រាជធានីភ្នំពេញ ៖ ព្រឹកថ្ងៃទី៣១ មករា ២០១១ សាលារាជធានីភ្នំពេញ ដោយមានកិច្ចសហប្រតិបត្តិការពីក្រុមហ៊ុនវិនិយោគកោះពេជ្រ (OCIC) បានរៀបចំធ្វើពិធីក្រុងពាលី និងពិធីបើកការដ្ឋានសាងសង់ស្ពានចំនួនពីរគឺមានឈ្មោះថាស្ពាននាគភ្លោះចេញ-ចូលតំបន់អភិវឌ្ឍន៍ទីក្រុងកោះពេជ្រ ។ ពិធីនេះធ្វើឡើងនៅលើសួនសម្តេចតេជោហ៊ុន សែន ភាគខាងកើតក្រោមអធិបតីភាពលោកកែប ជុតិមា ទីប្រឹក្សាផ្ទាល់សម្តេចតេជោហ៊ុន សែន និងជាអភិបាលរាជធានីភ្នំពេញ និងលោកជំទាវ ជាភរិយា ដោយមានការយាង និងអញ្ជើញចូលរួមពីសម្តេចព្រះសង្ឃរាជនន្ទ ង៉ែត តំណាងក្រុមហ៊ុនអភិវឌ្ឍន៍កោះពេជ្រ មន្ត្រីរាជការក្រោមឱវាទសាលារាជធានីភ្នំពេញ និងប្រជាពលរដ្ឋយ៉ាងច្រើនកុះករ ។
យោងតាមរបាយការណ៍បានឱ្យដឹងថា ស្ពាននាគភ្លោះកោះពេជ្រនេះជាប្រភេទស្ពានបេតុងអាមេ ដែលមានក្បាលនាគនៅខាងដើម និងនៅខាងចុងស្ពាន សំរាប់លំអ និងការពារសេចក្តីសុខដល់អ្នកដំណើរ ។ ស្ពាននេះមានប្រវែង១០១ម៉ែត្រ ទទឹង១២,៧ម៉ែត្រ ជាស្ពានភ្លោះពីរមានរូបរាងដូចគ្នា ។ ស្ពាននីមួយៗជាស្ពានឯកទិសមាន៣ខ្សែសំរាប់យានជំនិះធ្វើដំណើរចូលទៅកាន់ទីក្រុងកោះពេជ្រ និង៣ខ្សែទៀតសំរាប់ចេញពីតំបន់កោះពេជ្រ ។ ស្ពានទី១ សំរាប់ទិសដៅធ្វើដំណើរទៅ ស្ពានទី២សំរាប់ធ្វើដំណើរត្រឡប់មកវិញ ហើយស្ពាននីមួយៗមានផ្លូវថ្មើរជើងសុវត្ថិភាពនៅខាងស្តាំដៃនៃស្ពានមានទទឹង០,៨ម៉ែត្រ មានដាក់បង្គោលភ្លើងបំភ្លឺគម្លាត២០ម៉ែត្រ លាបគំនូសចរាចរណ៍ បង្កាន់ដៃរាងជាដងខ្លួននាគ កំពស់១,១០ម៉ែត្រ ទទឹង០,១ម៉ែត្រ សាងសង់ផ្លូវមកភ្ជាប់នឹងផ្លូវភ្លោះសួនច្បារសម្តេចតេជោហ៊ុន សែន ប្រវែង៦០ម៉ែត្រ ។ សសរស្ពានមាន២សសរ គម្លាតពីគ្នា២៥ទៅ៣០ម៉ែត្រ ផ្លូវលើស្ពានអ៊ុតកៅស៊ូកំរាស់៧៥មីល្លីម៉ែត្រ រៀបបណ្តាញលូអមសងខាង និងដាក់ស្លាកចរាចរណ៍ បង្ហាញទិសត្រឹមត្រូវ៕
ចែករំលែកព័តមាននេះ