ព្រះសង្ឃចំនួន៦អង្គគង់នៅវត្តនិគ្រោធវ័នគល់ទទឹង ត្រូវបានរកឃើញវិជ្ជមានកូវីដ១៩ រហូតឈានដល់ការបិទខ្ទប់ផ្នែកខ្លះនៃវត្តមួយរយៈ និងមិនអនុញ្ញាតិអោយមានការចេញ-ចូលដោយសេរីដូចមុនឡើយ ។ វត្តនិគ្រោធវ័នគល់ទទឹងនេះ គឺស្ថិតក្នុង
រាជធានីភ្នំពេញ ៖ ព្រះសង្ឃចំនួន៦អង្គគង់នៅវត្តនិគ្រោធវ័នគល់ទទឹង ត្រូវបានរកឃើញវិជ្ជមានកូវីដ១៩ រហូតឈានដល់ការបិទខ្ទប់ផ្នែកខ្លះនៃវត្តមួយរយៈ និងមិនអនុញ្ញាតិអោយមានការចេញ-ចូលដោយសេរីដូចមុនឡើយ ។ យ៉ាងណាមិញ បើតាមអាជ្ញាធរបានឱ្យដឹងថា ព្រះសង្ឃ៦អង្គ ដែលត្រូវបានរកឃើញវិជ្ជមានវីរុសកូវីដ១៩នោះ មិនមានព្រះគ្រូ គូ សុភាព ទេ ។ វត្តនិគ្រោធវ័នគល់ទទឹងនេះ គឺស្ថិតក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ ហើយត្រូវបានក្រុមអាជ្ញាធរសង្កាត់ព្រែកថ្មី ធ្វើការបិទខ្ទប់ផ្នែកខ្លះរយៈពេល១៥ថ្ងៃ ដោយគិតចាប់ពីថ្ងៃទី២៨ ខែសីហា ឆ្នាំ២០២១នេះទៅ ដើម្បីចូលរួមទប់ស្កាត់ការឆ្លង និងការរីករាលដាលវីរុសកូវីដ១៩ ។
លោក លីវ វណ្ណថេង ចៅសង្កាត់ព្រែកថ្មី បានប្រាប់កោះសន្តិភាព នៅព្រឹកថ្ងៃទី២៩ ខែសីហា ឆ្នាំ២០២១ អោយដឹងថា ៖ វត្តពិតជាត្រូវបានបិទខ្ទប់ប្រាកដមែន ប៉ុន្តែមិនបិទខ្ទប់វត្តទាំងស្រុងឡើយ គឺបិទតែផ្នែកខ្លះប៉ុណ្ណោះ ពោលគឺកុដិដែលពាក់ព័ន្ធនឹងព្រះសង្ឃដែលរកឃើញមានវិជ្ជមានកូវីដ១៩ និងពិសេសនោះ គឺទីធ្លាសួនក្នុងបរិវេណវត្តជាដើម ។
លោកចៅសង្កាត់បានបន្តថា ដំបូងឡើយ គឺមានព្រះសង្ឃ០១អង្គ មានវិជ្ជមានកូវីដ១៩ ហើយព្រះអង្គត្រូវបានដឹកយកទៅព្យាបាលហើយ ។ ក្រោយមកព្រះសង្ឃក្នុងវត្ត ដែលមានការប៉ះពាល់ផ្ទាល់ ឬប្រយោល បានតេស្តសំណាកដោយខ្លួនឯង ដោយប្រើឧបករណ៍តេស្តរហ័ស Rapit test ជាលទ្ធផលបញ្ជាក់ថា មានវិជ្ជមាន០៥អង្គ ។ បន្ទាប់ពីពិនិត្យឃើញមក គណៈសង្ឃក្នុងវត្តក៏បានរាយការណ៍ជូនអាជ្ញាធរមូលដ្ឋាន ហើយក្រុមអាជ្ញាធរ ក៏បានទំនាក់ទំនងទៅក្រុមគ្រូពេទ្យ ដើម្បីចុះទៅធ្វើសំណាកលើព្រះសង្ឃដែលមានការពាក់ព័ន្ធជាច្រើនអង្គម្តងទៀត ដើម្បីប្រាកដប្រជាថាមានវិជ្ជមាននូវវីរុសកូវីដ១៩ ប្រាកដមែនឬយ៉ាងណា?
ក្រោយឆ្លងកាត់ការតេស្តសំណាកពីសំណាក់ក្រុមគ្រូពេទ្យហើយនោះ លទ្ធផលបានបញ្ជាក់ថា ព្រះសង្ឃទាំង០៥អង្គដដែលនោះ មានផ្ទុកនូវវីរុសកូវីដ១៩ ប្រាកដមែន ។ បន្ទាប់ពីពិនិត្យឃើញមានវិជ្ជមានហើយនោះ ព្រះសង្ឃទាំង០៥អង្គ បានស្នើសុំនៅព្យាបាលក្នុងកុដិដោយអង្គឯង ហើយក្រុមគ្រូពេទ្យ រួមជាមួយអាជ្ញាធរក៏បានធ្វើការវាយតម្លៃឃើញថា សុខភាពព្រះកាយរបស់ព្រះសង្ឃទាំង០៥អង្គ បូករួមជាមួយទីតាំងភូមិសាស្ត្រអំណោយផលល្អ ក៏សម្រេចអនុញ្ញាតិអោយព្យាបាលនៅក្នុងកុដិដោយអង្គឯង ដោយត្រូវគោរពតាមគោលការណ៍ណែនាំរបស់ក្រុមគ្រូពេទ្យ ជាពិសេសវិធានសុខាភិបាលផងដែរ ។
ទន្ទឹមនឹងការអនុញ្ញាតិអោយព្រះសង្ឃទាំង០៥អង្គ សម្រាកព្យាបាលនៅក្នុងកុដិដោយអង្គឯងនោះ ក៏មានក្រុមអាជ្ញាធរសង្កាត់ព្រែកថ្មីជាច្រើននាក់ ប្រចាំការយាមកាមការពារសន្តិសុខនៅទីតាំងផ្នែកខ្លះ នៃវត្ត ដែលត្រូវបានបិទខ្ទប់ផងដែរ ដោយពុំអនុញ្ញាតិអោយអ្នកមិនមានការពាក់ព័ន្ធអាចចូលទីតាំងកំពុងមានហានិភ័យបានផ្តេសផ្តាសឡើយ ។
លោកចៅសង្កាត់បន្តថា កន្លងទៅ តែងមានបងប្អូនពលរដ្ឋនាំគ្នាទៅហាត់ប្រាណលំហែកាយ នៅក្នុងបរិវេណវត្ត ដោយសារវត្តមានការររៀបចំបរិវេណសួនយ៉ាងល្អ ញុំាងអោយបងប្អូនពលរដ្ឋចូលទៅលេងពេលល្ងាចៗឡើង ដោយមានការលក់ដូរគ្រឿងហូបចុកផ្សេងៗមួយចំនួននៅក្នុងវត្តផងដែរ ។ ដូច្នេះហើយ ក្រោយមានផ្ទុះនូវវីរុសកូវីដ១៩មក អាជ្ញាធរសង្កាត់ក៏បានសម្រេចផ្អាកមិនអោយមានការចេញ-ចូលជាបណ្តោះអាសន្ននូវផ្នែកទាំងនោះ ដែលជាទីកន្លែងមានការប្រមូលផ្តុំទៅដោយមនុស្សច្រើន ចៀសវៀងមានការឆ្លងរាលដាលបន្តកាន់តែខ្លាំងផងដែរ ៕
ចែករំលែកព័តមាននេះ