ខេត្តកំពង់ឆ្នាំង ៖ សំឡេងភ្លេងការបានបន្លឺឡើងតាំងពីព្រលឹមស្រាងៗ ស្រាប់តែមានការភ្ញាក់ផ្អើល ដោយសារតែបាត់កូនក្រមុំ ធ្វើឱ្យក្រុមគ្រួសារខាងស្រីរត់ជាន់ជើងគ្នា រកកូនក្រមុំគ្រប់ច្រកល្ហកនៅតែមិនឃើញ បើទោះជាខំទូរស័ព្ទក៏មិនចូលដែរ ។ ហេតុការណ៍
ខេត្តកំពង់ឆ្នាំង ៖ សំឡេងភ្លេងការបានបន្លឺឡើងតាំងពីព្រលឹមស្រាងៗ ស្រាប់តែមានការភ្ញាក់ផ្អើល ដោយសារតែបាត់កូនក្រមុំ ធ្វើឱ្យក្រុមគ្រួសារខាងស្រីរត់ជាន់ជើងគ្នា រកកូនក្រមុំគ្រប់ច្រកល្ហកនៅតែមិនឃើញ បើទោះជាខំទូរស័ព្ទក៏មិនចូលដែរ ។ ហេតុការណ៍ដ៏ភ្ញាក់ផ្អើល ពាក់ព័ន្ធរឿងបាត់កូនក្រមុំក្នុងពិធីមង្គលការនេះ បានកើតឡើងនៅព្រឹកថ្ងៃទី២៣ មករា ឆ្នាំ២០១៦ ស្ថិតនៅភូមិស្ពករាជ ឃុំអណ្តូងស្នាយ ស្រុករលាប្អៀរ ។ ទោះយ៉ាងណា នាងជាកូនក្រមុំបានវិលត្រឡប់ចូលផ្ទះវិញហើយកាលពីវេលាម៉ោង៧យប់ថ្ងៃទី២៥ មករា ជាមួយកូនកម្លោះថ្មីមួយរូបផ្សេងទៀត ។
ជួបជាមួយភ្នាក់ងារកោះសន្តិភាព កាលពីព្រឹកថ្ងៃទី២៦ មករា ២០១៦ លោកយាយ រៀល រុំ អាយុ៧២ឆ្នាំ ដែលត្រូវជាជីដូនរបស់កូនក្រមុំ បានឱ្យដឹងថា ចៅស្រីគាត់បានរត់ចេញពីផ្ទះក្នុងម៉ោងប្រហែលជាង៤ទៀបភ្លឺថ្ងៃទី២៣ មករា គឺជាថ្ងៃចូលរោងការ តែគ្មានអ្នកណាចាប់អារម្មណ៍ឡើយ ។ ស្រាប់តែនៅម៉ោងប្រហែល៧ព្រឹក ទើបផ្អើលឆោឡោឡើង ខណៈដែលម្តាយរកកូនស្រីឱ្យរៀបចំខ្លួន ។ គាត់មិនដឹងថា ចៅស្រីគាត់មានគំនិតរត់ចោលរោងការនោះទេ ព្រោះកាលពីល្ងាច ឃើញវាជួយវេចនំអន្សមដែរ ហើយក៏បានដេញវាឱ្យឆាប់ឡើងដេក ព្រោះថ្ងៃស្អែករវល់ហើយ ស្រាប់តែស្អែកឡើងបាត់តែម្តង ។
ចំណែកស្ត្រីជាម្តាយកូនក្រមុំ ឈ្មោះផាន់ សិរី អាយុ៣៩ឆ្នាំ បានរៀបរាប់ថា កូនស្រីគាត់មានឈ្មោះសុខា សិរីរត្ន័ អាយុ២១ឆ្នាំ ចំណែកកូនកម្លោះឈ្មោះស៊ិន ស៊ីវង៉ុក អាយុ២២ឆ្នាំ មានទីលំនៅភូមិបាញ់ឆ្គោល ឃុំជ្រៃបាក់ ស្រុករលាប្អៀរ ។ កាលពីអំឡុងខែកក្កដា ឆ្នាំ២០១៥ ខាងប្រុសគេមកដណ្តឹងភ្ជាប់ពាក្យកូនស្រីគាត់ កាលណោះ កូនស្រីគាត់មិនបានប្រកែកទេ ហើយពួកវា ក៏ស្រឡាញ់គ្នាដែរ ព្រោះពួកវាធ្វើការនៅរោងចក្រ M.V ជាមួយគ្នា និងតែងតែឌុបគ្នាទៅធ្វើការទៀតផង ។ មិនត្រឹមតែប៉ុណ្ណឹង កូន
កម្លោះតែងតែចេញចូលមកលេងផ្ទះគាត់និងហៅម៉ែ ហៅយាយពេញៗមាត់ ។ នៅល្ងាចថ្ងៃទី២២ មករា នោះ គ្រួសារខាងកូន
កម្លោះបានមកជួបជុំគ្នា ព្រោះស្អែកឡើងជាថ្ងៃចូលរោង ហើយល្ងាចនោះ ក៏ឃើញពួកវា (កូនកម្លោះ-ក្រមុំ) ជជែកគ្នាលេងដែរ ដូចជាគ្មានអ្វីកើតឡើងនោះទេ តែស្រាប់តែស្អែក កូនស្រីគាត់បានរត់ចេញពីផ្ទះចោលរោងការតែម្តង ។
ស្ត្រីជាម្តាយបន្តថា ក្រោយពេលបាត់កូនក្រមុំ គាត់បានសងបណ្ណាការទៅខាងកូនកម្លោះវិញដែរ គឺ១.៨០០ដុល្លារ និងម៉ូតូ០១៥ មួយគ្រឿង គឺបានធ្វើលិខិតជាលាយលក្ខណអក្សរនៅមុខលោកអនុប្រធានភូមិ នៅព្រឹកថ្ងៃទី២៥ មករា ២០១៥ ដោយខាងប្រុសជាមនុស្សល្អ គេមិនប្តឹងផ្តល់អ្វីឡើយ ។ ពួកគាត់នូវរាប់អានគ្នាជាធម្មតា ធ្វើម៉េចគ្មាននិស្ស័យនឹងគ្នា ។ ក្រៅពីសងបណ្ណាការទៅខាងប្រុសវិញ គាត់នៅបានសងថ្លៃជួលរោងការ ថ្លៃសម្អាង ថ្លៃភ្លេង ម្លូប ដែលគេគិតថ្លៃត្រឹម៥០% នៃតម្លៃនិយាយគ្នា គឺអស់ជាង២ពាន់ដុល្លាបន្ថែមទៀត ។
ចំពោះសំណួរសួរថា តើកូនក្រមុំរត់ទៅជាមួយអ្នកណា ជីដូនកូនក្រមុំប្រាប់ដោយមិនលាក់លៀមថា គឺទៅជាមួយបុរសដែលនាងស្រឡាញ់នៅរាជធានីភ្នំពេញ ។ ហើយនៅយប់ថ្ងៃទី២៥ មករា ២០១៦ ពួកគេបានមកវិញហើយ ដោយប្រុសនោះ ជាអ្នកធ្វើការនៅរោងចក្រជាមួយគ្នាឈ្មោះទក ហៅយ៉ា ចំណែកគ្រួសារនេះ ពេលកូនត្រឡប់មកវិញ ក៏បានប្រញាប់ចូលស្តីដណ្តឹង ចៅក្រមុំគាត់ភ្លាមៗដែរ ព្រោះខ្លាចមានបញ្ហាពួកគាត់ជាជីដូន ជាម្តាយមិនជំទាស់ទេ បើពួកវាស្រឡាញ់គ្នាទៅហើយ តែពួកគាត់ដាច់ខាតមិន រៀបចំមង្គលការឱ្យពួកវាទេ ព្រោះអស់ទឹកចិត្តហើយ អាចថារៀបចំសែនព្រេនឱ្យវាចុះ ។
ស្ត្រីជាម្តាយបានរំលឹកតាមជំនឿថា តាមពិតទៅ បុរសឈ្មោះយ៉ា និងធ្លាប់ចេញ-ចូលផ្ទះគាត់រាប់អានធម្មតាទេ មិនដែលមានទំនាក់ទំនងស្នេហាអ្វី និងកូនគាត់ឡើយ ព្រោះវាជាអ្នកធ្វើការនៅរោងចក្រជាមួយគ្នា រួមទាំងគាត់ជាម្តាយ ក៏ធ្វើការនៅរោងចក្រជាមួយគ្នាដែរ ។ យ៉ា ធ្លាប់ហៅខ្ញុំថា បងរីទៀតផង ។ ពេលកូនស្រីគាត់ត្រឡប់មកវិញ វាបានសំពះសុំទោសខ្ញុំ សុំទោសយាយវា ដោយប្រាប់ថា ថ្ងៃនោះ វាទ្រាំមិនបានទេ វានឹកគេខ្លាំងណាស់ ទើបវាសម្រេចចិត្តរត់ចោលរោងការបែបនេះ ។
បើកូនសម្រេចចិត្តបែបនេះ ខុសត្រូវស្រេចលើវាចុះ តែខ្ញុំនិងយាយវានៅតែស្តាយកូនកម្លោះមុនដដែល ព្រោះវាស្លូតណាស់ ។ចំពោះរឿងមង្គលការកូនក្រោយនេះ គឺដាច់ខាតមិនការឱ្យវាទេ។ លោកយាយជាជីដូន លូកមាត់កាត់សម្តីកូនគាត់ថា ខ្ញុំបានជួបចៅប្រុសង៉ុក តាមទូរស័ព្ទម្សិលមិញនេះ ខ្ញុំសួរវាថា ចៅឯងនៅណា? វាឆ្លើយថា នៅភ្នំពេញ អុំវាឱ្យ៥០ដុល្លារដើរលេងបំបាត់ទុក្ខ ។
លោកយាយយំ ហើយបន្ថា ខ្ញុំអាណិតចៅខ្ញុំខ្លាំងណាស់ ។
ជួបជាមួយម្តាយខាងប្រុស នៅភូមិបាញ់ឆ្គោល ឃុំជ្រៃបាក់បានប្រាប់ថា គ្រួសារខ្ញុំមិនបានប្តឹងប្តល់អីនោះទេ ដោយសុំតែថ្លៃបង្គាប់ប៉ុណ្ណោះ គឺ១.៨០០ដុល្លារ និងម៉ូតូ០១៥មួយគ្រឿង ខាងស្រីសងខ្ញុំវិញអស់ហើយ ។ តាមពិតទៅ មុនពេលខ្ញុំចូលដណ្តឹង ខាងប្រុស គឺពួកវាស្រឡាញ់គ្នា ព្រោះពួកវាធ្វើការរោងចក្រជាមួយគ្នា តែកូនប្រុសគាត់ត្រូវបានគេបញ្ឈប់ពីការងារ ព្រោះវាជាកម្មករបណ្តែត។ពេលឈប់ធ្វើការនៅរោងចក្រកំពង់ឆ្នាំង កូនប្រុសគាត់បានទៅធ្វើការនៅរាជធានីភ្នំពេញជាង២ខែ ម្លោះហើយទើបពួកវាមិនបានជួបគ្នា ហើយដោយបែបនេះទេដឹង ទើបខាងស្រីមានថ្មីទៀត ។
ស្ត្រីជាម្តាយខាងប្រុសបន្តថា បើពូឯង (ភ្នាក់ងារ) ឃើញពួកខ្ញុំវេចខោអាវ ស្ពាយកាបូបចេញពីរោងការបានល្អមើល មនុស្សម៉ាគោយន្ត រួមទាំងគ្រួសារខាងស្រីផង ពិសេសយាយៗ គិតតែពីយំអោបគ្នាថា ស្តាយ ស្តាយណាស់ មិនគួរមានរឿងបែបនេះទេ យើងនៅរាប់អានគ្នាដូចធម្មតាទៀតកុំចោលគ្នា ។
រឿងរ៉ាវកូនក្រមុំរត់ចោលរោងការ គឺមានមូលហេតុ ដោយសារតែកូនក្រមុំបានស្រឡាញ់មនុស្សថ្មីផ្សេង ចោលកូនកម្លោះដែល
ឃា្លតទៅធ្វើការឆ្ងាយ ធ្វើឱ្យស្រីណាយចិត្ត ទើបសម្រេចរត់ចោលរោងការស្រវាប្រុសថ្មី សូមបញ្ចប់ត្រឹមសងបណ្ណាការទៅខាងប្រុសវិញ និងទទួលយកគូស្នេហ៍ថ្មីវិញ ។
ចែករំលែកព័តមាននេះ