មន្ត្រីជំនាញ៖ ជំងឺដុំពកលើស្បែកសត្វគោ និងក្របី គឺអាចព្យាបាលជាសះស្បើយ ប្រសិនមើលថែទាំបានល្អ
- សៀមរាប
ខេត្តសៀមរាប៖ បច្ចុប្បន្ននេះ ជំងឺដុំពកលើស្បែកសត្វគោ និងក្របី បាន និងកំពុងកើតមាននៅក្នុងប្រទេសកម្ពុជាយើង និយាយរួម និងដោយឡែក នៅទូទាំងខេត្តសៀមរាប។ នៅសៀមរាប ជំងឺនេះ បានកើតមានចំនួន ៧២០ក្បាល ក្នុងនោះ បានព្យាបាលជាសះស្បើយ ចំនួន៦៦៧ក្បាល កំពុងព្យាបាល ចំនួន ៤៧ក្បាល និងងាប់ ចំនួន ៦ក្បាល។ នេះបើតាមមន្ត្រីជំនាញ។
ក្នុងឱកាសចុះត្រួតពិនិត្យស្ថានភាពសត្វគោក្របី នៅតាមឃុំមួយចំនួន ក្នុងខេត្តសៀមរាប នារសៀលថ្ងៃទី២០ ខែសីហា ឆ្នាំ២០២១ លោក ព្រំ វិច ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប បានឱ្យដឹងថា ដោយសារការកើតមានជំងឺប្រភេទនេះនារយៈកាលកន្លងមកនោះ បានធ្វើឲ្យប្រជាពលរដ្ឋ ដែលជាអ្នកចិញ្ចឹមសត្វគោ-ក្របីនេះ សម្ដែងនូវការព្រួយបារម្ភជាខ្លាំង ព្រោះថា ប្រសិនបើសត្វគោ-ក្របីរបស់គាត់ ងាប់ច្រើន នឹងធ្វើឱ្យប៉ះពាល់ជីវភាពរបស់ពួកគាត់ ប៉ុន្តែបញ្ហានេះ ដោយសារពួកគាត់មិនទាន់យល់ច្បាស់អំពីជំងឺប្រភេទនេះ តែតាមពិតជំងឺដុំពកលើស្បែកសត្វគោ និងក្របី គឺអាចព្យាបាលបានសះស្បើយ ប្រសិនម្ចាស់សត្វបានមើល ថែទាំបានល្អនោះ ដែលវិធីនៃការព្យាបាល គឺការពារទប់ស្កាត់ជំងឺឱកាសនិយម និងដំបៅរលួយ ករណីសត្វក្តៅខ្លួន អាចប្រើពពួកថ្នាំបញ្ចុះកំដៅ ជាៈPracetamole អាចប្រើពពួក Dexametasone , Amoxiciline , Chlorazone, Bactrim ករណីមានដំបៅប្រើថ្នាំ ខៀវ (Methylen blu) និង Negazun ប៉ុន្តែបើមានអាត្រាងាប់ គឺមានចំនួនតិច។
លោក ព្រំ វិច បន្ថែមថា រយៈកាលកន្លងមក មន្ត្រីបសុពេទ្យខេត្ត ស្រុក ភ្នាក់ងារសុខភាពសត្វភូមិ តែបានសហកាការជាមួយអាជ្ញាធរមូលដ្ឋាន ចុះធ្វើការអប់រំ និងផ្សព្វផ្សាយពីអនាម័យ វិធានការការពារ និង ទប់ស្កាត់ការឆ្លងរាលដាលជំងឺដល់កសិករម្ចាស់សត្វ ចំនួនជាង ១.២០០ គ្រួសារ ព្រមទាំងបានចុះបាញ់ថ្នាំសម្លាប់មេរោគតាមទ្រុងចិញ្ចឹមសត្វ បានជាច្រើនកន្លែងផងដែរ។ ដូច្នេះ ក្នុងឱកាសនេះ លោកសូមអំពាវនាវដល់ប្រជាពលរដ្ឋ ដែលមានសត្វគោ ក្របី ឈឺ ឬងាប់ ហាមលក់ដូរ ហាមយកសាច់របស់វាទៅបរិភោគ ព្រោះវាអាចធ្វើឱ្យប៉ះពាល់ដល់ផលិតកម្មសត្វ សូមចូលរួមសហការជាមួយមន្ត្រីពេទ្យសត្វ ក្នុងអំឡុងពេលគាត់ចុះទៅចាក់វ៉ាក់សាំងដល់សត្វគោ-ក្របី និងយកសត្វទៅចាក់ថ្នាំ ឱ្យបានគ្រប់ៗគ្នា ជាពិសេសនៅពេល ដែលមានសត្វឈឺ ត្រូវធ្វើការទំនាក់ទំងជាមួយភ្នាក់ងារសុខភាពសត្វភូមិ និងអាជ្ញាធរកមូលដ្ឋានឱ្យបានលឿន ដើម្បីខាងមន្ត្រីជំនាញជួយរកវិធីសាស្ត្រសង្គ្រោះបានទាន់ពេល។
សូមបញ្ជាក់ថា ជំងឺដុំពកស្បែកគោនេះ បង្កដោយវីរុស(Poxviridae) តាមរយៈសត្វល្អិតបឺតជញ្ជក់ឈាម មូស របោម រុយ ស្រួយ ដង្កែ ការចល័តសត្វឈឺពីតំបន់មួយទៅតំបន់មួយ និងការស៊ីចំណីជុំគ្នា។ ប៉ុន្តែជំងឺនេះ ជាជំងឺចាស់ សម្រាប់ប្រទេសគេ។ តែថ្មីសម្រាប់ប្រទេសកម្ពុជាយើង៕ ច័ន្ទ រស្មី
ចែករំលែកព័តមាននេះ