រាជធានីភ្នំពេញ ៖ ផ្សារធំថ្មីនៅបើកដំណើរការជាធម្មតា នាព្រឹកថ្ងៃសុក្រនេះ ក៏ប៉ុន្តែតូបលក់គ្រឿងសមុទ្រដែលរកឃើញវិជ្ជមានកូវីដ១៩ ត្រូវបានបិទមួយរយៈសិន ។
ក្រោយពីក្រុមគ្រូពេទ្យធីតាសហការជាមួយគណ:បញ្ជាការឯកភាពខណ្ឌដូនពេញ ដឹកនាំដោយលោក សុខ ពេញវុធ អភិបាលខណ្ឌដូនពេញ ចុះយកសំណាកអាជីវករលក់គ្រឿងសមុទ្រ នៅច្រកចូលខាងលិចផ្សារផ្លូវលេខ៦៧ កែងវិថីកម្ពុជាក្រោម និងប្រជាពលរដ្ឋនៅក្បែរផ្សារចំនួន៣៩៣នាក់ ជាលទ្ធផលរកឃើញវិជ្ជមានកូវីដ១៩ចំនួន៣នាក់ ។
លោក សុខ ពេញវុធ អភិបាលខណ្ឌដូនពេញបានឱ្យដឹងថា ស្ត្រីជាអាជីវករលក់គ្រឿងសមុទ្រ នៅក្នុងផ្សារធំថ្មី ដែលវិជ្ជមានជំងឺកូវីដ១៩ មានឈ្មោះ យ៉ាន់ សុជា ខណៈអ្នកជំងឺចំនួន២នាក់ទៀតជាបុរសជាអ្នករស់នៅក្បែរផ្សារ ដែលស្ម័គ្រចិត្តទៅយកសំណាកផងដែរ ។
លទ្ធផលពេញតាំងពីរសៀល រហូតដល់យប់ថ្ងៃទី២៦ ខែសីហា ឆ្នាំ២០២១នេះ មន្ត្រីជំនាញបានយកសំណាកពីអាជីវករលក់បន្លែ លក់គ្រឿងសមុទ្រ រួមជាមួយប្រជាពលរដ្ឋដែលរស់នៅក្បែរផ្សារចំនួន៣៩៣នាក់ លទ្ធផលរកឃើញ៣នាក់ វិជ្ជមានជំងកូវីដ១៩ ក្នុងនោះអាជីវករលក់គ្រឿងសមុទ្រម្នាក់ និងប្រជាពលរដ្ឋរស់នៅក្បែរផ្សារចំនួន២នាក់ ។
លោក សុខពេញវុធ បានប្រាប់ថា ក្រោយរកឃើញមានអ្នកឆ្លងជំងឺកូវីដជាបន្តបន្ទាប់ និងដើម្បីទប់ស្កាត់កុំឱ្យជំងឺមួយនេះ ជាពិសេសប្រភេទមេរោគបំប្លែងថ្មី Delta ។
គួរំលឹកថា កាលពីល្ងាចថ្ងៃទី១៨ ខែសីហា ឆ្នាំ២០២១ គណ:បញ្ជាការឯកភាពខណ្ឌដូនពេញដឹកនាំដោយលោក សុខ ពេញវុធ អភិបាលខណ្ឌដូនពេញ សហការជាមួយក្រុមគ្រូពេទ្យធីតាបានបិទខ្ទប់ផ្លូវមួយចំនួននៅជុំវិញបរិវេណផ្សារកណ្ដាល ស្ថិតក្នុងសង្កាត់ផ្សារកណ្តាល១ ខណ្ឌដូនពេញ ដើម្បីឱ្យក្រុមគ្រូពេទ្យធីតាចុះយកសំណាក អស់រយៈពេលជាច្រើនម៉ោងពីអាជីវករលក់ដូរចល័តតាមចិញ្ចើមផ្លូវ ជាលទ្ធផលអវិជ្ជមានទាំងអស់ ពោល គឺរកមិនឃើញអ្នកណាម្នាក់វិជ្ជមានកូវីដ១៩នោះទេ ៕
ចែករំលែកព័តមាននេះ