ដាំដើមឈើ ជំហានទី១ ចំនួន៥ម៉ឺនដើម នៅតំបន់ផ្លូវអន្ទង់អាំង ភ្នំ១៥០០ ឬហៅថា ផ្លូវបុប្ផាលាក់ខ្លួន
ខេត្តពោធិ៍សាត់ ៖ ដើមឈើចម្រុះ ចំនួន១៤ប្រភេទ រួមមាន ៖ បេង ផ្ដៀក ខ្លឹមចន្ទន៍ ស្ដៅ…
ខេត្តពោធិ៍សាត់ ៖ ដើមឈើចម្រុះ ចំនួន១៤ប្រភេទ រួមមាន ៖ បេង ផ្ដៀក ខ្លឹមចន្ទន៍ ស្ដៅ នាងនួន ធ្នង់ គ្រញូង ត្រយឹង ឈើទាល ត្របែកព្រៃ ពពេល កកោះ អង្កាញ់ និងរំដួល សរុប ៥០.០០០ដើម បានធ្វើពិធីដាំនៅតំបន់ផ្លូវអន្អង់អាំង ភ្នំ១៥០០ ស្ថិតក្នុងភូមិសាស្ត្រឃុំអន្លង់រាប ស្រុកវាលវែង ខេត្តពោធិ៍សាត់ ដើម្បីស្ដារជាតំបន់បៃតងឡើងវិញ នូវទីតាំងកាន់កាប់ខុសច្បាប់របស់ប្រជាពលរដ្ឋ កន្លងមកនេះ ។
ពិធីដាំដើមឈើនេះ បានប្រព្រឹត្តទៅនៅថ្ងៃទី៣ ខែសីហា ឆ្នាំ២០២៤ ក្រោមការដឹកនាំរបស់ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយខេត្តពោធិ៍សាត់ ដោយមានការចូលរួមពីលោក ខូយ រីដា អភិបាល នៃគណៈអភិបាលខេត្ត លោកឧត្តមសេនីយ៍ឯក ម៉ៅ ស៊ីផាន់ អគ្គមេបញ្ជាការរង កងយោធពលខេមរៈភូមិន្ទ និងជាមេបញ្ជាការកងទ័ពជើងគោក ។
ឯកឧត្តម កែវ រតនៈ បានជម្រាបជូនថា ការដាំដើមឈើនេះ គឺក្រសួងរ៉ែ និងថាមពល ក្រោមកិច្ចសហការគាំទ្រផ្នែកបច្ចេកទេស និងហិរញ្ញវត្ថុ ពីក្រុមហ៊ុនអាជីវកម្មរ៉ែមាស របស់ប្រទេសអូស្ត្រាលី។ កាលពីអំឡុងខែមីនា ឆ្នាំ២០២៤ កន្លងមក សម្ដេចបវរធិបតីហ៊ុន ម៉ា ណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ និងចង្អុលណែនាំពាក់ព័ន្ធនឹងកិច្ចការងារអភិរក្សសម្បត្តិធនធានធម្មជាតិ ត្រង់ចំណុចតំបន់ផ្លូវអន្ទង់អាំង ភ្នំ១៥០០ ដែលត្រូវបានសម្ដេចតេជោ ហ៊ុន សែន អតីតនាករដ្ឋមន្ត្រី ប្រសិទ្ធនាមថា (ផ្លូវបុប្ផាលាក់ខ្លួន) ដោយបានណែនាំឲ្យស្ថាប័នមានសមត្ថកិច្ច និងអាជ្ញាធរពាក់ព័ន្ធ ពិនិត្យឡើងវិញ លើកិច្ចការអភិរក្សតំបន់នេះ ទុកសម្រាប់ប្រជាពលរដ្ឋនិងភ្ញៀវទេសចរណ៍ ក្នុងស្រុកនិងក្រៅប្រទេស មកកំស្សាន្តលេង ។
សម្ដេចបានចាត់តាំងឲ្យរូបលោក ដឹកនាំក្រុមការងារអន្តរក្រសួងពាក់ព័ន្ធ និងអាជ្ញាធរខេត្ត ក្នុងការដោះស្រាយ និងរៀបចំតំបន់ (បុប្ផាលាក់ខ្លួន) ឲ្យក្លាយជាកន្លែងអភិរក្សព្រៃឈើ សម្រាប់ទេសចរណ៍គយគន់ទស្សនា។ តំបន់បុប្ផាលាក់ខ្លួននេះ ត្រូវបានកំណត់លើផ្ទៃដីប្រមាណ ៨០០ហិកតា សម្រាប់កិច្ចការស្ដារបរិស្ថានឡើងវិញ ដោយត្រូវបានបែងចែកជា ៣តំបន់ ៖ ១.តំបន់មិនត្រូវការដាំដើមឈើបន្ថែម មានផ្ទៃដីទំហំប្រមាណ៣០០ហិកតា, ២.តំបន់ត្រូវដាំដើមឈើឡើងវិញ មានផ្ទៃដីទំហំប្រមាណ៤០០ហិកតា និង៣.តំបន់ត្រូវដាំដើមផ្កាលំអរ អមសងខាងផ្លូវអន្ទង់អាំង ប្រវែងប្រមាណ៩.៨០០ម៉ែត្រ ដែលគិតជាផ្ទៃដីស្មើនឹងទំហំប្រមាណ១០០ហិកតា។ បន្ទាប់ពីការដាំដើមឈើដំណាក់កាលទី១នេះរួចរាល់ ក្រុមហ៊ុនមានផែនការក្នុងការថែទាំជាបន្តបន្ទាប់ និងបន្តការដាំដើមឈើដំណាក់កាលទី២ នៅអំឡុងខែវស្សាឆ្នាំ២០២៥ខាងមុខនេះ ជាបន្តទៀត ។
ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានអំពាវនាវដល់បងប្អូនប្រជាពលរដ្ឋ ចូលរួមថែរក្សាបរិស្ថានរបស់យើងទាំងអស់គ្នា ឲ្យមាននិរន្តរភាព។ បើស្រលាញ់ព្រៃឈើ ប្រជាពលរដ្ឋគ្រប់រូប ត្រូវរួមគ្នាធ្វើសកម្មភាព ៣គឺ ៖ ដាំ ថែ និងការពារ ។ ជាមួយគ្នានេះ ត្រូវប្រាសចាកពីសកម្មភាព ៣ដែរ គឺ៖ កាប់ ទន្ទ្រាន និង ដុត។ សូមពុកម៉ែបងប្អូនកូនក្មួយចាត់ទុកថា ទិវាដាំដើមឈើនៅតំបន់ផ្លូវអន្ទង់អាំង ភ្នំ១៥០០ ឬហៅថា បុប្ផាលាក់ខ្លួន នៅស្រុកវាលវែង ខេត្តពោធិ៍សាត់ថ្ងៃនេះ ថែរក្សាគម្របបៃតងដើម្បីខ្លួនឯង និងមនុស្សគ្រប់ជំនាន់ ។
ឯកឧត្តមសំណូមពរដល់មន្ត្រីរាជការ និងបងប្អូនប្រជាពលរដ្ឋទាំង ១,១០០នាក់ ដែលអញ្ជើញមកចូលរួមដាំដើមឈើថ្ងៃនេះ ពេលត្រឡប់ទៅវិញ សូមនាំគ្នាដាំដើមឈើឲ្យបានម្នាក់មួយដើម ទោះនៅផ្ទះឬទីកន្លែងណាក៍ដោយ ដើម្បីចូលរួមការពារបរិស្ថានទាំងអស់គ្នា ៕
ចែករំលែកព័តមាននេះ