រាជធានីភ្នំពេញ ៖ កម្ពុជាកំពុងធ្វើដំណើរឆ្ពោះទៅស្តារសេដ្ឋកិច្ច សង្គមឡើងវិញក្រោយពីការរាតត្បាតជំងឺកូវីដ ១៩ អស់រយៈពេលពីរឆ្នាំមកនេះ ដោយសារយុទ្ធសាស្ត្រវ៉ាក់សាំង ។ វ៉ាក់សាំងបានផ្តល់នូវភាពសុំាសហគមន៍សង្គម ត្រូវគេរំពឹងថា កម្ពុជាអាចអនុញ្ញាតទទួលភ្ញៀវទេសចរបរទេសនៅចុងឆ្នាំនេះ ហើយសកម្មភាពសេដ្ឋកិច្ចអាចអាចដំណើការខណៈសាលារៀនបានផ្តើមជាដំណាក់កាល ប៉ុន្តែពលរដ្ឋអ្នកលក់ដូរតិចតូចនានានៅតាមចិញ្ជើមផ្លូវក្នុងក្រុងភ្នំពេញនៅតែត្អូញពីការបាត់ចំណូល ពិបាកប្រកបកិច្ចចិញ្ចឹមគ្រួសារ ដោយសារតែកូវីដ ១៩ នេះនៅឡើយ ។
លោកស្រី ពៅ សំបូរ អាយុជាង ៦០ ឆ្នាំ ជាអ្នកលក់ចំណីសត្វ នៅមុខព្រះបរមរាជវាំង បានប្រកបរបរនេះជាង ២០ ឆ្នាំហើយ បាននិយាយនៅរៀងរាល់ថ្ងៃនេះថា គាត់រកចំណូលមិនបានមួយម៉ឺនរៀលផងនៅក្នុងការចិញ្ចឹមជីវិត ។ មួយម៉ឺនរៀលដែលសឹងមិនរួចថ្លៃធ្វើដំណើរនោះឡើយ ដូច្នេះការផ្គត់ផ្គង់តម្រូវការគ្រួសារមានការលំបាកខ្លាំង ។ ស្ត្រីរូបនេះសង្ឃឹមថា ភាពល្អប្រសើរនឹងមានពេលឆាប់ ដើម្បីឲ្យអ្នករកទទួលទានមួយថ្ងៃសម្រាប់មួយថ្ងៃដូចជាអ្នកស្រីអាចនឹងរកប្រាក់ដូចកាលមុនបាន ។
រីឯលោកស្រី កែ សុភាព វ័យ ៦២ ឆ្នាំ ជាអ្នកលក់ពោតលីងនៅម្តុំសួនច្បារវិមានឯករាជ្យវិញ បានលើកឡើងមិនខុសគ្នានោះឡើយ គាត់សង្ឃឹមថា រដ្ឋាភិបាលនឹងទប់ស្កាត់កូវីដ ១៩ បានល្អប្រសើរធ្វើឲ្យអាចរកចំណូលបានឡើងវិញ ។ អ្នកលក់ដូរតាមចិញ្ជើមផ្លូវខាងលើនេះនិយាយឲ្យដឹងថា មុនពេលមានការរីករាលដាលនៃជំងឺកូវីដ ១៩ លោកស្រីអាចរកចំណូលបានពី ១០ ទៅ ២០ ម៉ឺនរៀលក្នុងមួយថ្ងៃ តែបច្ចុប្បន្នរកសឹងមិនបាន១០ម៉ឺនរៀលផង ។
គួរជម្រាបថា អត្រាឆ្លងជំងឺកូវូដនៅតែមានសភាពធ្ងន់ធ្ងរនៅឡើងដោយអត្រាឆ្លងនៅតែមានចំនួនច្រើន ។ នៅថ្ងៃទី ១២ កញ្ញា ២០២១ ម្សិលមិញកម្ពុជាបានរកឃើញអ្នកឆ្លងថ្មីចំនួន ៦៦២ នាក់ ខណៈចំនួនអ្នកស្លាប់ថ្មីមាន ១២ នាក់និងអ្នកជាសះស្បើយចំនួន ៤៩៣ នាក់ ។ មកថ្ងៃនេះកម្ពុជាមានអ្នកកើតកូវីដ ១៩ សរុបចំនួន ៩៩ ៥០៤ នាក់និងមានពលរដ្ឋបាត់បង់អាយុជីវិត សរុប ២ ០៤០ នាក់ ។
ចំណែកពលរដ្ឋដែលបានចាក់វ៉ាក់សាំង ២ ដូសនៅក្នុងផែនការរបស់រដ្ឋចំនួន ១០ លាននាក់នោះសឹងតែគ្រប់ចំនួនហើយមកដល់ថ្ងៃនេះ ។ គិតត្រឹមថ្ងៃទី ១២ ខែកញ្ញា ឆ្នាំ ២០២១ គឺចាក់បានចំនួន ៩៧,៣៨% ចំណែកកុមារ-យុវវ័យអាយុពី ១២ ឆ្នាំ ទៅក្រោម ១៨ ឆ្នាំ គឺចាក់បាន ៨៦,៨៦% ធៀបជាមួយនឹងប្រជាជនគោលដៅ ១,៩៦៦,៩៣១ នាក់នោះ ។ សាលារាជធានីភ្នំពេញ នៅបន្តបិទអាជីវកម្មមួយចំនួន ដែលមានលក្ខណៈងាយចម្លងកូវីដ ១៩ ចំនួន ១៤ ថ្ងៃបន្តទៀតរហូតដល់ថ្ងៃទី ២៣ ខែកញ្ញាឆ្នាំ ២០២១ ។ វិធានការរឹតបណ្តឹងនេះតែងតែកំណត់នៅក្នុងរយៈពេល ១៤ ថ្ងៃម្តង ៕ ដោយ ៖ ស្រីណែត
ចែករំលែកព័តមាននេះ