រាជធានីភ្នំពេញ ៖ ករណីនារីម្នាក់ ជិះម៉ូតូគេចពីគោលដៅ រឹតបន្តឹងច្បាប់ចរាចរណ៍ ត្រូវសមត្ថកិច្ចខណ្ឌ៧មករា មួយរូបយកវិទ្យុទាក់ទង វាយចំក្បាលបែ.កហើយធ្លាក់ពីលើម៉ូតូរងរបួស កាលពីយប់មិញនោះ លោកអធិការរងខណ្ឌ ៧មករា រងចាំភាគី(នារីរងរបួស) ចូលមកសម្របសម្រួលរកដំណោះស្រាយ នៅអធិការដ្ឋាននគរបាលខណ្ឌ៧មករា ។
ហេតុការណ៍នេះបានកើតឡើងនាម៉ោងជិត៨យប់ថ្ងៃទី៨ ខែកញ្ញា ឆ្នាំ២០២១ នៅប៉ុស្តិ៍ត្រួតពិនិត្យបទល្មើសនឹងច្បាប់ចរាចរណ៍ របស់សមត្ថកិច្ច នៃអធិការដ្ឋាននគរបាលខណ្ឌ៧មករា ចំណុចម្ដុំអាងទឹកពហុកីឡដ្ឋានជាតិអូឡាំពិក នៅតាមបណ្ដោយផ្លូវ ២១៥ សង្កាត់វាលវង់ ខណ្ឌ៧មករា រាជធានីភ្នំពេញ ។
មន្ត្រីនគរបាល បានឲ្យដឹងថា ស្ត្រីជាជនរងគ្រោះមានឈ្មោះ ងន ស្រីនិច អាយុ២២ឆ្នាំ ។ រីឯអ្នកឌុប ត្រូវជាប្អូនប្រុសឈ្មោះ ងន សិលា អាយុ ១៨ឆ្នាំ ។ ចំណែកឯ មន្ត្រីនគរបាលដែលប្រើហិង្សា ត្រូវបានគេស្គាល់ថា មានឈ្មោះ ម៉ាត់ ពិសី ។
លោកវរៈសេនីយ៍ទោ ង៉ែត សារុន អធិការរងខណ្ឌ ៧មករា ទទួលផ្នែកសណ្តាប់ធ្នាប់ បានថ្លែងឱ្យដឹងថា សមត្ថកិច្ចមកបានទាក់ទងទៅភាគីម្ខាងទៀត (នារីរងរបួស) រួចរាល់ហើយ ដើម្បីឲ្យគាត់ចូលរួមពិនិត្យមើលវីដេអូផ្សេងៗ ដែលមានការថតបង្ហោះ ក៏ដូចជាផ្ទៀងផ្ទាត់ជាមួយនឹងវីដេអូ កាំមេរ៉ាសុវត្ថិភាព តាមដងផ្លូវ តែពេលនេះ ភាគីខាងនារីដែលរងរបួស មិនទាន់ឃើញមកកាន់ទីតាំងសមត្ថកិច្ចឡើយ ។
លោកវរៈសេនីយ៍ទោ ង៉ែត សារុន បានបន្តទៀតថា សមត្ថកិច្ចកំពុងដោះស្រាយរឿងនេះ ហើយដំណោះស្រាយស្រាយបែបណា លោកមិនទាន់អាចបញ្ជាក់បានទេ គឺរង់ចាំភាគីម្ខាងទៀត ចូលខ្លួនរកដំណោះស្រាយជាមួយសមត្ថកិច្ចសិន ។ ត្រង់នេះមានន័យថា បើសិនជាភាគីម្ខាងទៀត ចង់ដោះស្រាយបញ្ចប់ នៅសមត្ថកិច្ចខណ្ឌក៏បាន ឬក៏ចង់បន្តកសាងសំណុំរឿងទៅតុលាការក៏បាន ។
លោកអធិការរងបានបន្តថា សមត្ថកិច្ចរង់ចាំការដោះស្រាយជានិច្ចជាមួយភាគីម្ខាងទៀតជានិច្ច ខណៈប៉ូលីសដែលយកអាយកូមវាយ ស្ត្រីរងគ្រោះ កំពុងស្ថិតនៅខណ្ឌ ៧មករា ដោយមិនអនុញ្ញាត ឲ្យចេញទៅណានោះទេ រង់ចាំការដោះស្រាយជាមួយភាគីម្ខាងទៀតសិន ។
ដោយឡែក ប្រភពពីស្នងការដ្ឋាននគរបាលរាជធានីភ្នំពេញ បានអោយដឹងនៅព្រឹកថ្ងៃទី០៩ កញ្ញានេះថា ដោយអនុវត្តតាមបទបញ្ជារបស់នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ទី១. មន្ត្រីអន្តរាគមន៍ដែលបានបង្កការរងរបួសដល់ស្ត្រីម្នាក់បណ្តាលឲ្យបែកក្បាលត្រូវបានឃាត់ខ្លួន នៅអធិការដ្ឋាននគរបាលខណ្ឌ៧មករា បន្ទាប់ពីពេលកើតហេតុរួច ។ ទី២. បើស្រាវជ្រាវហើយឃើញថា មានកំហុស មន្ត្រីបង្កនឹងត្រូវអនុវត្តបន្តតាមនីតិវិធីច្បាប់ ក៏ដូចជាការអនុវត្តវិន័យកងកម្លាំងផងដែរ ។ និងទី៣. ចំពោះអ្នកបើកបរល្មើសច្បាប់ បើកបរគេចពីសមត្ថកិច្ចក៏នឹងត្រូវអនុវត្តតាមច្បាប់ផងដែរ ។
តាមរយៈវីដេអូរបស់ក្មេងប្រុសម្នាក់ ដែលបានថតផ្សាយផ្ទាល់លើបណ្តាញសង្គម TikTok បានបង្ហាញថា មុនពេលកើតហេតុជនរងគ្រោះ ពីរនាក់បងប្អូន បានជិះម៉ូតូដោយមិនពាក់មួកសុវត្ថិភាព ពេលនោះជិះនៅតាមបណ្ដោយផ្លូវ ២១៥ មកដល់ម្ដុំអាងទឹកពហុកីឡដ្ឋានជាតិអូឡាំពិក ចំណុចគោលដៅត្រួតពិនិត្យ ក៏ព្យាយាមជិះបកក្រោយវិញ ហើយក៏ត្រូវមន្ត្រីនគរបាល យកទិទ្យុទាកទងវាយ បណ្តាលឲ្យនារីជិះខាងក្រោយបែកក្បាល (ដេរ៣ថ្នេរ) និងធ្លាក់ពីលើម៉ូតូផងដែរ ។ ពេលធ្លាក់នោះ នាងបានលោកក្បាលនឹងថ្នល់ ហើយវិលមុខ កៅស្រែកឲ្យមន្ត្រីប៉ូលិសរូបនោះជួយលើកនិងជួយជូនទៅពេទ្យ ប៉ុន្តែមន្ត្រីប៉ូលិស បែរជានិយាយថា នារីរងគ្រោះ សម្តែងទៅវិញ ? ។
ក្រោយកើតហេតុ នាំឲ្យមានមតិប្រជាជាពលរដ្ឋជាច្រើន បានថ្កោលទោសយ៉ាងខ្លាំងលើមន្ត្រីនគរបាល ដែលប្រើហិង្សា ហើយក៏មានមតិមួយចំនួនទៀត បន្ទោសទៅលើនារីរងរបួសថា មិនគួរណាល្មើសនឹងច្បាប់បរាចរណ៍ផ្លូវគោកនោះដែរ (អត់ពាក់មួកសុវត្ថិភាព) ៕
ចែករំលែកព័តមាននេះ