិដូចជាខ្យល់ព្យុះ និងទឹកជំនន់ជាដើម ។ បន្ថែមពីលើកត្តាធម្មជាតិនេះ កម្ពុជា ក៏ប្រឈមនឹងឧប្បត្តិហេតុផ្សេងៗ កើតចេញពីសកម្មភាពរបស់មនុស្សគ្រាដែលសង្គមជាតិកំពុងមានការអភិវឌ្ឍនោះ ។ រាជរដ្ឋាភិបាលកម្ពុជា បាននិងកំពុងយកចិត្តទុកដាក់ខ្ពស់ក្នុងការបង្កើនសមត្ថភាពក្រុមសង្គ្រោះ ដើម្បីឆ្លើយតបនឹងឧប្បត្តិហេតុផ្សេងៗដែលអាចកើតមាន ៕
ចែករំលែកព័តមាននេះ