រាជធានីភ្នំពេញ ៖ ក្រសួងធនធានទឹក និងឧតុនិយម បានអញ្ជើញគណៈអភិបាលខេត្ដទាំង៦ មានខេត្ដកំពង់ឆ្នាំង ខេត្ដកំពង់ធំ ខេត្ដសៀមរាប ខេត្ដបន្ទាយមានជ័យ ខេត្ដបាត់ដំបង និងខេត្ដពោធិ៍សាត់ និងស្ថាប័នពាក់ ព័ន្ធចូលរួមប្រជុំពិភាក្សាលើការកំណត់តំបន់៣ និងវិធានការលើបណ្ដាអាងទឹកក្នុងតំបន់២ នៃបឹងទន្លេសាប នាព្រឹកថ្ងៃទី៦ ឧសភា ក្រោមអធិបតីភាពលោកលឹម គានហោ រដ្ឋមន្ដ្រីក្រសួងធនធានទឹក និងឧតុនិយមនៅសាលប្រជុំក្រសួង ដើម្បីមានវិធានការការពារទាន់ពេលវេលា ទប់ស្កាត់គ្រោះមហន្ដរាយដែលនឹងអាចកើតមានយ៉ាងធ្ងន់ធ្ងរចំពោះបឹងទន្លេសាប និងបណ្ដាតំបន់ពាក់ព័ន្ធ។លោកលឹម គានហោ បញ្ជាក់ថា កិច្ចប្រជុំ ថ្ងៃនេះគឺអនុវត្ដទៅតាមការសំរេចនិងបទបញ្ជាដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ។
ការកំណត់តំបន់៣ នេះជាតំបន់តភ្ជាប់របស់ព្រៃលិចទឹក និងផ្ទៃទឹកនៃបឹងទន្លេសាប លាតសន្ធឹងដោយព្រៃ ស្មៅ ល្បាស់ ព្រៃស្រោង ព្រៃលិចទឹក ។ តាម រយៈរូបថតដែលថតពីលើយន្ដហោះបង្ហាញថា ព្រៃលិចទឹកដែលកំពុងត្រូវបានដុតបំផ្លាញ គឺមានរាប់រយរណ្ដៅនៅក្នុងតំបន់៣នេះតែម្ដង ហើយការដុតបំផ្លាញនេះ គឺមិនមែនរកសត្វនៅទីនោះទេ ។ ក្រុមការងារបានចុះទៅស្រាវជ្រាវអស់រយៈពេលជាង៣ខែ គឺស្រាវជ្រាវតាមរយៈរូបថតពីលើអាកាសដែលមាននៅឆ្នាំ២០០៥ ។ ការស្រាវជ្រាវទី២ គឺតាមរូបថតថ្មីៗ ជាក់ស្ដែងដែលថតពីលើអាកាស និងការស្រាវជ្រាវទី៣ គឺចុះប្រតិបត្ដិការផ្ទាល់តែម្ដងនៅខេត្ដទាំង៦ ជុំវិញបឹងទន្លេសាប ។ពាក់ព័ន្ធនឹងការងារចុះទៅប្រតិបត្ដិការ ផ្ទាល់លោកលឹម គានហោ បានបង្ហាញលទ្ធផល និងតួលេខជាក់ស្ដែង ។
នៅខេត្ដកំពង់ធំ តាមការថតពីលើយន្ដហោះនាពេលថ្មីៗនេះបង្ហាញឱ្យឃើញថា ផ្ទៃក្រឡានៃតំបន់៣នេះ នៅសល់តែ៣.១៣០ហិកតាប៉ុណ្ណោះ បើប្រៀបធៀបនឹងឆ្នាំ២០០៥ ដែលមានរហូតដល់៥៦.០០០ហិកតា ។ ដូច្នេះក្នុងទឹកដីរបស់ខេត្ដកំពង់ធំ បានបាត់បង់អស់៩៤ភាគរយ ស្មើនឹង៥៣.០០០ហិកតា ។នៅខេត្ដកំពង់ឆ្នាំងបច្ចុប្បន្ននៅសល់តែ ៤.០០០ហិកតាប៉ុណ្ណោះ ដែលពីមុនមានរហូត ទៅដល់១០១.០០០ហិកតា គឺមានការបាត់បង់រហូតដល់ទៅ៩៥ភាគរយ ស្មើនឹងផ្ទៃដី ៩៧.០០០ហិកតា ។ នេះគឺជាមហន្ដរាយធ្ងន់ធ្ងរណាស់ បើយើងមិនមានវិធានការទាន់ពេលវេលា និងវិធានការហ្មឺងម៉ាត់ទេនោះតំបន់៣ដែលជាប្រភពតំបន់អេកូឡូហ្ស៊ី ជាប្រភពនៃកន្លែងត្រីពង គឺជាទីតាំងដែលកម្ពុជាអាចធ្វើទេសចរណ៍ធម្មជាតិត្រូវបាត់បង់ ។
ដូច្នេះត្រូវទាមទារការសំរេចឱ្យបានបន្ទាន់ជាទីបំផុត ។លោករដ្ឋមន្ដ្រីបន្ដថា បើសិនជាកាប់ព្រៃលិចទឹកអស់មិនយូរមិនឆាប់ទេ តំបន់នេះនឹងក្លាយជាតំបន់វាលរហោឋានមួយ ទៅជាតំបន់ហួតហែងដូច្នេះគប្បីអាជ្ញាធរមូលដ្ឋាន ពិនិត្យពិចារណាមានវិធានការ ។ បើសិនជាប្រជាពលរដ្ឋបង្កបង្កើនផលតាំងពីដូនតាមក គឺរក្សាទុកជូនក៏ប៉ុន្ដែបើត្រឹមតែកាប់ឆ្ការពីឆ្នាំ២០០៣ រហូតដល់ឆ្នាំ២០១០ទេ គឺសូមដកហូតយកមកវិញទុកជាតំបន់ព្រៃលិចទឹក ។ ដូច្នេះបណ្ដាខេត្ដដែលនៅជុំវិញបឹងទន្លេសាប គឺការបាត់បង់មានដូចគ្នាក៏ប៉ុន្ដែខេត្ដកំពង់ធំ និងខេត្ដកំពង់ឆ្នាំងធ្ងន់ធ្ងរជាងខេត្ដ៤ទៀត ។
បន្ទាប់ពីការថ្លែងបទអន្ដរាគមន៍របស់គណៈអភិបាលខេត្ដទាំង៦ រួចមកកិច្ចប្រជុំពិភាក្សា បានឯកភាពទុកយកផ្ទៃក្រឡាតាមសំណៅថតយកតាំងពីឆ្នាំ២០០៥ គឺត្រូវយកផ្ទៃក្រឡាកំណត់តំបន់៣ ទំហំ៦៤០.០០០ ហិកតា ។ កិច្ចប្រជុំបានឯកភាពរួមគ្នាដាក់ជូនសម្ដេចអគ្គមហាសេនាបតីតេជោកំណត់សំរេចតែម្ដង ដោយចេញជាអនុក្រឹត្យចំពោះតំបន់៣នេះ ។ពាក់ព័ន្ធនឹងអាងទឹកក្នុងតំបន់២ លោកលឹម គានហោ បញ្ជាក់ថា ទី១-សូមរក្សាទុក អាងទឹកមួយចំនួនដែលមានហើយ ឯទី២-គឺ ខ្វះបច្ចេកទេសក្នុងការធ្វើអាង ។កិច្ចប្រជុំបានឯកភាពជាគោលការណ៍ ចំពោះការកំណត់តំបន់៣ គឺឯកភាពយក ៦៤០.០០០ហិកតា តាមរូបថតផែនទី ឆ្នាំ២០០៥ ។ ចំពោះវិធានការលើបណ្ដាអាងទឹកក្នុងតំបន់២នៃបឹងទន្លេសាប គឺឯកភាពតាមអាជ្ញាធរបឹងទន្លេសាប ។
ចែករំលែកព័តមាននេះ