ភ្នំពេញ៖ នៅថ្ងៃទី២៦ ខែសីហា ឆ្នាំ​២០២១​ វេលាម៉ោង ១៥ និង ៣០នាទី ​គណៈបញ្ជាការឯកភាពខណ្ឌដូនពេញ សហការ​ជាមួយក្រុមគ្រូពេទ្យធីតា បានបិទខ្ទប់ផ្សារធំថ្មី និងយកសំណាកពីអាជីវករ ព្រមទាំងប្រជាពលរដ្ឋពាក់ព័ន្ធ ៣៨៤​នាក់ នៅខាងផ្នែកលក់គ្រឿងសមុទ្រ។ ជាលទ្ធផល មានអ្នកវិជ្ជមាន កូវីដ១៩ ចំនួន ២នាក់​។

សូមរម្លឹកថា ការបិទខ្ទប់ និងយកសំណាកអាជីវករទាំងនេះ បានធ្វើឡើង ក្រោយពីអ្នកវិជ្ជមានកូវីដ១៩ ប្រភេទ ដែលតា បានចូលទៅផ្សារធំថ្មី​កាលពីថ្ងៃទី១៥ ខែសីហា ឆ្នាំ​២០២១​។

កាលពីថ្ងៃទី២៥ ខែសីហា ឆ្នាំ២០២១ ក្រសួងសុខាភិបាល បានប្រកាសពីការរកឃើញអ្នកឆ្លងកូវីដ១៩ ប្រភេទ ដែលតា ចំនួន ១៣២៥នាក់ នៅ ២៣រាជធានីខេត្ត លើកលែងតែខេត្តកែប និងខេត្តក្រចេះ។ ក្នុងនោះ ភ្នំពេញ មានអ្នកឆ្លងច្រើនជាងគេ រហូតដល់ ៣៧៥នាក់។

ចំណែក​កាលពីថ្ងៃទី២៥ ខែសីហា ឆ្នាំ២០២១ ក្រសួងសុខាភិបាល ប្រកាសថា មានអ្នកឆ្លងថ្មី ចំនួន ៤២៣នាក់ ជាសះស្បើយ ២៩១នាក់ និងស្លាប់ ៦នាក់។ គិតត្រឹមថ្ងៃទី២៦ ខែសីហា នៅទូទាំងប្រទេស មានអ្នកឆ្លងកូវីដ១៩ សរុបចំនួន ៩០៩៥៨នាក់។ ករណីជាសះស្បើយ សរុបចំនួន ៨៦៩៩៣នាក់ និងករណីស្លាប់សរុប កើនឡើងដល់ ១៨៤១នាក់។៕ ទុយ ប៊ុនរី​