មានការផ្ទុះដ៏ខ្លាំង នៅខាងក្រៅអាកាសយានដ្ឋានក្រុងកាប៊ុល
វ៉ាស៊ីនតោន ៖ មន្ត្រីនៃមន្ទីរបញ្ចកោណ នៅថ្ងៃព្រហស្បតិ៍ ទី២៦ សីហា ២០២១នេះ បានបញ្ជាក់ពីការផ្ទុះ នៅជិតអាកាសយានដ្ឋានអន្តរជាតិ ហាមីដកាហ្សៃ…
វ៉ាស៊ីនតោន ៖ មន្ត្រីនៃមន្ទីរបញ្ចកោណ នៅថ្ងៃព្រហស្បតិ៍ ទី២៦ សីហា ២០២១នេះ បានបញ្ជាក់ពីការផ្ទុះ នៅជិតអាកាសយានដ្ឋានអន្តរជាតិ ហាមីដកាហ្សៃ (Hamid Karzai) ក្នុងទីក្រុងកាប៊ុល ជាកន្លែងដែលកងកម្លាំងលោកខាងលិចកំពុងប្រញាប់ប្រញាល់ជម្លៀសមនុស្សឲ្យបានច្រើនតាមដែលអាចធ្វើទៅបាន ។
យោងតាមអ្នកនាំពាក្យមន្ទីរបញ្ចកោណលោក John Kirby បានបញ្ជាក់នៅលើបណ្ដាញសង្គម Twitter ថា ពិតជាមានការផ្ទុះ នៅខាងក្រៅអាកាសយានដ្ឋានអន្តរជាតិ ហាមីដកាហ្សៃ ក្នុងទីក្រុងកាប៊ុល ។ លោកបន្តថា “យើងអាចបញ្ជាក់បានថា មានការផ្ទុះមែន នៅខាងក្រៅអាកាសយានដ្ឋានក្រុងកាប៊ុល ប៉ុន្តែចំនួនអ្នកស្លាប់ និងអ្នករបួសមិនច្បាស់ នៅពេលនេះទេ ។ យើងនឹងផ្តល់ព័ត៌មានលម្អិតបន្ថែម នៅពេលយើងទទួលបាន” ។
មន្ត្រីស្ថានទូតអាមេរិក នៅទីក្រុងកាប៊ុល បានពណ៌នានេះថា “ជាការផ្ទុះដ៏ខ្លាំង” ហើយបាននិយាយថា មានសេចក្តីរាយការណ៍អំពីការបាញ់កាំភ្លើង ដោយជំរុញឲ្យជនជាតិអាមេរិក ចៀសវាងការធ្វើដំណើរ ចូលទៅច្រកទ្វារអាកាសយានដ្ឋាន ។
ស្ថានទូត បានចេញសេចក្តីប្រកាសសន្តិសុខមួយ មុនពេលការផ្ទុះកើតឡើង ដោយប្រាប់ឱ្យជនជាតិអាមេរិកចៀសវាងចូលទៅអាកាសយានដ្ឋាន ៖ នៅឯច្រកចូល Abbey ច្រកចូលខាងកើត ឬច្រកចូលខាងជើង ឥឡូវនេះគួរតែចាកចេញភ្លាមៗ ។
សូមបញ្ជាក់ថា ក្នុងរយៈពេល ២៤ម៉ោងចុងក្រោយនេះ កងកម្លាំងលោកខាងលិច បានជម្លៀសមនុស្ស ១៣.៤០០នាក់ចេញពីទីក្រុងកាប៊ុលតាមជើងហោះហើរយន្តហោះយោធា ៩១គ្រឿង ។ ចាប់តាំងពីការជម្លៀសប្រជាជនទ្រង់ទ្រាយធំ បានចាប់ផ្តើមនៅថ្ងៃទី១៤ ខែសីហា មនុស្សប្រមាណ ៩៥.៧០០នាក់ ត្រូវបានគេដឹកតាមយន្តហោះចេញពីអាហ្វហ្គានីស្ថាន ។
មនុស្សប្រហែល ១០១.៣០០នាក់ត្រូវបានជម្លៀសចេញចាប់តាំងពីចុងខែកក្កដា រួមទាំងពលរដ្ឋអាមេរិក ប្រមាណ ៤.៥០០នាក់និងគ្រួសាររបស់ពួកគេ ៕
ចែករំលែកព័តមាននេះ