ខេត្តមណ្ឌលគិរី ៖ មុខសញ្ញាលួចដ៏សកម្មមួយក្រុមត្រូវបាននគរបាលចាប់ឃាត់ខ្លួន ក្រោយពួកគេធ្វើសកម្មភាពលួចសម្ភាររបស់ប្រជាពលរដ្ឋតាមផ្ទះ តាមចំការជាច្រើនកន្លែង ដែលការឃាត់ខ្លួនធ្វើឡើងនៅថ្ងៃទី១៤ កញ្ញា វេលាម៉ោង០៨និង១០នាទីព្រឹក ។
លោកវរសេនីយ៍ឯក កាន់ ពេញ អធិការនគរបាលក្រុងសែនមនោរម្យបានឲ្យដឹងថា ដោយមានការបញ្ជាយ៉ាងម៉ឺងម៉ាត់ពីលោកឧត្តមសេនីយ៏ទោ ឡោ សុខា ស្នងការនគរបាលខេត្ត និងមានការសម្របសម្រួលដោយ ឯកឧត្តម ម៉ម វ៉ាន់ដា ព្រះរាជអាជ្ញាអមសាលាដំបូងខេត្ត កម្លាំងអធិការដ្ឋាននគរបាលក្រុងសែនមនោរម្យនិងកម្លាំងប៉ុស្តិ៍នគរបាលរដ្ឋបាលស្ពានមានជ័យ បានឃាត់ខ្លួនជនសង្ស័យករណីលួចត្រង់ចំណុចភូមិចំការតែនិងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី បានជនសង្ស័យចំនួន០៤នាក់ក្នុងនោះ ៖
១/.ឈ្មោះសំរិត.ពៅ ភេទប្រុស ជនជាតិខ្មែរ អាយុ២៧ឆ្នាំ មុខរបរកម្មករជាងដែក ស្រុកកំណើតភូមិកំពង់រាំងឃុំសេដាស្រុកតំបែរខេត្តត្បូងឃ្មុំបច្ចុប្បន្នរស់នៅភូមិចំការតែសង្កាត់ស្ពានមានជ័យក្រុងសែនមនោរម្យខេត្តមណ្ឌលគិរី។
២/.ឈ្មោះវុធ.ដារ៉ា ភេទប្រុស ជនជាតិខ្មែរ អាយុ២៧ឆ្នាំ មុខរបរជាងឈើ ស្រុកកំណើតស្រុកសំបូរខេត្តក្រចេះ បច្ចុប្បន្នរស់នៅភូមិឡៅកាសង្កាត់សុខដុមក្រុងសែនមនោរម្យខេត្តមណ្ឌលគិរី។
៣/.ឈ្មោះផុន.សីហា ភេទស្រី ជនជាតិខ្មែរអាយុ២៦ ឆ្នាំ មុខរបរកសិករស្រុកកំណើតភូមិកំពង់ក្របៅឃុំកំពង់ក្របៅស្រុកស្ទឹងសែនខេត្តកំពង់ធំបច្ចុប្បន្នរស់នៅភូមិអូរស្ពានសង្កាត់ស្ពានមានជ័យក្រុងសែនមនោរម្យខេត្តមណ្ឌលគិរី។
៤/.ឈ្មោះរី.ពេជ្រ ភេទប្រុសជនជាតិខ្មែរ អាយុ២១ឆ្នាំមុខរបរមិនពិតប្រាកដ ស្រុកកំណើតនិងទីលំនៅភូមិពូត្រុំសង្កាត់រមនាក្រុងសែនមនោរម្យខេត្តមណ្ឌលគិរី។
សម្ភារវត្ថុតាងដកហូតបានរួមមាន: ១/.អាគុយចំនួន០៣។ ២/.សឡាចំនួន០៦តូច០៥ធំ០១។ ៣/.អាវុធកែច្នៃបាញ់គ្រាប់កង់ចំនួន០១ដើម។ ៤/.ម៉ាស៊ីនគោយន្តភ្ជាប់ជាមួយឌីណាម៉ូចំនួនមួយឈុត។ ៥/.ម៉ូទ័រកាត់ចំនួន០១។ ៦/.ម៉ូទ័របូមទឹកចំនួន០១។ ៧/.ដាវចំនួន០១ដើម។ ៨/.ម៉ូតូម៉ាកអ៊ិចសង់ទ័រចំនួនមួយគ្រឿងពណ៌ខៀវ។
បច្ចុប្បន្នកម្លាំងផ្នែកជំនាញអធិការដ្ឋាននគរបាលក្រុងសែនមនោរម្យកំពុងតែសាកសួរនិងកសាងសំណុំរឿងអនុវត្តតាមនីតិវិធី៕
ចែករំលែកព័តមាននេះ