ខេត្តតាកែវ ចាក់វ៉ាក់សាំង បានជាង ៥៦ម៉ឺននាក់ វ៉ាក់សាំង ៣ប្រភេទ គឺ Sinovac, Sinopharm និង J&J
- តាកែវ
ខេត្តតាកែវ៖ គិតត្រឹមថ្ងៃទី២៦ ខែសីហា ឆ្នាំ២០២១ នៅខេត្តតាកែវ ចាក់វ៉ាក់សាំង លើកទី១ បានចំនួន ៥៦០,២៨៣នាក់ (ស្រី ២៨៨,៥៧៨នាក់ )។ ក្នុងនោះ Sinopharm ៦៧,៦៧៧នាក់ (ស្រី ៣៣,៦៣០នាក់) Sinovac ៣៧៥,០១៨នាក់ (ស្រី ១៩៧,២៧១នាក់) និងJanssen/J&J ២៣,៧០៧ (ស្រី ១២,០៧១នាក់)។ រីឯ Sinovac សម្រាប់អាយុ ១២-១៧ ឆ្នាំ ចំនួន ៩៣,៨៨១នាក់ (ស្រី ៤៥,៦០៦នាក់)។
លោក នុត ស៊ីណាត ប្រធានមន្ទីរសុខាភិបាលខេត្តតាកែវ បានឲ្យដឹងថា ការចាក់វ៉ាក់សាំង លើកទី២ ឬដូសទី២ បានចំនួន ៤០១,៨០០នាក់ (ស្រី ២១០,២១៩នាក់)។ ក្នុងនោះ រួមមាន៖ Sinopharm ៣៤,៥៦៣នាក់ (ស្រី ១៦,៥២៤នាក់) Sinovac ៣៦៧,២២៨នាក់ (ស្រី ១៩៣,៦៨៩នាក់)។
ដោយឡែក ការចាក់វ៉ាក់សាំង ដូសទី៣ ឬលើកទី៣ ត្រូវបានលោកប្រធានមន្ទីរសុខាភិបាល លើកឡើងថា នៅខេត្តតាកែវ ចាក់បានសរុប ១៤,២៣៥ នាក់ (ស្រី ៥,០៩៥ នាក់)។
ចំពោះស្ថានភាពកូវីដ-នៅខេត្តតាកែវ ក៏ត្រូវបានលោក នុត ស៊ីណាត លើកឡើងថា បើទោះបីជាប្រជាពលរដ្ឋយើងទូទៅ ទទួលបានការវ៉ាក់សាំងគ្រប់ៗគ្នាទៅហើយ ក៏ដោយ ក៏ការរីករាលដាលជំងឺកូវីដ នៅតែបន្តកើនឡើង មិនបានថយសោះ។ នោះគឺកាលពីថ្ងៃទី២៥ ខែសីហា ឆ្នាំ២០២១ ក្រុមគ្រូពេទ្យ នៅតែបន្តធ្វើតេស្ត យកសំណាក ចំពោះអ្នកដែលជាប់ពាក់ព័ន្ធជាមួយអ្នកមានជំងឺកូវីដ ហើយនៅតែបន្តឃើញមានឆ្លងជំងឺកូវីដ ចំនួន ៦៧នាក់ ( ស្ត្រី ២៦នាក់)។
លោក នុត ស៊ីណាត បន្តទៀតថា ទន្ទឹមនឹងធ្វើតេស្ករកឃើញអ្នកឆ្លងជំងឺកូវីដ នៅខេត្តតាកែវ គិតត្រឹមថ្ងៃទី២៥ ខែសីហា ឆ្នាំ២០២១ មានអ្នកឆ្លងកូវីដ១៩ សរុបចំនួន ៦,៣២៨នាក់ (ស្រីៈ ៣,៦១៨នាក់)។ ក្នុងនោះ អ្នកវិជ្ជមានកំពុងព្យាបាល មានចំនួន ៥១៤នាក់ (ស្រី ២៦០នាក់) ហើយអ្នកជំងឺ មានសភាពធម្មតាទាំងអស់។ ករណីជាសះស្បើយសរុប ៥,៦២២នាក់ (ស្រី ៣,៤០២នាក់) ស្លាប់សរុប ១៥៧នាក់ ( ស្ត្រី ៩៥នាក់ )។ ក្នុងនោះ ក៏មានអ្នកជំងឺកូវីដ១៩ នៅខេត្តតាកែវ ចំនួន ១២នាក់ ( ស្ត្រី ៥នាក់) ត្រូវបានបញ្ជូនទៅព្យាបាលនៅភ្នំពេញ រួមមាន៖ ៩នាក់ ទៅព្រីមៀសែនសុខភ្នំពេញ ២នាក់ ទៅមន្ទីរពេទ្យហ្លួងម៉ែ និងម្នាក់ ទៅមន្ទីរពេទ្យចាក់អង្រែ។
លោកប្រធានមន្ទីរសុខាភិបាលខេត្តតាកែវ បានបញ្ជាក់ថា ការធ្វើតេស្ត រកឃើញអ្នកវិជ្ជមានកូវីដថ្មី ទាំង ៦៧នាក់ (ស្រី ២៦នាក់) បានកើតឡើង នៅ ៧ស្រុក ហើយនៅស្រុកកោះអណ្តែត ឆ្លងជំងឺកូវីដច្រើនជាងគេ បើទោះជាស្រុកមួយនេះ មានសំណាងជាងគេ ដែលបានចាក់វ៉ាក់សាំងរបស់អាមេរិកក៏ដោយ។
តែទោះបីជាយ៉ាង ក៏ដោយ លោក គិន ភក្តី អភិបាលស្រុកកោះអណ្តែត បានប្រាប់កោះសន្តិភាពថា ការផ្ទុះរីករាលដាលជំងឺកូវីដ នៅក្នុងស្រុកកោះអណ្តែត រហូតឈានទៅបិទផ្សារកោះអណ្តែត ជាលើកទី២នោះ គឺអាចបណ្តាលមកពីឆ្លងមុនវ៉ាក់សាំងរបស់អាមេរិក មកដល់ ព្រោះតែវ៉ាក់សាំងទើបមកដល់ទើបតែកន្លះខែទេ។ អញ្ចឹងអ្នកដែលឆ្លងនោះ គឺមិនទាន់ទទួលបានចាក់វ៉ាក់សាំងរបស់អាមេរិកទេ៕ សេង សុធា
ចែករំលែកព័តមាននេះ