ខេត្តតាកែវ ៖ ត្រឹមតែរយៈពេល២ថ្ងៃ អាល់អាល់កុលក្លែងក្លាយ ឬមេតាណុលជិត៣០ម៉ឺនលីត្រ ប្រុងលោតឆ័ត្រចែកចាយក្នុងទីផ្សារប្រទេសកម្ពុជា ត្រូវបានមន្ត្រីជំនាញអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ រកឃើញ និងដកហូតនៅខេត្តតាកែវ ។ ក្នុងនោះមួយករណី ត្រូវបានរឹបអូស ពេលកំពុងត្រូវបានដឹកជញ្ជូនពីព្រំដែនវៀតណាមចូលកម្ពុជាផងដែរ ។
បើតាមមន្ត្រីជំនាញឱ្យដឹងថា ករណីបង្ក្រាបធ្វើឡើង២ថ្ងៃជាប់គ្នា នៅទីតាំងពីផ្សេងគ្នា ។ ក្នុងនោះនៅថ្ងៃទី០៦ ខែកញ្ញា ឆ្នាំ២០២១ មន្ត្រីជំនាញសាខា ក.ប.ប. ខេត្តតាកែវ ក្រោមកិច្ចសម្របសម្រួលដោយព្រះរាជអាជ្ញាអមសាលាដំបូងខេត្តតាកែវ និងមានការចូលរួមពីសមត្ថកិច្ចពាក់ព័ន្ធនឹងអាជ្ញាធរដែនដី បានចុះត្រួតពិនិត្យ និងឆែកឆេរឃ្លាំងស្តុកទំនិញមួយកន្លែង ដែលមានទីតាំងស្ថិតនៅភូមិផ្សារ ឃុំភ្នំដិន ស្រុកគីរីវង្ស ខេត្តតាកែវ។
ប្រភពដដែលបានបន្តថា បន្ទាប់ពីបានត្រួតពិនិត្យ មន្ត្រីជំនាញបានរកឃើញសារធាតុមេតាណុលចំនួន២៣០ប៊ីដុង ស្មើនឹង ៦,៩០០លីត្រ ដែលត្រូវបានស្តុកទុកដោយគ្មានលិខិតស្នាមពីស្ថាប័នពាក់ព័ន្ធ។ វត្ថុតាងទាំងអស់ ត្រូវបានដកហូតមករក្សាទុក ដើម្បីអនុវត្តនីតិវិធីបន្ត។
ខេត្តតាកែវដដែល កាលពីថ្ងៃទី០៥ ខែកញ្ញា ឆ្នាំ២០២១ មន្ត្រីជំនាញសាខា ក.ប.ប. ខេត្តតាកែវ ក៏បានចាប់ឃាត់ទុកសារធាតុមេតាណុលចំនួន៧១៤ ប៊ីដុង ស្មើនឹង ២១,៤២០លីត្រ នៅលើកំណាត់ផ្លូវជាតិលេខ ០២ ត្រង់ចំណុចឃុំភ្នំដិន ស្រុកគីរីវង្ស ខេត្តតាកែវ ខណៈពេលដែលកំពុងត្រូវបានដឹកជញ្ជូនពីព្រំដែន ក្នុងបំណងយកមកចែកចាយនៅលើទីផ្សារប្រទេសកម្ពុជា ។
ជុំវិញការបង្ក្រាបបាន និងការរឹបអូសអាល់កុលក្លែងក្លែងនៅជាប់នឹងព្រំដែនប្រទេសវៀតណាមនេះផងដែរ មជ្ឈដ្ឋាននានាបាននាំគ្នានិយាយរិះគន់ថា តើការត្រួតពិនិត្យនៅច្រកទ្វាអន្តរជាតិភ្នំដិន គួររឹតបន្តឹងបន្ថែមទៀត ឬយ៉ាងណា? បានជាទំនិញខូចគុណភាព ដូចជាអាល់កុលក្លែងក្លាយនេះ អាចឆ្លងផុតច្រក ចូលបានស្តុកទុកបានបែបនេះ ?៕
ចែករំលែកព័តមាននេះ