រាជធានីភំ្នពេញ៖ ​​នាយកដ្ឋាននគរបាលបង្ការ ពន្លត់អគ្គិភ័យ និងសង្រ្គោះ នៃអគ្គស្នងការនគរ​បាលជាតិ បានបង្ហាញ​រថយន្តសង្គ្រោះ​ និង​ពន្លត់អគ្គិភ័យខ្នាតធំ ស៊េរីទំនើបចំនួន​ ២​ គ្រឿង ម៉ាក EVERDIGM Model ERL 54C ចំណុះ ៣.៥០០លីត្រ មានដងយោងកម្ពស់ ៥២ម៉ែត្រ។ រថយន្តសង្គ្រោះ និងពន្លត់អគ្គិភ័យ​នេះ មានសមត្ថភាព អាចសង្គ្រោះ និងបាញ់ពន្លត់​អគ្គិភ័យ​ បាននៅអគារកម្ពស់ ១៥ជាន់​។

រថយន្តទំនើបនេះ ត្រូវបានប្រគល់ដល់នាយកដ្ឋាននគរបាលបង្ការ ពន្លត់អគ្គិភ័យ និងសង្រ្គោះ ១​ គ្រឿង និងស្នងការដ្ឋាន​នគរបាលរាជធានីភ្នំពេញ ១​ គ្រឿង។ ពិធីប្រគល់ និងទទួលរថយន្តពន្លត់អគ្គិភ័យខ្នាតធំនេះ ត្រូវបានធ្វើឡើង នៅឃ្លាំងស្នង​ការដ្ឋានហិរញ្ញកិច្ច និងភស្តុភារ ស្ថិតនៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញ កាលពី​ព្រឹកថ្ងៃទី២៦ ខែសីហា ឆ្នាំ២០២១។

លោក​ ឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្រ្គោះ ​បានឲ្យដឹង​ថា ថ្ងៃនេះ ជាលើកទី២ហើយ ដែលលើកទី១នោះ អគ្គស្នងការដ្ឋាននគរបាលជាតិ បានប្រគល់រថយន្តពន្លត់អគ្គិភ័យដ៏ទំនើប សម្រាប់ខួងទម្លុះទម្លាយជញ្ជាំង និងពន្លត់ ចំនួន ២គ្រឿង។ ១គ្រឿង​ ប្រគល់ជូននាយកដ្ឋាននគរបាលបង្ការ ពន្លត់អគ្គិភ័យ និងសង្រ្គោះ១ គ្រឿង និងស្នងការដ្ឋាននគរ បាលរាជធានីភំ្នពេញ ១គ្រឿង។ នេះជាលើកទី២ ដែលអង្គភាពជំនាញបង្ការ ពន្លត់អគ្គិភ័យ និងសង្រ្គោះ មានរថយន្តពន្លត់អគ្គិភ័យដ៏ទំនើប ប្រភេទរថយន្តជណ្តើរ មានកម្ពស់រហូតជាង ៥០ម៉ែត្រ និងមានសមត្ថភាពបាញ់ទឹកបានចម្ងាយជិត ៥០ម៉ែត្រទៀត សរុបទៅ គឺអាចបាញ់បានដល់អគារ ដែលមានកម្ពស់ ១៥ជាន់។

លោកឧត្តមសេនីយ៍ឯក នេត វន្ថា ណែនាំដល់កងកម្លាំងនគរបាលបង្ការ ពន្លត់អគ្គិភ័យ​ទាំងពីរអង្គភាព ដែល​ទទួលបានរថយន្តជណ្តើរ​ដ៏ទំនើបនេះ សូមយកទៅប្រើប្រាស់ឲ្យចំទិសដៅ និងត្រួតពិនិត្យមើលថែទាំរថយន្តនេះ ឲ្យបានល្អស្អាតជានិច្ច និងហ្វឹកហាត់ជាប្រចាំ ដើម្បីត្រៀមជួយ​សង្រ្គោះអាយុជីវិត ទ្រព្យសម្បត្តិ ប្រជាពលរដ្ឋបានទាន់ពេលវេលា។

តាមបទបង្ហាញ​របស់នាយកដ្ឋាននគរបាលបង្ការ ពន្លត់អគ្គិភ័យ និងសង្រ្គោះ បង្ហាញថា ​រថយន្ត​ពន្លត់​អគ្គិភ័យ​ ស៊េរី​ទំនើប​ម៉ាក EVERDIGM Model ERL 54C មានកម្ពស់ ៤ម៉ែត្រ បណ្ដោយ​ប្រវែង ១៣ម៉ែត្រ ទទឹង​ប្រវែង​ ២,៥ម៉ែត្រ​ ដងចេញអស់​ ៥៤​ ម៉ែត្រ​ ចំណុះទឹក​ ៣០០០​ លីត្រ​ ហ្វម​ ១០០០លីត្រ។ ជាប្រភេទរថយន្តជណ្តើរ អាចប្រើប្រាស់បានអគារកម្ពស់ ១៥ជាន់ និងបូមបាញ់ទឹកដោយស្វ័យប្រវត្តិ សង្គ្រោះ​ ហើយដងលើកឡើង បានប្រវែង​ ៥២ម៉ែត្រ និងបាញ់ទឹកចេញបាន ៤០ម៉ែត្រ​។

យ៉ាងណាក៏ដោយ នៅកម្ពុជាសព្វថ្ងៃ ពិសេសនៅរាជធានីភ្នំពេញ និងនៅខេត្តព្រះសីហនុ មានអគារខ្ពស់ៗ ច្រើន ហើយលើសពី ១៥ជាន់។ កត្តានេះ នាយកដ្ឋាន​នគរ​បាល​បង្ការ ពន្លត់អគ្គិភ័យ និងសង្គ្រោះ បានអំពាវនាវបន្ថែមឲ្យ​ម្ចាស់អគារ ត្រូវតែបំពាក់ប្រពន្ធ័សុវត្ថិភាព​ បង្ការ​ និងពន្លត់អគ្គិភ័យឲ្យ​ស្របតាមបទដ្ឋានបច្ចេកទេស ដើម្បីពេលមានករណីអគ្គិភ័យ នៅជាន់ខ្ពស់ៗ​ វាអាចប្រតិបត្តការពន្លត់ ដោយស្វ័យប្រវត្តិបានដោយជោគជ័យ។

​នាយកដ្ឋាន​នគរបាល​បង្ការ​​ ពន្លត់​​អគ្គិភ័យ និង​សង្គ្រោះ បាន​លើកឡើងថា នៅក្នុង​ឆ្នាំ​២០២០ គ្រោះ​អគ្គិភ័យ នៅទូទាំង​ប្រទេស បាន​កើតឡើង​ចំនួន ៩៣៧លើក គឺ​កើនឡើង ២២០ លើក បើ​ធៀប​នឹង​ឆ្នាំ​២០១៩ ដែល​អគ្គិភ័យ បានកើត​ឡើង ៧១៧ លើក​។

ក្នុង​ឆ្នាំ​២០២០ អគ្គិភ័យ​បាន​បណ្តាល​ឲ្យ​មនុស្ស​ស្លាប់ ២៤ នាក់ និង​របួស ៣៦​នាក់ បណ្តាល​ឲ្យ​ឆេះ​ផ្ទះ​អស់ ៧០៧ ខ្នង និង​តូបផ្សារ ៥៩៤ តូប​។ មូលហេតុ គឺ​មិន​ខុសគ្នា​ពី​ឆ្នាំមុនៗ​ប៉ុន្មាន​ទេ គឺ​ ​បណ្តាលមកពី​ចរន្តអគ្គិសនី ៣៧,៨៨ ភាគរយ និង​ប្រើប្រាស់​ភ្លើង​ផ្សេងៗ ៣២,៣៣ ភាគរយ ព្រមទាំង​ក្តាប់​មិនបាន​មូលហេតុ មាន​ចំនួន ២៩,៧៧ ភាគរយ​៕