ប្រទេសវៀតណាម ៖ តំបន់ដីសណ្តទន្លេមេគង្គបានកំណត់គោលដៅប្រាក់ចំណេញរបស់ខ្លួនចំនួន១៤,៣៤ប៊ីលានដុល្លារអាមេរិកនៃការនាំចេញក្នុងឆ្នាំ២០១៦នេះ បើធៀបនឹងការកើនឡើង១,១៤ប៊ីលានដុល្លារអាមេរិកនៅឆ្នាំមុន ។
បើយោងតាមគណៈកម្មការដឹកនាំភាគពាយ័ព្យឲ្យដឹងថា កាលពីខែមករាកន្លងទៅថ្មីៗនេះ បណ្តាខេត្តនៃតំបន់ដីសណ្តទន្លេមេគង្គ បាននាំចេញទំនិញប្រើប្រាស់ដូចជា គ្រឿងសមុទ្រ អង្ករ សម្លៀកបំពាក់ វាយនភ័ណ្ឌ និងស្បែកជើង សរុបជាទឹកប្រាក់ចំនួន១,០៩ប៊ីលានដុល្លារ ។
វិធានការមួយចំនួនដែលបានបង្កើតឡើងដោយថ្នាក់ដឹកនាំខេត្តនាដើមឆ្នាំនេះ គឺដើម្បីបង្កើនទិន្នផល និងគុណភាពនៃទំនិញនាំចេញ ។ វិធានការនេះមានគម្រោងនាំចេញប្រចាំខែ និងប្រចាំត្រីមាសសម្រាប់ផលិតផលនីមួយៗ ដែលមានការសិក្សាលើតម្រូវការទីផ្សារ និងសកម្មភាពប្រូម៉ូសិនពាណិជ្ជកម្ម ។
ជំនួបពិភាក្សាបានធ្វើឡើងក្រោមការចូលរួមរបស់ប្រធាននៃគណៈកម្មការប្រជាជនខេត្ត និងបណ្តាក្រុមហ៊ុនសហគ្រាសក្នុងមួយខែម្តង ឬក៏ពីរដង ។ ជំនួបពិភាក្សានេះ នឹងផ្តល់ឱកាសឲ្យអាជ្ញាធរពាក់ព័ន្ធក្នុងស្រុកអាចសិក្សាស្វែងយល់ពីផលវិបាកនៃការធ្វើជំនួញផងដែរ ។ ទន្ទឹមនឹងនេះ គោលនយោបាយត្រូវបានរៀបចំឡើងដោយផ្អែកជាពិសេសលើផ្នែករដ្ឋបាលសាធារណៈ និងទុនបម្រុងនៃកម្ចីធនាគារដើម្បីជួយពួកគេជម្នះនូវឧបសគ្គនេះ ក៏ដូចជាជួយពង្រីកវិស័យជំនួញឲ្យកាន់តែរីកចម្រើនថែមទៀត ។
ដោយឡែក ការនាំចេញអង្ករ និងគ្រឿងសមុទ្រនៅក្នុងតំបន់បានជួបនឹងបញ្ហាប្រកួតប្រជែងយ៉ាងក្តៅគគុកពីសំណាក់គូប្រជែងនៅតាមបណ្តាប្រទេសដទៃទៀត ។ ដូច្នេះហើយបានជាអាជ្ញាធរតាមបណ្តាខេត្ត ណែនាំឲ្យកសិករ និងក្រុមហ៊ុនផលិតអាហារគោរពតាមការណែនាំនៃការប្រើប្រាស់ជីគីមី និងថ្នាំសម្លាប់សត្វល្អិតឲ្យបានខ្ជាប់ខ្ជួន ដែលវានឹងផ្តល់អត្ថប្រយោជន៍ដល់គុណភាពអាហារសម្រាប់ធ្វើការនាំចេញទាំងក្នុងស្រុក និងក្រៅស្រុក ។
គួរបញ្ជាក់ដែរថា ការនាំចេញនូវទំនិញប្រើប្រាស់របស់បណ្តាខេត្តនៅតាមតំបន់ដីសណ្តទន្លេមេគង្គ មានទឹកប្រាក់សរុប១៣,២ប៊ីលានដុល្លារកាលពីឆ្នាំមុន ពោលគឺកើនឡើង៤,៤% បើធៀបនឹងរយៈពេលដូចគ្នានៅឆ្នាំ២០១៤ ៕
ចែករំលែកព័តមាននេះ